هاوکاتی هاتنە ناوەوەی ڕوسیا لە ناوچەی ڕۆژهەڵاتی ناوەڕاستدا و بەتایبەتیش بەشدارییەکانی لە شەڕی ناوخۆی سوریادا، زۆرێک لە چاودێر لەوبڕوایەدان گۆڕانکاری بنچینەیی لەو ناوچەیەی جیهاندا دێتە ئاراوە.
ناکۆکییەکانی نێوان ئانکەرە و مۆسکۆ دوابەدوای خستنە خوارەوەی فڕۆکەیەکی جەنگیی هێزی ئاسمانی ڕوسیا هێندەی تر ڕەوشی ناوچەکەی ئاڵۆزکرد و چاودێرانیش وەک بەڵگەیەک دەیهێننەوە بۆ ڕوانینەکانیان لەسەر گۆڕانکارییە چاوەڕوانکراوەکان.
ئایا کورد لە کوێی ئەم گۆڕانکاریانەدایە؟
بورهان ڕەئوف، نوسەر و لێکۆڵەر دەڵێت ئێستە هێزی زیاتر هاتونەتە ناوچەکە و دەستێوەردانی گەورەی هێزە هەرێمییەکان هەن و لەم ڕەوشە ئاڵۆزەشدا کورد فاکتەرێکی سەرەکییە لە شەڕی دژی توندڕەوانی دەوڵەتی ئیسلامیدا لە ڕۆژئاوا و لە باشوری کوردستان و دەشڵێت ئێستا کورد ئەو دیفاکتۆیەیە کە وڵاتە گەورەکان سەرو سەودایەکی تایبەتی لەگەڵدا دەکەن.
بەڕێز ڕەئوف دەڵێت زۆریش گرنگە بۆ کورد لە ئێستادا دەستکەوتە ئاسایشییەکان و رێکەوتنەکانی لەسەر بنچینەی ئاسایشی و لەشکریی کراون بگۆڕێت بۆ دۆکیۆمێنتی نوسراوی سیاسی.
لە میانەی وتووێژەکەیدا لەگەڵ بەڵێن ساڵح، بورهان ڕەئوف ئاماژەش بەوە دەکات کە کورد لەسەر زەوی خۆی خاوەنی بەرژەوەندی خۆیەتی و دەڵێت ئەگەر ئەمڕۆ ئێران یان تورکیا خاوەنی بەرژەوەندییەک بن یانیش ئەوانەی دەستێوەردانیان لە عێراق و سوریادا کردووە دەبنە مەترسی بۆسەر ناوچەکە هەر بۆیە وەک دەڵێت لێرەدا پێویستە کورد بێلایەنی خۆی بپارێزێت و تەواوی هەوڵەکانی بۆ چەسپاندنی مافەکانی بێت.
زانیاری زیاتر لە دەقی وتووێژەکەدایە:
