بە ڕای زۆرێک لە چاودێر ڕوسیا هەوڵ دەدات پێگەی سەربازی خۆی لە ڕۆژهەڵاتی ناوەڕاستدا و بە تایبەتیش لە سوریادا فراوان بکات و ئاماژەکانیش وەها نیشان دەدەن مۆسکۆ دەخوازێت لە عێراقیشدا هەمان ڕۆڵی هەبێت.
ڕوسیا، ئێران، عێراق، سوریا لە سەروبەندی ڕێکەوتنێکی ئاسایشی و سیاسیدان بۆ ئاڵوگۆڕکردنی زانیارییەکان دژی ڕێکخراوی دەوڵەتی ئیسلامی و سنوردارکردنی ئەو مەترسیانەی ئەم ڕێکخراوە ئیسلامیە تێرۆریستیە هێناویەتیە ئاراوە لە ناوچەکەدا.
عەبدوڵا ئەلدولەیمی، سیاسەتمەداری عەرەبی سوننەی عێراقی دەڵێت ڕەهەندەکانی ئەم ڕێکەوتنە هەر تەنها ئەوەندە نییە لە چوارچێوەی سنوردارکردنی مەترسییەکانی دەوڵەتی ئیسلامیدا ببینرێت.
ئەلدولەیمی دەڵێت ئەم هاوپەیمانێتییەی کە باس دەکرێت بۆ پشتیوانی هاتنە ناوەوەی زیاتری ئێران و پشتیوان کردنی سوریایە لە ناوچەکەدا و وەک دەڵێت ئەمانەش لە ڕێی ڕوسیاوە دەکرێن و ئەگەر ئەمەش بوو ئەوا وەک ئاماژەی پێدەکات "بە دڵنیاییەوە دەبێتە مایەی مەترسییەکی گەورە بۆ سەر ڕۆژهەلاتی ناوەڕاست و بە تایبەتیش بۆ سەر عێراق."
عەبدوڵا ئەلدولەیمی لەو بڕوایەدایە ئەگەر هاتوو واشنتۆن ئەو هەستەی لەلا دروست بوو کە ئەم ڕێکەوتنە خزمەت بە بەرژەوەندییەکانی ناکات ئەوا بە دڵنیاییەوە ئەو جۆرە هەستکردنە لە بەرژەوەندی بەغدا نابێت.
لەسەر بنچینەی وتووێژەکەی لەگەڵ عەبدوڵا ئەلدولەیمی، سیاسەتمەداری عەرەبی سوننەی عێراقی، بەڵێن ساڵح ئەم ڕاپۆرتەی ئامادەکردووە:
