بەهۆی شەڕەکانی داعشەوە ڕووبەرێکی فراوان لەناو شاری موسڵدا نەک هەر وێران بووە بەڵکو لەگەڵ زەویدا تەخت بووە.
ئاوارە گەڕاوەکان و ئەو خەڵکە سیڤیلیەش کە لەناو موسڵدا مابوونەوە داوای خزمەتگوزارییە بنچینەییەکان دەکەن و هەروەها متمانەشیان دەوێت تا دڵنیابن لەوەی جارێکی تریش ڕووبەڕووی ڕاوەدونان و ئاوارە بوون نابنەوە و ژیانیشیان پارێزراو دەبێت.
عیزەت شابەندەر سیاسەتمەدارێکی دێرینی سەربەخۆی عێراقیە و (پێشتر ئەندامی دەوڵەتی یاسا بووە)دەڵێت بە گومانە لەوەی حکومەتی عێراق بتوانێت ئەو داوایانەی خەڵک بەجێبگەیەنێت چونکە وەک دەڵێت "تواناییەکانی حکومەت لە تواناییەکانی وڵاتی عێراق خۆیەوەتی و عێراقیش لە قەیرانی ڕاستەقینەدایە کە باری ئابوری و ڕەوشی سیاسی و ئاستی سەقامگیری دەگرێتەوە و بێ لەوانەش دۆسێی ئاڵۆزی هاوڕایی لە نێو لایەنە سیاسییەکانی وڵاتەکەدا بە ئاڕاستەی بونیاتنانی نیشتمان و دەوڵەتیشدا بەشێکی تری گرفتەکەیە."
شابەندەر لەوبڕوایەدایە حکومەتەکەی حەیدەر ئەلعەبادی بەبێ یارمەتی و کۆمەکی کۆمەڵگەی نێونەتەوەیی ناتوانێت هیچ هەنگاوێک بە ئاڕاستەی ئاوەدانکردنەوە و سەقامگیریدا بنێت.
عیزەت شابەندەر دەڵێت دەبێت دان بەوەدا بنرێت سەرکردایەتی سیاسی عێراق و بە تایبەتیش ڕیزی یەکەمی سیاسییەکانی عێراق بە کورد و شیعە و سوننەوە سەرکردایەتییەکە لە سوربوون و هەڵوێست داماڵدراون و بە تایبەتیش هەڵوێستی نیشتمانی.
لە ئێستادا نیگەرانییەکی تر لەو ناوچانەدا سەریان هەڵداوە کە لەم ماوەیەی ڕابردوودا لە دەستی داعش ڕزگارکراون، بە تایبەتیش لە شاری موسڵ و ناوچەکانی دەوروبەری، ئەویش ئەگەر و نەگەری مانەوەی هێزەکانی حەشدی شەعبی شیعەکانن لەو ناوچانە.
شابەندەر دەڵێت ئەگەر و نەگەری کشانەوە بڕیارێکە پەیوەندی بە سەرکردایەتی حەشدی شەعبیەوە هەیە و کەوتۆتە سەر ئەوەی سەرکردەکانی حەشدی شەعبی چەندێک نیشتمانین و چەندێک دەخوازن بڕیارێکی نیشتمانیانە بدەن لە پێناو ئاسودەیی خەڵکی موسڵ و ناوچەکانی دەوروبەریدا و دەشڵێت " دانیشتوانی موسڵ مافی خۆیانە ترس و نیگەرانییان هەبێت بەهۆی هەندێک لە ڕەفتارەکانی چەند هێزێکی حەشدی شەعبییەوە کە پێشتر و لە کاتی شەڕەکاندا کردونی."
لەسەر بنچینەی وتووێژەکەی لەگەڵ عیزەت شابەندەر، سیاسەتمەداری دێرین و سەربەخۆی عێراقی، بەڵێن ساڵح ڕاپۆرتێکی ئامادەکردووە.
زانیاری زیاتر لە دەقی ڕاپۆرتەکەدایە:
