ئۆپەراسیۆنی ڕزگارکردنی موسڵ، ئۆپەراسیۆنێکی هەروا سادە نییە کە تەنها لە ڕەهەندی لەشکرییەوە خوێندنەوەی بۆ بکرێت و هەڵسەنگاندن بۆ ئەگەر و نەگەرەکانی سەرکەوتن لەم ئۆپەراسیۆنەی دژی ڕێکخراوە تێرۆریستییەکەی دەوڵەتی ئیسلامی بکرێت.
دەرکردنی تێرۆریستانی دەوڵەتە خەلافەتیەکەی ئەبو بەکر ئەلبە‌غدادی لە موسڵ و ناوچەکانی دەوروبەری دەشێت وەک بەرەنجامێکی گرنگی ئەم ئۆپەراسیۆنە سەیر بکرێت، بەڵام لەوەش گرنگتر ئەوەیە چۆن دەتوانرێت ئەو جۆرە هزرەی داعش و هاوشێوەکانی داعش دروست دەکات لەناو ببرێت. خۆ ئەگەر ئەو هزرە لەناو نەبرێت یانی ڕەخساندنی زەمینە بۆ گەڕانەوەی داعش بە ناوێکی تر و بە فۆرمێکی ترەوە.
بەهۆی ڕەهەندە جیاوازەکانی ئەم ئۆپەراسیۆنەی موسڵ هەم لەسەر ئاستی ناوخۆی عێراق و هەمیش لەسەر ئاستی دیدوبۆچوونی وڵاتانی ناوچەکە لەسەر ڕەوشەکە پێناچێت بنەبڕکردنی ئەو هزری توندڕەویە بۆ هێزەکانی بەرەنگاربوونەوەی دەوڵەتی ئیسلامی کارێکی سانا بێت.
میوانی بەرنامە:
عەتا قەرەدا‌غی؛ نوسەر و لێکۆڵەر
لە ناوخۆی عێراقدا لەشکری وڵاتەکە و هێزی پێشمەرگەی کوردستان و حەشدی شەعبی شیعەکان و حەشدی نیشتمانی سوننەکان و ژمارەیەک هێزی چەکداری تریش بەشدارن لەم ئۆپەراسیۆنەدا. پێدەچێت ئەم هێزانە تەنها لە ئاڕاستەی چەکەکانیاندا بەرامبەر دوژمنە هاوبەشەکەیان (داعش) تەبا بن، بەڵام جیاوازی بەرنامەکانیان بۆ ئایندەی موسڵ ڕوون و ئاشکرایە.
بوونی یەکە چەکدارەکانی حەشدی شەعبی و هێزە سوننەکانی حەشدی نیشتمانی یەکێکە لە نیگەرانییە سەرەکییەکان لە ڕوانگەی ئاینزایی و ئەو ئەگەرانەی بۆ شەڕێکی تری ئاینزایی لە عێراقدا هەن. ئەمە بێ لەوەی بوونی ئەم دوو هێزە لە سنورێکی دیاریکراوی جوگرافیدا بەشێکە لە نەخشەڕێژیی وڵاتانی ناوچەکە (ئێران و تورکیا) بۆ جێگیرکردنی بەرژەوەندیەکانیان. تورکیا ناخوازێت هێزە شیعەکان لەسەر سنوری وڵاتەکەی بن و ئێرانیش دەیەوێت سنوری سوریای بۆ پارێزراوبێت لە ناو عێراقەوە.
بەشێکی تری نیگەرانییەکان ئەگەری سەرهەڵدانی قەیرانی نەژادییە لەو ناوچانەی لەدەستی داعش دەسەندرێنەوە و بە تایبەتیش ئەوانەی بەندی 140 ی دەستوری عێراق دەیانگرێتەوە واتە ناوچە دابڕێندراوەکان.
لەگەڵ ئەوەشدا کە هێزی پێشمەرگەی کوردستان یەکێکە لە هێزە سەرەکییەکانی ئەم ئۆپەراسیۆنەی موسڵ بەڵام هێشتا هیچ متمانەیەک لە ئارادا نییە کە ئەو هێزانە بتوانن لە ئایندەدا لەو شوێنانەدا بمێننەوە کە ئازادیان دەکەن.
لە نێو شەقامی کوردیدا نیگەرانی هەیە ئەگەر ڕەوشەکە بەم شێوەیە بێت ئیدی بۆچی کورد بەشدار دەبێت لە شەڕێکدا کە هیچ دەستکەوتێکی سیاسی بۆ دەستەبەر ناکات؟!
سەبارەت بە ڕۆڵی وڵاتانی ناوچەکە (تورکیا و ئێران) بە تایبەتی، ناسر باباخانی، نوسەر و لێکۆڵەر لە وتووێژێکدا لە بەرنامەی (لەگەڵ ڕووداوەکاندا) ئاماژە بەوە دەکات ئەگەر بێتوو وڵاتی عیراق سەروەری مابێت هیچ وڵاتێک نەیاندەتوانی بەم شێوەیەی ئێستا لە ناو عێراقدا ڕەفتار بکەن.
ناسر باباخانی: پێم وەها نییە عێراق بتوانێت بەم زووانە لەسەر پێی خۆی ڕابوەستێت و پێگەیەکی بەرچاوی هەبێت لە ناو کۆمەڵگای نێونەتەوەییدا
یەکێک لە پرسیارە ڕژدەکانی تر ئەوەیە ئایا تێرۆریستانی داعش دەرفەتی ڕاکردنیان هەیە لە موسڵ و ناوچەکانی دەوروبەری و ئەگەر هاتوو ڕاشیان کرد، ئایا هەر تەنها روو لە شاری ڕەقە دەکەن لە ناو سوریادا؟
ئایا له‌ناوبردنی هێزێکی تێرۆریستی وه‌ک ده‌وڵه‌تی ئیسلامی کارێکی سه‌خته؟
ئایا ده‌کرێت وه‌ها سه‌یری ئۆپه‌راسیۆنی موسڵ بکرێت که کۆتایی داعش و سه‌ره‌تای سه‌رهه‌ڵدانی داعشێکی تره؟
ئایا ده‌رفه‌ت ده‌درێت تورکیا به‌شداری له‌م ئۆپه‌راسیۆنه‌ی ڕزگارکردنی موسڵدا بکات؟
ئایا هه‌ر ته‌نها سه‌رکه‌وتنی له‌شکری له موسڵدا ده‌بێته مایه‌ی سه‌قامگیری له‌و ناوچه‌یه‌دا؟
(عەتا قەرەدا‌غی) نوسەر و لێکۆڵەر لە بەرنامەی (لەگەڵ ڕووداوەکاندا) وەڵامی ئەم پرسیارانە و پرسیار و سەرنجەکانی ئێوەی ئازیزیش دەداتەوە.:
