ئەمڕۆ شەممە، سەنتەری میترۆ بۆ داکۆکی لە مافی ڕۆژنامەنووسان ئاماری ساڵی ٢٠٢٠ی خۆی لە میانەی چالاکییەکدا بڵاوکردەوە کە تێیدا کۆی پێشێلکارییەکان بەرامبەر بە ڕۆژنامەنووسان و دەزگاکانی ڕاگەیاندن لەلایەن دەسەڵات و هێزە ئەمنییەکانەوە تۆمارکراون. لە چالاکییەکدا بەشێک لە کاربەدەستان و ڕۆشنبیران و ڕۆژنامەنووسان ئامادەبوون و بۆچوونەکانیان لە مەڕ ئەو پرسە خستەڕوو.
بەپێی ڕاپۆرتی ساڵی ٢٠٢٠ی سەنتەری میترۆ کە لەلایەن ئاڤان جاف، سەرنووسەری گۆڤاری ژنەوە خوێندرایەوە، لە هەرێمی کوردستاندا ٣٨٥ پێشێلکاری بەرامبەر ٢٩١ ڕۆژنامەنووس و دەزگای ڕاگەیاندن لە هەرێمی کوردستاندا ئەنجامدراون.
لە ناو ئەم پێشێلکارییانەشدا، "٦٣ ڕێگری، ٧٤ دەستبەسەرکردن بە بێ بڕیاری دادگا، ٤٨ هەڕەشە و لێدان و سووکایەتی، ٤٢ زەوتکردنی کەلوپەلی ڕۆژنامەوانی، ٨ حاڵەتی هەراسانکردنی کچانی میدیاکار، ٣٠ دەستگیرکردن و ڕاگرتن بەدەر لە یاسای کاری ڕۆژنامەنەوانی، ٨ بەڵێننامەی پڕکردنەوە، ٦ شکاندنی کەلوپەلی ڕۆژنامەوانی، ٤ داخستنی ئۆفیسی کەناڵ و دوو هێرش و تەشویشی ئەلیکترۆنی"یان لە خۆگرتبوو.
لە ساڵی ٢٠٢٠دا لە سەرانسەری عێراقدا و هاوشانی هەرێمی کوردستان پێشێلکاری دژ بە ڕۆژنامەنووسان ئەنجامدراون و بۆ ڕاپۆرتی ئەمجارەیان، سەنتەری میترۆ بەشێک لە پێشێلکارییەکانیان تۆمارکردووە.
"١٢٠ پێشێلکاری بەرامبەر ٨٣ ڕۆژنامەنووس و دەزگای ڕاگەیاندن، ٧١ ڕێگری، ٣٠ دەستبەسەرکردن و ڕاگرتن بەبێ بڕیاری دادگا، ٩ زەوتکردنی کەلوپەلی ڕۆژنامەوانی، ٧ هێرش و لێدان و سووکایەتی، ٢ پڕکردنەوەی بەڵێننامە و ١ ڕفاندن."
لای خۆیەوە دیاری محەمەد، بەڕێوەبەری سەنتەری میترۆ وتارێکی پێشکەش کرد و تیشکی خستە سەر ئەوەی پێشێلکارییەکان دژ بە ڕۆژنامەنووسان لە فۆرمی جیاوازدا خۆیان دەبیننەوە هەتا دەگاتە کڕینەوە و دەستگرتن بەسەر میدیاکان و درووستکردنی میدیای سێبەر لەلایەن دەسەڵاتەوە.
لە ماوەی ڕابردوودا و بەتایبەت لەسەروبەندی هاتنی ڤایرۆسی کۆرۆنا، خۆپیشاندانەکان دژ بە حکومەت و تێکچوونی سەقامگیری سیاسیی لە هەرێمی کوردستاندا، پێشێلکارییەکان دژ بە ڕۆژنامەنووسان و چالاکوانان ڕوویان لە زیادبوون کرد و چەندین ناوەندی نێودەوڵەتی لە ڕاپۆرتی جیاجیادا نیگەرانییەکانیان لە مەڕ ئەو پرسە بە حکومەتی هەرێمی کوردستان گەیاند.
