لە کاتێکدا عێراق ساڵیادی ڕاگەیاندنی شکستی دەوڵەتی ئیسلامی(داعش) ی کردەوە، بەڵام فەرماندە سەربازییەکان جەخت لەسەر بەردەوامی مەترسییەکانی ئەو ڕێکخراوە دەکەنەوە، ئاماژە بە هێرشە بەردەوامەکانی چەکدارانی سەر بەو ڕێکخراوە بۆ سەر هێزە ئەمنی و سەربازییەکان دەکەن.
حکومەتی عێراق لە کۆتایی ساڵی 2017دا، سەرکەوتنی خۆی بەسەر دەوڵەتی ئیسلامی ناوسراو بە داعش دا ڕاگەیاند، بەڵام دوای تێپەڕبوونی 5 ساڵ، هێرشی چەکدارانی ئەو ڕێکخراوە بۆ سەر سوپا و هێزە ئەمنییەکانی عێراق لە ناوچە سونەنیشینەکان بەردەوامە.
هاوکات لەگەڵ یادکردنەوەی شکستهێنانی داعش دا لە عێراق، زۆر جار لە پارێزگا سونەنیشینەکان و بە تایبەت لە شەوان دا، فڕۆکەی عێراقی بۆردومانی پێگەکانی داعش دەکات، لە کاتێکدا کە هەست بەجم و جۆڵیان بۆ هێرشکردنە سەر هێزە عێراقییەکان دەکرێت.
نازم کەهیە، ڕێکخەری پێشووی پەیوەندییەکانی نێوان پێشمەرگە و حەشدی شەعبی لە میحوەری کەرکوک، جەختی لەسەر جم و جۆڵی فراوانی داعش کردەوە، بە دەنگی ئەمەریکای ڕاگەیاند"چەند شەوێک لەمەوبەر، 15 چەکداری داعش لە ڕێگەی کامیرای حەرارییەوە بینراون لە ناوچەی بەشیری باشوری کەرکوک، کەسێک ڕۆیشتووەتە پێشوازییان، پاشان ڕۆیشتوونەتە نێو زۆنگاو و ناوچە سەختەکان."
ئەو وتیشی"ماوەی چەند ڕۆژێکە هێزە عێراقییەکان بەدوایاندا دەگەڕێن، تا ئێستا نەدۆزراونەتەوە."
لە ڕۆژی 29ی حوزەیرانی ساڵی 2014، داعش دامەزراندنی (خەلافەتی ئیسلامی) لە سوریا و عێراق ڕاگەیاند. کۆنترۆڵکردنی ناوچەیەکی فراوانی سوریا و عێراق لەلایەن ئەو ڕێکخراوەوە، بووە هۆی وێرانە بوونی سەدان ناوچە و ئاوارەبوونی هەزاران هاووڵاتی عێراقی و سوریایی، کە هێشتا ژمارەیەکی زۆریان نەگەڕاونەتەوە سەر ماڵ و حاڵیان.
سەرباری ئەوەی زۆربەی ناوچەکانی عێراق و سوریا لە ژێر کۆنترۆڵی داعش دەرهێنراون، بەڵام هێشتا چەکدارانی سەر بەو ڕێکخراوە، لە ناوچە شاخاوی و سەختەکانی ئەو دوو وڵاتەدا چالاکن، هیچ دەرفەتێک بۆ هێرشکردنە سەر هێزە دەوڵەتییەکان لەدەست نادەن.
بەرە بەیانی ڕۆژی 19 ی مانگی ڕابردوو، چەکدارانی داعش 4 سەربازی عێراقییان لە نێو سەنگەرەکانیان دا لە نزیک بارەگا سەرەکییەکانی سوپا لە ڕۆژهەڵاتی کەرکوک سەربڕی، دوای ئەو ڕووداوە، فەریق عەلی فرێجی فەرماندەی ئۆپەراسیۆنەکانی کەرکوک لە پۆستەکەی لابرا.
