مەترسیەکانی بڵاوبوونەوەی تای خوێنبەربوون لە پارێزگای هەڵەبجە بەهۆی بوونی ژمارەیەکی زۆر ئاژەڵ و پیشەوەر کە کاری ئاژەڵداری وگۆشتفرۆشی دەکەن، ژوورێکی ئۆپەراسیۆن هاوبەش پێکهینرا و جل و بەرگ و پێداویستی بۆ ئاژەڵدارەکان دابینکرا، بە ئامانجی ڕێگریکردن لە بڵاوبوونەوەی نەخۆشیەکە، بەرپرسانی تەندروستی هەڵەبجە دەڵێن هەر پیشەوەرێک پابەندی ڕێنماییەکان نەبێت ڕووبەڕووی ڕێکاری یاسایی دەبێتەوە.
بە ئامانجی ڕێگریکردن لە بڵاوبوونەوەی هەر حاڵەتێکی تای خوێنبەربوونی ڤایرۆسی و بڵاوکردنەوەی هۆشیاری پێویست بۆ ئەو هاووڵاتیانەی کە پیشەیان گۆشتفرۆشی و کرێکاری کوشتارگە و خاوەن ئاژەڵن ژوورێکی نەشتەرگەری هاوبەش لە بەشێک لە لایەنە پەیوەندیدارەکانی هەڵەبجە و لەسەر پێشنیاری بەڕێوەبەرایەتی گشتی تەندروستی هەڵەبجە دروستکرا، لە یەکەم هەنگاویدا هۆشداری دەداتە ئەو هاووڵاتیانەی کە ڕۆژانە بەرکەوتنیان لەگەڵ ئاژەڵ و گۆشتی ئاژەڵاندا هەیە.
دکتۆر ئازاد مستەفا قادر بەڕێوەبەری گشتی تەندروستی هەڵەبجە لە لێدوانێکدا بە دەنگی ئەمەریکای ڕاگەیاند" لەناو هۆڵی بەڕێوەبەرایەتی گشتی تەندروستی هەڵەبجە سەرجەم گۆشتفرۆش و کرێکاری کوشتارگەکانمان کۆکردوونەتەوە و تای خوێنبەربوونمان بۆ ڕوونکردوونەتەوە و جل و بەرگ و دەستکێشی تایبەتمان بەسەردا دابەشکردوون، ئەگەر هەر پیشەوەرێکیان پابەند نەبێت ڕووبەڕووبەروی ڕێکاری یاسایی دەبێتەوە."
ئازاد تۆفیق پارێزگاری هەڵەبجە لە لێدوانێکی ڕۆژنامەوانیدا ڕایگەیاند " لە هەریەک لە قائیمقامیەت، تەندروستی، ڤێتێنەری، کشتوکاڵ، پۆلیس و ئاسایش ژوورێکی نەشتەرگەری درووست کراوە و داوا دەکەم لە هاووڵاتیان پابەندی ڕێنماییەکان بن وەک چۆن ڕووبەڕووی کۆڕۆنا بووینەوە بتوانین ڕووبەڕووی ئەم تای خوێنبەربوونەش ببینەوە."
لوقمان عەبدوڵا بەڕێوەبەری بەشی پتەوکردنی خۆپاراستنی تەندروستی هەڵەبجە لە لێدوانێکدا بە دەنگی ئەمەریکای ڕایگەیاند "هۆکاری سەرەکی گواستنەوە لە مێروویەکەوە لە کوردەواری پێی دەوترێت گەنە، گەر ئاژەڵەکە تووشبوو بوو ئەوا دەگوزارێتەوە بۆ مرۆڤ، پێویستە ئەو کەسانەی کە گۆشت بەکار دەهێنرێت لە ژێر ڕێنماییە تەندروستیەکان بە کاری بهێنن و ئاژەڵەکان پاک بکرێنەوە، ئەو کەسانەش کە مامەڵە لەگەڵ خوێن و گۆشتی ئاژەڵ دەکەنە جلوبەرگی تایبەتی بەکار بهێنن."
لەگەڵ ئەوەی لە ماوەی ڕابردوودا چەند حاڵەتێک لە عێراق بە گشتی تۆمارکراون، بەڵام بە گوتەی بەرپرسانی تەندروستی لە هەڵەبجە لە هەرێمی کوردستانش حاڵەت تۆمارکراوە، لە ڕێگەی ژووری نەشتەرگەرییەوە چەندین هەڵمەتی چاودێریکردن و پێدانی هۆشیاری لەلایەن لیژنەکانی تەندروستی و قائیمقامیەتەوە ئەنجام دراون.
