وڵاتی عێراق لە نێو ڕێکخراوە نێونەتەوەییەکاندا بە یەکێک لەو وڵاتانە ناسراوە کە گەندەڵی گەورەی تیادا دەکرێت، وەک گەندەڵی سیاسی و دارایی و بەڕێوەبردن و جۆرەکانی تری گەندەڵی.
دەشێت شکستەکانیش لە دۆسێی بەرەنگاربوونەوەی گەندەڵیدا، وەهایان کردبێت ناجێگیریی سیاسی لەو وڵاتەدا بێتە ئاراوە و هەموو هەوڵێکیش بۆ ڕێگەگرتن لە گەندەڵییەکان ڕووبەڕووی دیوارە ڕەقەکەی بەرژەوەندی سیاسی بووبێتەوە.
تاریق حەرب، پسپۆڕی یاسایی؛
*ئەو پارانەی لەم چەند ساڵەی ڕابردوودا براونەتە وڵاتانی تر و سپی کراونەتەوە لە ڕێی کڕینی باڵەخانە و کۆمپانیا و بەشداریکردن لە بازرگانییەکاندا بە چەندان ملیار دۆلار مەزەندە دەکرێت.
*گەندەڵی بەڕێوەبردن و دارایی لە عێراقدا بەشی هەرە زۆری داهاتی ساڵانەی وڵاتەکەیان خواردووە.
*دەسەڵاتی دادوەریی عێراق بۆ دادگایی کردنی کاربەدەستە گەورەکانی لە گەندەڵییەوە تێوەگلاون، پشت دەبەستێت بەو بەڵگەنامانەی لە بەڕێوبەرایەتی وڵاتەوە پێیان دەگات.
*لە عێراقدا گەندەڵکارە بچوکەکان دادگایی دەکرێن، بەڵام هێشتا ماوە گەندەڵکارانی داهاتی عێراق تاڵان دەکەن بدرێنە دادگا.
*لیژنەی دەستپاکی لە توانایدا نییە هەموو شتێک بکات، چونکە بەشێکی گەندەڵی عێراق بریتییە لە گەندەڵیی سیاسی.
*هیوایەکی زۆر بەستراوەتەوە بە نوێنەرانی نوێ لە پەرلەماندا بۆ گۆڕانکاری گەورە و هەڵوێست وەرگرتن لە بەرامبەر گەندەڵیدا.
میدیا لە عێراق و میدیاکانیش لە دەرەوەی عێراق زۆر ڕاپۆرت و بابەتیان بڵاوکردۆتەوە لەسەر گەندەڵییەکان و سپیکردنەوەی پارەی گەندەڵکاران لە وڵاتانی تردا. تاریق حەرب، پسپۆڕی یاسایی دەڵێت کاتێک تورکیا یان شانشینی ئوردون ڕاگەیەندراوێک بڵاودەکاتەوە و تیایاندا ئاماژە بەوە دەکەن "سودمەندی یەکەم لە کڕین و فرۆشتنی باڵەخانەکاندا عێراقییەکانن" ئەوا دۆسێکە لە گەندەڵییەوە دەگۆڕدرێت بۆ دۆسێیەکی سیاسی و بەکارهێنانی سیاسەت لەلایەن گەندەڵکارانەوە.
لەسەر بنچینەی وتووێژەکەی لەگەڵ تاریق حەرب، پسپۆڕی یاسایی، بەڵێن ساڵح ڕاپۆرتێکی ئامادەکردووە.
