دوابەدوای سەردانەکەی مەسرور بارزانی، سەرۆکی کابینەی نۆهەمی هەرێمی کوردستانی عێراق بۆ تورکیا و کۆبوونەوەکانی لەگەڵ ڕەجەب تەیب ئەردۆغان سەرۆکی ئەو وڵاتە و گەورە کاربەدەستانی تریشدا، وەزیری بەرگری تورکیا دەڵێت "کۆبوونەوەکەی سەرۆکی تورکیا و سەرۆکی حکومەتی هەرێمی کوردستانی عێراق، کاریگەرییەکی ئەرێنی دەبێت بەسەر شەڕی تورکیاوە دژ بە تێرۆریزم."
یەشار گولەر، وەزیری بەرگری تورکیا ڕۆژی چوارشەممە بە ئەندام پەرلەمانەکانی پارتی داد و گەشەپێدانی ڕاگەیاندووە "کۆبوونەوەکەی ئەردۆغان و بارزانی بەبێ هیچ گومانێک کاریگەریی خۆیی دەبێت" و دەشڵێت وەهاش چاوەڕوان دەکرێت پەرەپێدانی هاوکارییەکان دەبنە مایەی بەرەنجامی ئەرێنی.
یەشار گولەر دەڵێت "شەڕی تورکیا دژ بە تێرۆریزم بەردەوام دەبێت بە سووربوونێکی زیاتریشەوە."
ئایا تورکیا و دەسەڵاتدارانی هەرێمی کوردستانی عێراق هەمان پێناسەیان هەیە بۆ تێرۆریزم؟
دکتۆر جەبار قادر، پسپۆڕی کاروباری سیاسی تورکیا دەڵێت "نەخێر پێناسەکان جیاوازن و ئەوەی وەزیری بەرگری تورکیا باسی لێوەدەکات بابەتە ڕاستەقینەکان نەبوون، چونکە کۆمەڵێک تەوەری تری هەن کە زیاتر پەیوەندییان هەبووە بە پرسی وزە و پەیوەندییەکانی نێوان عێراق و تورکیا و فشارەکانی عێراقەوە لەسەر تورکیا." دەشڵێت ئەوەی وەزیری بەرگری تورکیا باسی دەکات، "جۆرێکە لە کڵێشەیەکی گشتی و هەموو کەسێکیش دەزانێت پرسی تێرۆریزم بابەتی ڕاستەقینەی وتووێژەکان نەبووە."
دکتۆر جەبار ئاماژەش بە کێشەیەکی سەرەکی دەکات کە بەشێکی تورکیا دەگرێتەوە و بەشی سەرەکیشی هەرێمی کوردستانی عێراق دەگرێتەوە و بریتییە لەو سزایەی لە پاریسەوە خراوەتە سەر تورکیا و لەوەش خراپتر وەک دەڵێت "کردنەوەی دۆزێکی خراپترە لەسەر تورکیا کە ئەمیشیان هەر پەیوەندی بە ناردنی هەتا مانگی 3ی ئەمساڵی 2023 ی نەوتەوە هەیە لە ڕێی تورکیاوە و عێراقیش داوای قەرەبوویەکی زیاتر دەکات."
دکتۆر جەبار دەڵێت تورکیا ژمارەیەک کارتی فشاری بەدەستەوەیە لە بەرامبەر عێراق وەک کارتی ئاو و کارتی بازرگانی، کارتی فشار خستنە سەر عێراق و سوریا لەسەر هەبوونی ئەو ڕێکخراوانەی دژی تورکیا کاردەکەن؛ بەڵام وەک دەڵێت "بەکارهێنانی کارتی دەسەڵات لە هەرێم لە بەرامبەر بەغدا کارتێکی لاواز دەبێت چونکە حکومەتی هەرێم لە زۆربەی دۆسێکاندا بڕیاربەدەست نییە."
زانیاری زیاتر لەم لینکەدایە
