نوسەری کتێبی پاکیزەکانی شەنگال محەمەد ڕەئوف باس لە ناوەڕۆکی کتێبی پاکیزەکانی شەنگال دەکات و دەڵێت ئەو کارەساتە تراژیدیایەی لەسەر دەستی چەکدارانی داعش ڕووبەڕووی کچانی ئێزیدی و ئێزیدیەکان بویەوە لە فرۆشتن و دەستدرێژی سێکسی و پاشانیش کوشتنی دایک و باوک و براکانیان، پێویستی بە تۆمارکردنە، پێویستی بە داستان و چیرۆک و ڕۆمان و شانۆ و مۆسیقایە، پێویستی بە هەموو پڕۆسەکانە کە ئەم تاوانە بنوسرێتەوە و تۆمار بکرێت، هەروەها دەڵێت " ئەم کتێبە باسێکی مێژووی ئێزیدیەکانە کە تا ئێستا 74 جار ڕووبەڕووی جینۆساید بونەتەوە."
دوای تێپەڕبونی 6 ساڵ بەسەر کارەساتە جەرگبڕەکەی شەنگال وهێرەشەکانی چەکدارانی داعش بۆ سەر کوردانی ئێزیدی کەتیایدا چەندان لە ژنان وکچانی پاکیزەی ئێزیدی بە ناچاری کران بە کۆیلەی چەکدارانی داعش و تا ئێستاش بەشێکی زۆریان چارەنوسیان نادیارە، کتێبی پاکیزەکانی شەنگال لە نوسینی نوسەرو ڕۆژنامەوان محەمەد ڕەئوف وەک یادێک بۆ ئەم ڕۆژە لەبیرنەکراوە و لە یادی شەشەمین ساڵی ئەم کۆمەڵکوژەیەدا لە 3 ی مانگی 8 بڵاوکرایەوە.
بۆ باسێکی ڕژد سەبارەت کتێنی پاکیزەکانی شەنگال بەشی کوردی دەنگی ئەمەریکا گفتوگۆ لەگەڵ نوسەری کتێبەکەدا دەکات.
نوسەر دەڵێت "ئەم کتێبە لێکۆڵینەوەیەکی بەراودکاریە لەنێوان کچانی ئەنفال و کچانی ئێزیدیدا کە لە زۆر فۆڕمەوە لەیەکچونێک هەیە لەنێوانیاندا، هەر لە پرۆسەی دەستگیرکردن و جیاکردنەوەیان لە کەسوکاریان تا دەستدرێژیکردنە سەریان بە کۆیلەکردنیان، گرنگی نوسینەوەی ئەم کتێبە لەوەدایە کە بەشێک لە کۆمەڵکوژیەکانی کورد کە دووبارە دەبنەوە و هاوشێوەی یەکن ئەو تاوانانە بەیکەوە ببەستینەوە جینۆسایدی کچانی ئێزیدی لەم کتێبەدا بەستراوەتەوە بە جینۆسایدی کچانی ئەنفال."
دەشڵێت "تا ئێستاش کچانی ئێزیدی و پیاوانی ئێزیدی و ئێزیدیەکان مەترسیەکانیان نەڕەویوەتەوە دوێنی چەکدارانی داعش و پێرێ عوسمانیەکان و کۆنتر میرنشینە کوردیەکان بون، ڕەنگە لە داهاتودا لەسەر دەستی چینێکی دیکە ڕوەبەڕەوی جینۆساید ببنەوە، بۆیە پێویستە هەموو هەوڵەکان ئەوە بێت ئەمە بە جینۆساید بناسێنرێت."
