سەر لە بەیانی ئەمڕۆ لەبەردەم نوسینگەی ڕێکخراوی کرێکارانی میزۆپۆتامیا تەقە لە کەسێک کرا و هەوڵی کوشتنی درا. بە پێی زانیاریەکان لە ئێستادا ئەو کەسە لە نەخۆشخانەیە و تەندروستی ناجێگیرە.
کەسەکە ناوی حسێن ئاراسانە و لە دایک بووی ساڵی 1978 و خەڵکی ماردینە. ئەو ساڵانێکە لە سلێمانی نیشتەجێیە و ئەندامی ڕێکخراوی میزۆپۆتامیایە کە بریتییە لە ڕێکخراوێکی تایبەت بە کرێکارانی کوردستانی تورکیا لە سلێمانی.
سەرچاوە ئاگادارەکان بە دەنگی ئەمەریکایان ڕاگەیاند حسێن ئاراسان لەبەردەم نوسینگەی ڕێکخراوەکە لە لایەن کەسێکەوە تەقەی لێکراوە و بە سێ فیشەک پێکراوە. دوای ڕووداوەکە بەپەلە گواستراوەتەوە بۆ نەخۆشخانە و ئێستا تەندروستی ناجێگیرە.
ئایسەل کە ئەندامانی ڕێکخراوی میزۆپۆتامیایە و نەیویستوە ناوی تەواوی ئاشکرا بکرێت، لە لێدوانێکیدا بۆ دەنگی ئەمەریکا ڕایگەیاند، "ئەمڕۆ کاتژمێر 10:30، کاتێک حسێن لەبەردەم نوسینگەی ڕێکخراوەکە بووە، لەلایەن کەسێکەوە تەقەی لێکراوە و هەوڵی تیرۆرکردنی دراوە."
ئەو وتیشی"حسێن خێزاندار نیە و خەڵکی ماردینەو پێشتر چالاکوانی سیاسی بووە لە تورکیا، بەڵام بە هۆی هەڕەشەی حکومەتی تورکیا هاتۆتە شاری سلێمانی و ساڵانێکە لێرە دەژی."
حسێن ئاراسان لە ئێستادا لە نەخۆشخانەی شارە و لە ژێر چاودێری چڕدایە. بە پێی قسەی ئایسەل "مەترسی لە سەر ژیانی هەیە و بە سێ گولە پێکراوە کە بەر سنگ و ملی کەوتووە."
بەرپرسانی نەخۆشخانەکە ئامادەنەبوون لەسەر ڕووداوەکە لێدوان بدەن.
بە پێی قسەی سەرچاوەیەک لەناو ئاسایشی سلێمانی بۆ دەنگی ئەمەریکا تا ئێستا بە هۆی ڕوداوەکەوە کەس دەستگیر نەکراوە و لێکۆڵینەوە بەردەوامە. بەڵام تا ئێستا بە فەرمی بەڕیوەبەرایەتی ئاسایشی سلێمانی و پۆلیسی سلێمانی هیچ ڕونکردنەوەیەکیان بڵاو نکردۆتەوە لەو بارەیەوە.
دەنگی ئەمەریکا پەیوەندی کرد بە وتەبێژی پۆلیسی سلێمانی بەڵام پەیوەندیەکە بەردەست نەبوو.
ئەم هەواڵە نوێ دەکرێتەوە....
لە سلێمانی کەسێک بە سەختی بریندار دەکرێت کە دەوترێت لە ژێر هەڕەشەی حکومەتی تورکیا بووە
