وەزیری دەرەوەی ئەمەریکا لە وڵاتی دانیمارکە بۆ وتووێژکردن لەسەر دۆسێکانی تایبەت بە گۆڕانی کەش و هەوا و سیاسەتی جەمسەرە بەستەڵەکەکان و هەروەها ڕوسیا.
ئەم سەردانەش هاوکاتە لەگەڵ هەروادێ و زۆربوونی داواکان لە بەڕێوبەرایەتییەکەی سەرۆک جۆو بایدن تا هەڵوێستێکی توندتر و کاریگەرتر بگرێتەبەر لەسەر پەرەسەندنی زیاتری توندوتیژی نێوان ئیسرائیلی و فەلەستینییەکان.
ئەنتۆنی بلینکن، وەزیری دەرەوەی ئەمەریکا لە کۆپینهاگن لەگەڵ ڕێبەرانی دانیمارک و هەروەهاش لەگەڵ گەورە کاربەدەستانی گرینلاند و دوڕگەکانی فیرۆ کۆدەبێتەوە بەرلەوەی بڕوات بۆ ئایسلاند و بەشداریکردن لە کۆبوونەوەی ئەنجومەنی جەمسەرە بەستەڵەکەکان. لەو کۆبوونەوەیەشدا بۆ یەکەمین جار ڕووبەڕوو لەگەڵ سێرگیێ لاڤرۆڤ، وەزیری دەرەوەی ڕوسیادا کۆدەبێتەوە، لە کاتێکدا پشێوییەکانی نێوان واشنتۆن و مۆسکۆ هەروادێ و گەرمتر دەبن.
ڕوسیا ڕۆژی یەکشەممە داوای کۆبوونەوەیەکی دەستبەجێی چوار لایەنەکەی کۆمەڵەی ئاشتی ڕۆژهەڵاتی ناوەڕاستی کرد بۆ تاووتوێکردنی زیاتر بوونی قەیرانی نێوان ئیسرائیلی و فەلەستینییەکان، بەڵام هیچ بەڵگەیەکی ئاشکرا نییە کە ئەمەریکا قایل دەبێت و هەروەها هیچ ئاماژەیەکیش "هەر هیچ نەبێت تا ئێستا" لە ئارادا نییە کە وەزیری دەرەوەی ئەمەریکاش پلانی ئەم سەردانەی خۆی بگۆڕێت.
کۆمەڵەی ئاشتی ڕۆژهەڵاتی ناوەڕاست لە نوێنەرانی ئەمەریکا و ڕوسیا و یەکێتی ئەوروپا و نەتەوە یەکگرتووەکان پێکهاتووە. بلینکن و لاڤرۆڤ بەشداری لە کۆبوونەوەکەی ئایسلانددا دەکەن و دەشێت ئەو کۆبوونەوەیەش ببێتە زەمینەیەک بۆ کۆبوونەوەی ئەو چوار لایەنە.
ئەنجومەنی ئاسایشی نەتەوە یەکگرتووەکان، کۆبوونەوەیەکی نائاسایی کرد لەسەر ڕەوشی ڕۆژهەڵاتی ناوەڕاست. لەو کۆبوونەوەیەی ڕۆژی یەکشەممەدا لیندا تۆماس، باڵیۆزی ئەمەریکا بۆ یو ئێن ڕایگەیاند "بەڕێوبەرایەتی ئەمەریکا ماندونەناسانە کار دەکات لە ڕێی کەناڵە دیپلۆماسییەکانەوە بۆ ڕاگرتنی شەڕەکانی ڕۆژهەڵاتی ناوەڕاست."
سەرۆک جۆو بایدن ڕۆژی شەممە بە تەلەفون قسەی کردووە لەگەڵ بەنجامین نەتەنیاهۆ، سەرەک وەزیری ئیسرائیل و هەروەها لەگەڵ مەحمود عەباس، سەرۆکی دەسەڵاتی فەلەستینییەکاندا. وەزیری دەرەوەی ئەمەریکاش لە ڕۆژی یەکشەممەوە لە فڕۆکەکەیدا لە ڕێدا بەرەو دانیمارک لەگەڵ ژمارەیەک لە هاوشانەکانی خۆیدا پەیوەندی تەلەفونی کردووە و ئێستاش گەورە دیپلۆماتێکی ئەمەریکا لە ئیسرائیلە و لە کۆبوونەوەدایە لەگەڵ لایەنەکاندا.