په‌رله‌مانی هه‌رێمی کوردستانی عێراق نۆ ئه‌ندامی بۆ کۆمیسیۆنی باڵای سه‌ربه‌خۆی هه‌ڵبژاردنه‌کانی هه‌رێم دیاریکردووه.
ئه‌ندامه‌کان به‌م شێوه‌یه‌ن:
پارتی دیموکراتی کوردستان 3 ئه‌ندام.
بزووتنه‌وه‌ی گۆڕان 2 ئه‌ندام.
یه‌کێتی نیشتیمانی کوردستان 2 ئه‌ندام.
یه‌کگرتووی ئیسلامی کوردستان 1 ئه‌ندام.
کۆمه‌ڵی ئیسلامی 1 ئه‌ندام.
په‌سه‌ندکردنی ئه‌م ئه‌ندامانه‌ی کۆمیسیۆنی باڵای سه‌ربه‌خۆیی هه‌ڵبژاردن ده‌کرێت بگوترێت به تێکڕای ده‌نگی په‌رله‌مانتارانی کورد بووه له دانیشتنێکی ئاسایی په‌رله‌مانی هه‌رێمدا.
به‌ڵام تورکومانه‌کان و ئاشوریه‌کان و ئه‌رمه‌نیه‌کان بایکۆتی ده‌نگدانه‌که‌یان کرد و هه‌ر یازده نوێنه‌ره‌که‌یان دانیشتنه‌که‌ی په‌رله‌مانیان جێهێشت.
دکتۆر جه‌عفه‌ر عه‌لی، شیکه‌ره‌وه‌ی سیاسی ده‌ڵێت ئامانج له‌م کۆمیسیۆنه و له یاساکه‌شی که له په‌رله‌ماندا په‌سه‌ندکراوه ده‌بێت به پله‌ی یه‌که‌م بێ خه‌وشی له هه‌ڵبژاردنه‌کاندا بپارێزێت وه‌ک ده‌ڵیت له ساڵی 1992 ه‌وه تا دواهه‌ڵبژاردن که له 2014 کرا بۆ هه‌ڵبژاردنی ئه‌نجومه‌نی پارێزگاکان به‌رده‌وام قسه له‌سه‌ر فێڵ و ته‌ڵه‌که‌ی هه‌ڵبژاردن و ده‌ستێوه‌ردانی حیزبی له هه‌ڵبژاردن و ده‌ستێوه‌ردانه‌کانی تریش ده‌کرێن.
دکتۆر جه‌عفه‌ر عه‌لی که پێشتر ئه‌ندامی په‌رله‌مانی هه‌رێمی کوردستانی عێراق بووه ده‌ڵێت پێی وانییه ئه‌م کۆمیسیۆنه بتوانێت ئه‌و ئه‌رکه به‌جێبگه‌یه‌نێت له‌و ڕوانگه‌یه‌وه‌ی هه‌نگاوی یه‌که‌می دیاریکردنی ئه‌م کۆمیسیۆنه سه‌رکه‌وتووانه نه‌بووه.
پێشتر سێ لایه‌نه‌که‌ی ئۆپزسیۆنی هه‌رێمی کوردستان (بزووتنه‌وه‌ی گۆڕان- یه‌کگرتووی ئیسلامی- کۆمه‌ڵی ئیسلامی) ڕاگه‌یاندنی توندیان ده‌دا له‌سه‌ر ده‌ستێوه‌ردانه‌کانی حیزب و ته‌گه‌ره‌کانی حیزب بۆ به نیشتیمان کردنی دامه‌زراوه‌کان دروستی ده‌کردن.
دکتۆر جه‌عفه‌ر ده‌ڵێت پێشتر زۆر قسه له‌سه‌ر پارتی و یه‌کێتی کراوه و پێشتر گله‌ییمان هه‌بووه و دواتر ده‌بینه به‌شێک له‌و دابه‌شکردنه حیزبییه هه‌ر بۆیه وه‌ک ده‌ڵێت سه‌ره‌تایه‌کی خراپه‌و پێویسته هه‌وڵ بدرێت بۆ تا به‌ڕاستی ئه‌و دامه‌زراوانه دامه‌زراوی سه‌ربه‌خۆ بن.
به‌ڵێن ساڵح وتووێژی له‌گه‌ڵ دکتۆر جه‌عفه‌ر عه‌لی شیکه‌ره‌وه‌ی سیاسی کردووه.
زانیاری زیاتر له ده‌قی وتووێژه‌که‌دایه:
