لەگەڵ ئەوەشدا وەک سەرکردە باڵاکانی شیعەو گەورە کاربەدەستانی حکومەتی عێراقیش دەڵێن پێکهێنانی هێزی حەشدی شەعبی بۆ شەڕی دژی ڕێکخراوی دەوڵەتی ئیسلامییە، بەڵام هەر لە سەرەتای دامەزراندنی ئەم هێزەوە ڕەخنەو ناڕەزایی هەبووە بەرامبەر حەشدی شەعبی و بە تایبەتیش هاوکاتی شەڕەکانی ئازاد کردنی شاری تکریت دانیشتوانی ئەو پارێزگایە وەها ئەم هێزەیان دەناساند کە هێزێکە بۆ تۆڵە کردنەوە لە سوننەکان و ئاماژەیان بە گەلێک پێشێلکاری ئەم هێزە دەکرد.
مەهدی ئەلحافز سیاسەتمەدارێکی عەرەبی سوننەیەو دەڵێت ئەم شەڕانەی نێوان حەشدی شەعبی و هێزی پێشمەرگە چاوەڕوانکراو بوون.
مەهدی ئەلحافز کە پێشتر پۆستی وەزیری پلاندانانی هەبووە لە عێراقدا دەڵێت ناکۆکی نێوان هه‌ولێر و به‌غدا کێشەیەکی گەورەیە لە وڵاتەکەدا، جیاوازی لەسەر نەوت هەیە، جیاوازی لەسەر ناوچە جێناکۆکەکان هەیە و ئێشتاش کێشەیەکی نوێ دروست بووە کە کێشەی شاری شەنگالە، ئێستا هێزی پێشمەرگە و سەرکردایەتی کورد دەڵێن شەنگال ناوچەیەکی کوردییە، و دەبێت لە چوارچێوەی سنوری هەرێمی کوردستاندا بێت و حکومەتی نێوەندیش ڕایەکی پێچەوانەی هەیە و دەڵیت کێشەکان هەروادێ و قوڵتر دەبنەوە لە نیوان بەغدا و هەولێردا.
هاوکات عەلی ئەلفەیز، ئەندامی فراکسیۆنی دەوڵەتی یاسا لە پەرلەمانی عێراق دەڵێت ئەم شەڕانەی نێوان هێزەکانی پێشمەرگە و حەشدی شەعبی چاوەڕوان کراو نەبوون، بەڵام جیاوازییەکان ڕۆڵیان هەبووە.
ئەم ئەندامە شیعەیەی پەرلەمانی عێراق دەڵێت شەڕەکان چاوەڕوان نەکراو بوون، بەڵام جیاوازی ڕیشەیی هەیە لە نیوان هەردوو لادا وەک کورد و حکومەتی عێراق لەوانە دۆسێی نەوت و ناردنە دەرەوەی نەوت، لەسەر بەندی 140 و هەروەها لەسەر شەنگال و هەڵکردنی ئاڵای کوردستان لە شاری شەنگال.
ئارام شێخ موحەمه‌د جێگری سەرۆکی پەرلەمانی عێراق درەنگانێکی ڕۆژی یەکشەممە لەگەڵ حەیدەر عەبادی سەره‌ک وەزیری وڵاتەکەدا کۆبووەوە بۆ چارەسەرکردنی ئەم کێشانەی نێوان حەشدی شەعبی و هێزی پێشمەرگە.
جێگری سهرۆکی په‌رله‌مان ده‌ڵێت ڕژدی له هه‌ڵوێسته‌کانی به‌ڕێز عه‌بادیدا بینیوه بۆ چاره‌سه‌رکردنی کێشه‌کان.
شەڕەکانی دووزخورماتوو وەک چاودێر دەڵین زەنگێکی ترسناکە بۆ ڕووداوی تری نەخوازراو لە ناوچە جێناکۆکەکانی تری عێراقدا. وەک دەگوترێت ڕێبەرانی کورد لە وڵاتەکەدا دەخاتەبەردەم بەرپرسیارێتییەوە بۆ وەلاوەنانی جیاوازییەکانی نێوانیان و کارکردنی پێکەوەیی لە شەڕی دژی دەوڵەتی ئیسلامی و ڕێگەگرتن لە مەترسییەکانی حەشدی شەعبی کە هەندێک چاودێر بە داعشی شیعە ناودێری دەکەن.
له‌سه‌ر بنچینه‌ی وتووێژه‌کانی له‌گه‌ڵ ئارام شێخ موحه‌مه‌د، جێگری سهرۆکی په‌رله‌مانی عێراق، مه‌هدی ئه‌لحافز، سیاسه‌تمه‌داری عه‌ره‌بی سوننه، عه‌لی ئه‌لفه‌یز، ئه‌ندامی په‌رله‌مانی عێراق له فراکسیۆنی ده‌وڵه‌تی یاسا، به‌ڵێن ساڵح ئه‌م ڕاپۆرته‌ی ئاماده کردووه.
زانیاری زیاتر له ده‌قی ڕاپۆرته‌که‌دایه:
