لەگەڵ ئەوەشدا کە نزیکەی دوو مانگە هەڵبژاردنەکانی هەرێمی کوردستان کراون بەڵام تا ئێستاشی لەگەڵدابێت کابینەی نوێ پێکنەهێنراوە.
وەک چۆن ناکۆکییە ناوخۆییەکان کاریگەرییان هەیە لەسەر ئەگەر و نەگەرەکانی پێکهێنانی ئەو کابینەیە، ئاوەهاش وڵاتانی تری وەک تورکیا و ئێران دەستێوەەردان و کاریگەریشیان هەیە لەسەر هەرێمی کوردستانی عێراق.
دەستێوەردانی وڵاتانی ڕۆژهەڵاتی ناوەڕاست لە کاروباری یەکتردا مێژوویەکی دوور و درێژی هەیە و هەمیشەش لۆمەی شکستە سیاسییەکانیان لە ئەستۆی یەکتر ناوە.
لەگەڵ قوڵبوونەوەی زیاتری کێشە و ئاڵۆزییەکانی ڕۆژهەڵاتی ناوەڕاستدا زۆر جار داوا لە کورد کراوە هەرچەندێک دەتوانێت خۆی نەکات بە بەشێک لەو کێشانە و هەروەهاش خۆی دوورەپەرێز بگرێت لە جەمسەرە سەرەکییەکانی ئەو ئاڵۆزیانە.
میوانی بەرنامە:
دکتۆر مارف عومەر گوڵ، لە زانکۆی کەرکوک
لەوەتای ڕاپەڕینەکەی ساڵی 1991 ی کورد لە عێراقدا تورکیا و ئێران بەردەوام ئامادەییان هەبووە لە ژیانی سیاسی هەرێمی کوردستاندا و کاریگەریشیان هەبووە لە بڕیارە سیاسییەکاندا.
ئەوەی نکوڵی لێناکرێت دوو زلهێزەکەی هەرێمی کوردستان هەر یەکەیان بەپێی سیاسەتی خۆی زەمینەیان بۆ ئەو ڕۆڵ و کاریگەریانەی تاران و ئانکەرە ڕەخساندووە.
پارتی دیموکراتی کوردستان (پدک) لە یەکێتی نیشتمانی کوردستان (ینک) زیاتر نزیکە لە تورکیا و بە هەمان شێوەش ینک لە ئێرانەوە نزیکترە وەک لە پدک.
هەتا ئێستا هیچ لێکۆڵینەوەیەکی ورد و بابەتیانە نییە لەسەر شێوازی ڕایەڵەی ئەو پەیوەندیانە کە لە سادەترین پێناسەیدا پێویستە لەسەر بنچینەی پاراستن و ڕێزگرتن لە بەرژەوەندییە هاوبەشەکان بن. ئەوەی لەسەر ئەم پەیوەندیانە لەبەردەستن تەنها گوتاری ئەو دوو لایەنەن و هەندێک جاریش قسەکردن لەسەریان لە چوارچێوەی ئەو گوتارانە دەرنەچوون.
هەرێمی کوردستانی عێراق لەبەردەم پێکهێنانی کابینەی نۆدایە و پرسیارگەلێکی زۆر هاتوونەتە ئاراوە لەسەر ڕۆڵ و کاریگەرییەکانی ئەو دوو وڵاتە لەسەر ئایندەی هەرێم، کە بەگشتی دەکرێت بگوترێت هیچ یەکێکیان نەیانتوانیوە متمانەی شەقام بەدەست بێنن بەڵام لە ڕێی پدک و ینک توانیویانە ئامادەییەکی تۆکمەیان هەبێت لە ئێستا و ئایندەی هەرێمیشدا.
ئایا تورکیا و ئێران چەندێک ڕۆڵ و کاریگەرییان دەبێت لە پێکهێنانی حکومەتی نوێی هەرێمی کوردستاندا؟
ئایا دەسەڵاتدارانی هەرێمی کوردستان دەتوانن هاوسەنگی لە نێوان تاران و ئانکەرەدا بپارێزن؟
دکتۆر مارف عومەر گوڵ، پسپۆڕی یاسایی لە زانکۆی کەرکوک لە بەرنامەی ئەم هەفتەیەی لەگەڵ ڕووداوەکاندا وەڵامی ئەم پرسیارانە و پرسیار و سەرنجەکانی ئێوەی ئازیزیش دەداتەوە:
