وتەبێژی کۆشکی سپی ڕایگەیاند، پێشبینی دەکرێت دوای بوومەلەرزەکە بەم نزیکانە جۆ بایدن سەرۆکی ئەمەریکا و ڕەجەب تەیب ئەردۆغان سەرۆک کۆماری ئەمەریکا کۆببنەوە.
کارین ژان پیێر لە کۆنگرەیەکی ڕۆژنامەوانیدا باسی لە هاوکارییەکانی ئەمەریکا کرد و گوتی " سەرۆک سەرۆک ڕێگەی داوە بە وەڵامدانەوەی دەستبەجێی ئەمەریکا جگە لەو کارمەندانەی ئەمەریکا کە ئێستا لەوێن."
ئەو گوتیشی " ئێمە لە پرۆسەی جێگیرکردنی تیمی زیاترداین بۆ پاڵپشتیکردنی هەوڵەکانی تورکیا بۆ گەڕان و ڕزگارکردن و چارەسەرکردنی پێداویستییەکانی ئەو کەسانەی بەهۆی بوومەلەرزەکەوە بریندار و ئاوارەبوون."
پێشتریش وەزیری درەوەی ئەمەریکا ئەنتۆنی بلینکن ڕایگەیاند " هاوکاری سەرەتاییمان بۆ تورکیای هاوپەیمانمان بەڕێگاوەیە، و ئێمە ئامادەین بۆ دابینکردنی هاوکاری ڕاستەوخۆ بۆ خەڵکی سوریا."
بوومەلەرزە بەهێزەکەی تورکیا کە دەیان بومەلەرزەی تری لە ناوچەکدا بەدوای خۆیدا هێنا زیاتر لە سێ هەزار و 400 کەسی لە تورکیا و سوریا کوشتووە، ئەمەش لە کاتێکدا لە بەشێکی زۆری ناوچەکاندا بەفرێکی زۆر باریوە و خەڵکی لە کەشێکی وا سارددا بێ ماڵوحاڵ ماونەتەوە.
حکومەتی تورکیا دەڵێت زیاتر لە دوو هەزار و 300 کەس بەهۆی ئەو بوومەلەرزەیەی گوڕەکەی 7.8 بوو لە تورکیا کوژراون.
لە سوریاش حکومەت لە ڕایگەیاندووە 656 کەس گیانیان لەدەستداوە لە کاتێکدا ڕێکخراوەکانیس لە ناوچەکانی ژێر دەسەڵاتی ئۆپۆزسیۆن ڕایانگەیاندووە 450 کەس کوژراون.
بەمەش کۆی ژمارەی ئەو کەسانەی لە تورکیا و سوریا گیانیان لەدەستداوە دەگاتە زیاتر لە 3 هەزار و 400 کەس.
ژنێک لە شاری ئامەد لە بەردەم داروپەردوی باڵەخانە ڕووخاوەکەیدا بە ئاژانسی فرانس پرێسی گوت " وەکو لانکە دەهەژاینەوە. نۆ کەس لە ماڵەوە بووین. دوو کوڕم هێشتا لەژێر داروپەردودان، من چاوەڕێیان دەکەم."
چەندین گرتەی ڤیدیۆیی بڵاو بووەتەوە کە باڵەخانەکان ڕووخاون و خەڵکی بێ ماڵ و حاڵ ماونەتەوە. لەم گرتە ڤیدۆییەدا ساتی ڕووخانی باڵەخانەیەک لە شارۆچکەی جەرابلوس لە پارێزگای حەلەب نیشان دەدرێت.
کاربەدەستان ڕادەگەیەنن خراپی هێڵی ئەنتەرنێت و دۆخی ڕێگاوبانەکانی نێوان شارەکانی کە زۆر بە خراپی بومەلەرزەکە کاریتێکردوون هەولەکانی هاوکاریکردنی لێقەوماوانی سەختکردووە.
بەپێی دواین ئامارە فەرمییەکان هەتا ئێستا ژمارەی ئەو کەسانەی کە لە بومەلەرزەکانی تورکیا و سوریادا گیانیان لەدەستداوە گەیشتووەتە زیاتر لە دوو هەزار و 700 کەس.
ئاژانسی ڕۆیتەرز دەڵێت ژمارەی ئەوکەسانەی لە تورکیا گیانیان لەدەستداوە گەیشتووەتە زیاتر لە 1600 کەس و لە سوریاش زیاتر لە یەک هەزار کەس.
سەرۆکی تورکیا ڕەجەب تەیب ئەردۆغان یەک هەفتە ماتەمینی بەهۆی بومەلەرزەکەی تورکیاوە ڕاگەیاند.
سەرۆکی تورکیا دەڵێت " بەهۆی بومەلەرزەکەی شەشی مانگی دووی 2023 کە لە وڵاتەکەمان ڕوویدا، ماتەمینی نیشتمانی بۆ ماوەی حەوت ڕۆژ ڕادەگەیەنین."
سەرۆکی تورکیا لە پەیامەکەیدا دەشڵێت لە هەموو نوێنەرایەتییەکانی ناوەوە و دەرەوەماندا، ئاڵاکەمان دادەگیرێتە نیوە هەتا کاتی خۆرئاوابوون لە ڕۆژی یەکشەممە 12ی مانگی دووی 2023 ."
کۆمێنتی خۆت لە ڕێگەی فەیسبوکەوە بنووسە