دوای ئەوەی کەمپینێکی سێ ڕۆژی بۆ کۆکردنەوەی هاوکاری مادی لە ژێر ناونیشانی وەفایەک لە هەڵەبجەوە بۆ هەولێر پێکهێنرا، کەمپینەکە کۆتایی بە کارەکانی خۆی هێنا و ئاماژەیان بەوەکرد توانیویانە 427 ملیۆن و 250 هەزار دینار کۆبکەنەوە، لە داهاتوویەکی نزیکدا میکانیزمی گەیاندنی هاوکاریە مادیەکەی هەڵەبجە بۆ زیانلێکەوتوانی لافاوەکەی هەولێر ڕادەگەیەنرێت.
عەبدولحەمید حەمە فەرەج یەکێک لە ئەندامانی دەستەی کۆکردنەوەی هاوکاریە مادیەکان لە کۆنگرەیەکی ڕۆژنامەوانیدا ڕایگەیاند" کەمپینەکە توانیوویەتی 427 ملیۆن و 250 هەزاردینارکۆبکاتەوە کە 400 ملیۆنی سەرمایەدارێکی هەڵەبجە بە کەمپینەکەی بەخشیووە".
عەبدولحەمید حەمە فەرەج لەسەر میکانیزمی گەیاندنی هاوکاریەمادیەکەی هەڵەبجە ڕایگەیاند " لیژنەکانیان سەرقاڵی ئەوەن بە جۆرێک هاوکاریەکە بگەیەنن کە لە بەرژەوەندی ئەو کەسانە بێت کە زەرەرمەند بوون و هەماهەنگیش لەگەڵ بەڕێوەبەرایەتی پارێزگای هەولێردەکەن " .
ئاری عەبدولەتیف لە لیژنەی ڕاگەیاندنی کەمپینەکە ڕایگەیاند" سوپاسی پشتیوانی دەزگا ڕاگەیاندنە ناو خۆیی و جیهانیەکان دەکەین کە ڕووماڵی کەمپینەکەیان کردین و ئەوان هۆکارێکی دیاربوون بۆ زیاتر فراوان کردنی هاوکاریەکانی کەمپینەکە ".
بەپێی زانیاریە ڕۆژنامەوانیەکان کە باس دەکرێن زیانی لافاوەکەی هەولێر بە 21 ملیار دینار خەمڵێنراوە، لە پارێزگای هەڵەبجە سێ کەمپینی دیکە هەن کە بەردەوامن لە کۆکردنەوەی هاوکاریەکان، بەپێی زانیاریەکانی دەنگی ئەمەریکا و بە وتەی خۆیان ئەوانیش توانیوویانە بڕێکی زۆر لە پارە و کۆمەک کۆبکەنەوە و لە داهاتوودا دەیگەیەنە زیانلێکەوتوانی لافاوەکەی شاری هەولێر.
