له ئێسـتادا به‌رپـرسانی عێراق و زۆرێـک له ده‌زگاکانی ڕاگه‌یاندن باس له نزیکبوونه‌وه‌ی شه‌ڕی ڕزگارکردنی شاری موسڵ له داعش ده‌که‌ن.
فڕۆکه‌کانی له‌شـکری عێراق به هه‌زاران نامه و بڵاوکراوه‌یان به‌سه‌ر شاری موسڵدا به‌رداوه‌ته‌وه و تیایاندا به دانیشـتوانیان گوتووه هێزه چه‌کداره‌کان ئاماده‌ن هاوکاریـیان بکه‌ن بۆ ڕزگارکردنی شاره‌که‌یان له داعش.
هاوکات سه‌لیم جبوری سه‌رۆکی په‌رله‌مان که بۆخۆی که‌سایه‌تیـیه‌کی سووننه‌یه، سه‌ردانی هه‌ولێری کردووه و له‌وێ له‌گه‌ڵ کاربه‌ده‌سـتانی کورد تاووتوێی مه‌سه‌له‌ی کردنه‌وه‌ی سه‌ربازه‌گه‌ی نوێی بۆ مه‌شق و ڕاهێنانی خۆبه‌خشان کردووه، ئه‌وانه‌ی ئاماده‌ن به‌شـداری له ڕزگارکردنی موسڵدا بکه‌ن.
له لایه‌کی دیکه ئه‌سیل نوجێفی پارێزگاری موسڵ له لێـدوانێـکی ڕۆژنامه‌وانیدا گوتویه‌تی ئاماده‌کاریـیه‌کان بۆ ڕزگارکردنی موسڵ گه‌یشتوونه‌ته قۆناغی پـێشـکه‌وتوو. ئاماژه‌ی بۆ ئه‌وه‌ش کردووه هێزه‌کانی حه‌شدی شه‌عبی به‌شـداری ناکه‌ن تاوه‌کو داعش مه‌سه‌له‌که نه‌قۆزێته‌وه و شه‌ڕه‌که به شه‌ڕی تایفی بۆ خه‌ڵـکی وێنا نه‌کات، به‌ڵام له هه‌مان کاتدا گوتویه‌تی بۆ به‌شداری پـێشـمه‌رگه مه‌سه‌له‌که جیاوازه له‌به‌ر زۆر هۆکار، له‌وانه موسڵ و ناوچه‌کانی هه‌رێم به یه‌که‌وه به‌سـتراونه‌ته‌وه و خه‌ڵـکی زۆری موسڵ له ئێسـتادا له هه‌رێمی کوردسـتانن.
پـێشـتر هادی عامری سه‌رۆکی ڕێـکخراوی به‌دری شیعه‌کان گوتبوی پاش ڕزگارکردنی تکریت به‌ره‌و موسڵ ده‌ڕۆن.
پـرسیار لێره‌دا ئه‌وه‌یه ئایا به‌شـداری پـێشـمه‌رگه له ڕزگارکردنی موسڵ له به‌رژه‌وه‌ندی هه‌رێمی کوردسـتاندایه؟ ئه‌گه‌ر هاتوو هێزه‌کانی حه‌شدی شه‌عبی به‌شـداری له ڕزگارکردنی موسڵدا کرد ئایا پـێشـمه‌رگه هاوکاریـیان ده‌کات؟
ئه‌مه بابه‌تی به‌رنامه‌ی هه‌له‌و واشنتنی ئه‌م هه‌ینیـیه بوو که حه‌یده‌ر که‌ریم له به‌شی کوردی ده‌نگی ئه‌مه‌ریکا به‌ڕێوه‌ی برد و میوانه‌کان ئه‌م به‌ڕێزانه بوون:
فازڵ به‌شاره‌تی، ئه‌ندامی ئه‌نجومه‌نی سه‌رکردایه‌تی پارتی دیموکراتی کوردسـتان.
مه‌حمود عومه‌ر، ئه‌ندامی لیژنه‌ی کاروباری پـێشـمه‌رگه له‌سه‌ر لیستی گۆڕان.
شوان ڕابه‌ر، ئه‌ندامی سه‌رکردایه‌تی کۆمه‌ڵی ئیسلامی.
