ژماره‌ی کوژراوانی کانه‌ خه‌ڵوزه‌که‌ی تورکیا گه‌یشـته‌ 232 که‌س

به‌پـێی دوایـین ئامار ژماره‌ی کوژراوانی ئاکامی ته‌قینه‌وه‌که‌ی ڕۆژی سێشه‌ممه‌ی نێو کانه‌ خه‌ڵوزه‌که‌ی ناوچه‌ی سۆمای هه‌رێمی مانیسای ڕۆژئاوای تورکیا گه‌یشـتووه‌ته‌ 232 کرێکار.
پـێشـتر وه‌زیری وزه‌ی تورکیا تانه‌ر یاڵدز ڕایگه‌یان 205 که‌س گیانیان له‌ده‌سـتداوه‌ و 57 که‌سیش برینداربوون.
ئاژانسی ده‌نگ‌وباسی ئه‌سۆشیه‌تد پـرێس ده‌ڵێت هێشـتا چاره‌نووسی زیاتر له‌ 200 کرێکار ڕوون نیـیه‌.
تانه‌ر یه‌ڵدز بۆ ده‌زگاکانی ڕاگه‌یاند ئاشکراکرد له‌ ده‌می ته‌قینه‌وه‌که‌ 787 که‌س له‌ نێو کانه‌که‌دا بوون و هه‌تا ئێسـتا توانراوه‌ 363 که‌سیان ڕزگاربکرێن. ئاماژه‌ی به‌وه‌ش کرد 500 که‌س له‌ تیمه‌کانی فریاکه‌وتن به‌رده‌وامن له‌ هه‌وڵه‌کانیان بۆ ده‌رهێنانه‌وه‌ی قوربانیـیه‌کان.
کاربه‌ده‌سـتان ده‌ڵێن ته‌قینه‌وه‌که‌ له‌و ده‌مه‌دا بووه‌ که‌ ئاڵوگۆڕی شه‌فته‌کان ده‌کرا، ئه‌مه‌ش وایکردووه‌ ژماره‌یه‌کی زیاتر کرێکار له‌ کانه‌که‌دا بن و سه‌رئه‌نجام قوربانی زیاتری لێـکه‌وتووه‌ته‌وه‌.
سه‌رۆک وه‌زیری تورکیا ڕه‌جه‌ب ته‌یب ئه‌ردۆغان بۆ ماوه‌ی سێ ڕۆژ ماته‌مینی گشـتی له‌ وڵاته‌که‌ی ڕاگه‌یاند و فه‌رمانی کرد ئاڵاکان بۆ نیوه‌ی دابگیرێن. هه‌روه‌ها گه‌شته‌که‌ی بۆ ئه‌لبانیا دواخست تاوه‌کو سه‌ردانی شوێنی کاره‌سـاته‌که‌ بکات.
له‌ لایه‌کی دیکه‌ به‌ سه‌دان که‌س له‌ به‌رده‌م باره‌گای کۆمپانیای خاوه‌ن کانه‌که‌ خۆپـیشـاندانیان سـازکردووه‌.