لیوا محەمەد رۆستەم، جێگری فەرماندەی میحوەری قەرەتەپە_حەمرین ی هێزی پێشمەرگە، بە دەنگی ئەمەریکای وت "داعش پێگە و ناوچەکانی لە دەستداوە کە پێشتر کۆنترۆڵی کردبوون، بەڵام هێشتا خەڵکانێک وەکو فیکر لەگەڵیاندان."
ئەو وتیشی "داعش چەکداریان هەیە، بەڵام هەرکات بمانەوێت ئۆپەراسیۆنیان لە دژ ئەنجام دەدەین، وەکو جاران ناتوانن بەرگری لە ناوچەکانیان بکەن."
بەپێی ڕاپۆرتێکی ئەنجومەنی ئاسایشی نێودەوڵەتی، کە لە مانگی 1 ی ئەمساڵ دا بڵاوکراوەتەوە، داعش توانای خۆی پاراستووە بۆ دەستپێکردنی هێرشەکان بە ڕێژەیەکی جێگیر لە عێراق، لەوانە ئەنجامدانی ئۆپەراسیۆنی لێدان و ڕاکردن، دانانی بۆسە، چاندنی بۆمب لەسەر ڕێگاکان، لەگەڵ چڕبوونەوەی چالاکییەکانی لە پارێزگاکانی کەرکوک، دیالە و سەڵاحەدین.
لە ڕاپۆرتەکەدا ئاماژە بەوەشکراوە، داعش سودی لە "دزەکردنی ئاسانی سنورەکان"ی نێوان عێراق و سوریا وەرگرتووە، سەرباری جێگیرکردنی 6 بۆ 10 هەزار چەکداری هەردوو وڵات لە سەر سنوری نێوانیان.
سەرچاوەیەکی ئەمنی بەرپرس لە قەزای خورماتووی پارێزگای سەڵاحەدین، ڕەتیکردەوە داعش کۆتایی هاتبێت، بە دەنگی ئەمەریکای راگەیاند "داعش لە هەموو ناوچەکان جوڵەیان هەیە، مەفرەزەکانیان بە ناوچەکاندا هاتووچۆ دەکەن، بەردەوام 25 چەکداریان لە دەوروبەری خورماتوو دەبینرێن."
بەپێی زانیارییە هەواڵگیرییەکان، کە لەڕێگەی فەرماندەکانی پێشمەرگەوە دەست دەنگی ئەمەریکا کەوتوون، هێشتا داعش توانای ئیدارەدانی چەکدارەکانی هەیە و ناو بە ناو ئاڵوگۆڕ بەسەرکردە سەربازییەکانی لە ناوچەکانی عێراق دەکات، ئەمە جگە لە ئەنجامدانی مەشقی سەربازی بە چەکدارەکانی لە سنوری شاخی حەمرینی نێوان پارێزگاکانی کەرکوک و سەڵاحەدین.
عەمید سەرحەد قادر، بەڕێوەبەری پێشووی پۆلیسی قەزاوناحیەکانی کەرکوک، بە دەنگی ئەمەریکای وت "داعش 15 ڕۆژە جوڵەی لە ناوچە سونییەکان زۆرە، ڕەنگە ئەمە پەیوەندی بە ناکۆکی نێو ماڵی سونەوە هەبێت و ئەوان بەدوای دەرفەتدا بگەڕێن."
جەختیشیکردەوە "داعش هەمیشە چاوەڕێی ئاڵۆزی سیاسییە لە عێراق، هەر ئاڵۆزی ڕووبدات، ئەوان دەیقۆزنەوە و هێرش دەست پێدەکەنەوە."
سەرباری جموجۆڵی چەکدارانی داعش لە ناوچە جیاجیاکانی عێراق، ناو بە ناو دەزگا ئەمنییەکانی عێراق ئۆپەراسیۆن بۆ دەستگیرکردنی شانە نوستووەکانی سەربەو ڕێکخراوە ئەنجام دەدەن، کە لە نێو شار و شارۆچکەکاندان و پەیوەندی نهێنییان بەو ڕێکخراوەوە ماوە.
