هاتنی ڕاستەوخۆی ڕووسیا بۆ نێو قەیرانی سوریا کاردانەوەی جیاجیا لێ‌کەوتووەتەوە و زۆرێـک دەڵێن مەبەستی ئەم وڵاتە زلهێزەی جیهان بەرگریکردنە لە حکومەتی بەشار ئەسەد.
ڕووسیا دەڵێت هاتنی بۆ ناو سوریا بۆ لێدانی داعش و گروپە تێرۆرستیـیەکانی دیکەیە، بەڵام ڕوون نیـیە کام گروپ و گروپە بە تێرۆرست دادەنێت.
حکومەتی عێراق بە ئاشکرا خۆشحاڵی بەم هەنگاوەی ڕووسیا دەربڕی و هیوادارن ئاکامی باشی هەبێت بۆ سەر شەڕی دژی داعش. سەرۆکایەتی هەرێمی کوردسـتانیش لە ڕاگەیاندنێـکدا گوتی ئەگەر ڕووسیا یارمەتی هێزی پـێشـمەرگە لە شەڕی دژی داعش دەدات، ئەوا پـێشوازی لێدەکات.
بەڵام ئەمەریکا و تورکیا و وڵاتانی دیکەی ناتۆ و ژمارەیەک لە وڵاتانی عەرەب نیگەرانی خۆیان درەبڕیوە و دەڵێن ئەمە هێندەی دیکە قەیرانی سوریا ئاڵۆزتر دەکات.
پـرسیار لێرەدا ئەوەیە بە هاتنی ڕووسیا بۆ سوریا بوار بۆ ڕووخاندنی ڕژێمی ئەسەد دەمێنێت؟
ئایا نیگەرانیـیەکانی ڕۆژئاوا و وڵاتانی دیکە تەنها لە مەسەلەی مانەوەی ئەسەدە یان بابەتی دیکەش هەن.
کورد چۆن لەگەڵ ئەم پـێشهاتانە مامەڵە بکات چ لە سوریا یان عێراق؟
ئه‌مه بابه‌تی به‌رنامه‌ی هه‌له‌و واشنتنی ئه‌م هه‌ینیـیه بوو که حه‌یده‌ر که‌ریم له به‌شی کوردی ده‌نگی ئه‌مه‌ریکا به‌ڕێوه‌ی برد و میوانه‌کان ئه‌م به‌ڕێزانه بوون:
محییەدین پاڵانی، شارەزای کاروباری ئێران و ڕۆژهەڵاتی ناوەڕاست.
سەڵاح مەجید پـور، شیکەرەوەی سیاسی لە هۆڵەندا.
