لە پاش ڕاگەیاندنەکانی دژ بە دەسەڵات لە هەرێمی کوردستانی عێراق ئەفسەری هاتوچۆ (فەرامۆش نەجم) دەستگیر دەکرێت و دوا بڕیاریش لەسەر دۆسێکەی لای لیژنەیەکی تایبەتە کە وەزارەتی ناوخۆی هەرێمبۆ لێکۆڵینەوە پێکیهێناوە.
لیژنەی ناوخۆ و ئاسایش لە پەرلەمانی هەرێم بەدواداچوون لەسەر ئەم دۆسێیە دەکات و دەڵێت لەگەڵ ئەفسەر فەرامۆشیشدا قسە کراوە.
سەرۆکی لیژنەی ناوخۆ و ئاسایش لە پەرلەمانی هەرێم باس لەوە ناکات ئەم ئەفسەرەی پۆلیسی هاتوچۆ بە چ یاسایەک دەستگیرکراوە بەڵام دەڵێت پەیوەندی هەیە بەو لێدوانانەی دابوونی بۆ کەناڵێکی تەلەفزیۆنی و تیایدا هێرشی کردۆتە سەر کۆمەڵێک بەرپرس و بە دیاریکراویش ناوی هێناون و باسیشی لە ڕاپەڕین و لە گەریلاش کردووە و لەسەر ئەمانە لیژنەی بۆ پێکهێنراوە بە مەبەستی لێکۆڵینەوە کردن.
ئەیوب عەبدوڵا ئیسماعیل دەڵێت ئەو لیژنەیە بڕیاری خۆی هەیە بۆ دەستگیرکردنەکە و لێکۆڵینەوەکان لەسەر لێدوانەکانی ئەفسەر فەرامۆش و دەشڵێت وەک لیژنەی ناوخۆ و ئاسایش سەرنج هەن هەم لەسەر لێدوانەکان و هەمیش لەسەر بڕیاری وەزارەتی ناوخۆ لەسەر ئەم دۆسێیە.
لە میانەی وتووێژەکەیدا لەگەڵ بەڵێن ساڵح، بەڕێز عەبدوڵا باسیش لەوە دەکات کە بە تەلەفون پەیوەندی لەگەڵ ئەفسەر فەرامۆش کردووە و گلەیشی لێکردووە و دەشڵێت هەموومان دەزانین لە هەرێمی کوردستان گەندەڵی هەیە بەڵام پێویستە بە یاسا یەکلابکرێتەوە و ئاماژەش بەوە دەکات کە بەردەوام لە پەیوەندیدایە لەگەڵ وەزارەتی ناوخۆدا و باسیش لەوە کراوە کە بۆ ئەو لێدوانانەی ئەفسەر فەرامۆش دەبێت بگەڕێنەوە بۆ هۆکارەکانی بە تایبەتی لەو ڕوانگەیەوەی هێزەکانی ئاسایشی ناوخۆ دوو جار ستەمیان لێکراوە.
زانیاری زیاتر لە دەقی وتووێژەکەدایە:
