هێزه‌کانی پێشمه‌رگه گۆڕێکی به‌کۆمه‌ڵیان له ناوچه‌ی غه‌ڕه‌وپه‌ڵکانه‌ی نێوان قه‌زای خورماتووی پارێزگای سه‌ڵاحه‌دین و ناوچه‌ی گه‌رمیان دۆزیه‌وه، گومان ده‌کرێت قوربانیه‌کانی نێوی ئه‌و سه‌ربازه عێراقیانه بن، که 3 ساڵ له‌مه‌وبه‌ر له‌نزیک خورماتوو ڕفێنرا.
تا ئێستا ڕووفاتی 11 که‌س له‌نێو گۆڕه به‌کۆمه‌ڵه‌که ده‌رهێنراوه و چاوه‌ڕوان ده‌کرێت ژماره‌که زیاتریش بێت، به‌و پێیه‌ی تیمه‌کانی هه‌ڵدانه‌وه‌ی گۆڕی به‌کۆمه‌ڵ سه‌رقاڵی پشکنینی وردتری سنوره‌که‌ن.
لیوا محه‌مه‌د ڕۆسته‌م جێگری فه‌رمانده‌ی میحوه‌ری قه‌ره‌ته‌په-حه‌مرین ی پێشمه‌رگه، به‌ده‌نگی ئه‌مه‌ریکای وت"تائێستا 11 ڕووفاتمان دۆزیووه‌ته‌وه له گۆڕێکی به‌کۆمه‌ڵکدا له‌ناوچه‌ی غه‌ڕه‌وپه‌ڵکانه."
له ساڵی 2018 چه‌کدارانی داعش له نزیک پردی سه‌رحه‌د له‌سه‌ر ڕێگای نێوان خورماتوو-به‌غدا 12 سه‌ربازی عێراقیان ڕفاند و له‌وکاته‌وه چاره‌نوسیان نادیاره، له‌وباره‌یه‌وه لیوا محه‌مه‌د وتی"ڤیدیۆی 12 پۆلیسه ڕفێنراوه‌که‌ی عێراقمان لایه، گومان ده‌که‌ین ئه‌وانه‌ی له‌نێو گۆڕه‌که‌دان، به‌شێکیان ئه‌و پۆلیسانه بن و خه‌ڵکی تریشیان تێدابێت، که چاڵێکی گه‌وره‌یان بۆ هه‌ڵکه‌ندوون و هه‌موویان گوله‌بارانکردوون."
له‌و ناوچه‌یه‌ی گۆڕه به‌کۆمه‌ڵه‌که‌ی تێدا دۆزراوه‌ته‌وه له غه‌ڕه‌و په‌ڵکانه، ده‌ستگیرکراوه به‌سه‌ر چه‌ندین گرتووخانه و حه‌شارگه‌ی داعشدا، سه‌رجه‌م حه‌شارگه و گرتووخانه‌کان له‌نێو تونێل و ئه‌شکه‌وتدا دروستکراون.
لیوا محه‌مه‌د گومانی خۆی نیشاندا ناوچه‌که گۆڕی به‌کۆمه‌ڵ و گرتووخانه‌ی زیاتری تێدابێت، وتی"داعش له‌هه‌موو شوێنێک خه‌ڵکی کوشتووه، 5 ساڵه له غه‌ڕه‌وپه‌ڵکانه خه‌ڵک ده‌کوژن."
ئۆپه‌راسیۆنی هێزه‌کانی پێشمه‌رگه له‌ناوچه‌ی غه‌ڕه‌وپه‌ڵکانه بۆ تێکدانی حه‌شارگه‌کانی داعش به‌رده‌وامه، ئه‌و ناوچه‌یه ماوه‌ی 5 ساڵه پێگه‌ی سه‌ره‌کی داعشه و به‌رده‌وام سه‌رووی 40 چه‌کداری تێدابووه، گومان ده‌کرێت چه‌کداره‌کان به‌ره‌و ناوچه‌ی زه‌رگه‌ی ڕۆژاوای خورماتوو ڕۆیشتبن.
دەنگی ئەمەریکا بەدواداچوونی زیاتر لەسەر بابەتی ئەم گۆڕە بەکۆمەڵە دەکات.
