پاش 10 ساڵ تێپەڕبوون بەسەر شەڕی سوریادا، داوا لە کۆمەڵگەی نێونەتەوەیی دەکرێت بۆ خێراکردن لە دابین کردنی بڕی چەندان ملیار دۆلار بۆ یارمەتی و کۆمەکی مرۆیی.
پێنجەمین کۆنفرانسی برۆکسل لەسەر سوریا لەڕێی ڤیدیۆییەوە دەکرێت بەهۆی خۆپارێزییەوە لە پەتای کۆرۆنا، لە کاتێکدا دابینکردنی پێداویستییەکان بۆ پەنابەران و خەڵکی سوریا بە هەنگاوێکی پێویست دادەنرێت.
دەزگاکانی کۆمەک و یارمەتیدانی سەر بە نەتەوە یەکگرتووەکان لە ڕاگەیەندراوێکدا بۆ میدیاکان دەڵێن "لەگەڵ زیادبوونی کاریگەرییەکانی پەتای کۆرۆنادا سەروەختێکی پشوو و ئارامی بۆ گەلی سوریا نەهاتۆتە ئاراوە."
ئەم ڕاگەیەندراوەی دەزگاکانی سەر بە نەتەوە یەکگرتووەکان بەر لە کۆبوونەوەی ئەمڕۆ دووشەممەی وڵاتانی خێرخوا بڵاوکراوەتەوە.
لە ڕاگەیەندراوەکەدا هاتووە "سوریاییەکان هەروادێ و زیاتر ڕووبەڕووی برسێتی و هەژاری دەبنەوە و ئاوارەبوون و هێرشەکانیش بەردەوامن لەسەریان."
دەزگاکانی کۆمەک و یارمەتیدانی سەر بە یو ئێن، ئاگاهیشیان داوە کە 24 ملیۆن سوریایی لەناو وڵاتەکە و لە وڵاتانی دراوسێشیدا لە مەترسیدان، وەک لە ڕاگەیاندنەکەدا هاتووە "ڕەوشی خراپی ژیان و گوزەرانی چوار ملیۆن کەس زیادی کردووە بە بەراورد لەگەڵ ساڵی 2020دا و ئەم ژمارەیەش هەرگیز ئەوەندە زیاد نەبووە لەوەتای قەیرانی سوریا دەستیپێکردووە."
نوێنەرانی زیاتر لە 50 وڵات و 30 ڕێکخراو و ڕێکخراوی ناحکومی و نێوەندی خێرخوایی و دامەزراوە نێونەتەوەییەکانی دارایی بەشداری لەم کۆنفرانسەدا دەکەن.
ئامانجی کۆنفرانسەکەش کۆکردنەوەی 10 ملیار دۆلارە و لەو بڕە پارەیەش چوار ملیار و دووسەد ملیۆن دۆلار بۆ دابین کردنی پێداویستییە مرۆییەکانە لەناو سوریادا و ئەوەیشی کە دەمێنێتەوە بۆ داڵدەدانی پەنابەرانی سوریاییە لە ناوچەکەدا.
ئەم بڕە پارەیەش وەک یارمەتییەکە بۆ لوبنان و شانشینی ئوردون و تورکیا و عێراق و هەروەها میسر، کە ناچاربوون داڵدەی بە ملیۆنان پەنابەری سوریایی بدەن وێڕای کێشە و گرفتەکانی هەر یەکێک لەو وڵاتانە هەیانە.
لە کۆنفرانسی پێشوودا کە لە مانگی 6ی ڕابردوودا کرا، توانرا بڕی پێنج ملیار و پێنجسەد ملیۆن دۆلار کۆبکرێتەوە، بەپێی زانیارییەکانی یو ئێن.
27 وڵاتە ئەندامەکەی یەکێتی ئەوروپا دوو لەسەر سێی ئەو کۆمەک کردنانەیان دابین کردووە.
یەکێتی ئەوروپا نیگەرانی هەیە لەوەی شکستهێنان لە تەرخانکردنی کۆمەک و یارمەتی بۆ پەنابەران لە ڕۆژهەلاتی ناوەڕاست وەها دەکات ئەو پەنابەرانە ڕوو لە ئەوروپا بکەن.
لە قەیرانی سوریادا زیاتر لە 388 هەزار کەس کوژراون و بە ملیۆنان خەڵکیش ئاوارەبوون لەوەتای سەرکوتکردنە خوێناوی و دڕندانەکەی ڕژێمی سوریا لە ساڵی 2011دا کردی بەرامبەر خۆپیشاندەرانی دژە حکومەت.