دکتۆر میران محەمەد بەڕێوەبەری گشتی تەندروستی سلێمانی لەم وتووێژەدا لەگەڵ بەشی کوردی دەنگی ئەمریکا دەڵێت پانزە ڤایرۆسی نەخۆشی ئیفلیجی منداڵان لە هەرسێ پارێزگاکەی هەرێمی کوردستان(هەولێر، سلێمانی، دهۆک) نەماوە و هیچ منداڵێک توش نەبووە بەڵام لەو کاتەوەی ئاوارە و پەنابەر ڕویان کردۆتە هەرێمی کوردستان ترسمان هەیە.
بەڕێوەبەری گشتی تەندروستی سلێمانی دەڵێت ساڵانە وەک هەرێمی کوردستان چوار جار هەڵمەتی کوتانی منداڵانمان دژ بە ئیفلیجی ئەنجامداوە ، بەڵام ساڵی ڕابردوو کە ئاوارە و پەنابەران هاتن زیاتر لە هەشت جار ئەو پڕۆسەیەمان ئەنجامدا، چونکە ئەو منداڵانە لە شوێنێکەوە هاتوون کە جەنگ تێیدا بووە و دڵنیاین هیچ پڕۆسەیەکی کوتان دژ بە نەخۆشیە بڵاوەکانی منداڵان ئەنجامنەدراوە.
وتیشی قەیرانی دارایی کاری نەکردۆتە سەر ئەنجامدانی هەڵمەتی کوتانی منداڵان دژ بە ئیفلیجی، چونکە کارمەندەکانمان ماندوو نەناسانە و خۆ بەخشانە ئەو هەڵمەتە ئەنجام دەدەن و لە گەرمەی بایکۆتی فەرمانبەرانی سلێمانیدا،(٢٠٠٠) کارمەندی تەندروستی بەیانی تا ئێوارە چونەتە کەمپ و لادێ دورەکان بۆ کوتانی منداڵ دژی ئیفلیجی.
دکتۆر میران محەمەد بەڕێوەبەری گشتی تەندروستی سلێمانی وتیشی:ئاستی هۆشیاری خێزانەکان زۆر بەرزە بۆ کوتانی منداڵەکانیان و پاراستنیان لە نەخۆشیەکان لە دواین هەڵمەت لەڕۆژانی ٢٣ی مانگ بەدواوە دەستیپێکرد لە سنووری پارێزگای سلێمانی زیاتر لە(٢٦٣) هەزار منداڵ کوتراون کە دەکاتە لە ٩٩%.
بەڕێوەبەری گشتی تەندروستی سلێمانی جەختی کردەوە بەردەوام دەبن لەسەر هەڵمەتی کوتانی منداڵ لە شار و گوند و ناو کەمپی ئاوارە و پەنابەران لە پێناو بەرزکردنەوەی سیستمی بەرگری لەشی منداڵان و ڕێگری کردن لە نەخۆشیە گوازراوەکان.
Your browser doesn’t support HTML5
وتووێژ لەگەڵ دکتۆر میران محەمەد