لە نۆیەمین ساڵیادی جینۆسایدی ئێزدییەکان بە دەستی چەکدارانی داعش، ئەمەریکا داوای لە کاربەدەستانی عێراق کردووە کۆتایی بە بنبەستی سیاسی بهێنن و لەگەڵ ئێزدییەکان کاربکەن بۆ دامەزراندنی قائمقامێک بۆ شارۆچکەی شنگال.
دەیڤد بێرگەر، بریکاری باڵیۆزی ئەمەریکا لە بەغدا ئەمڕۆ پێنجشەممە لە مەراسیمێکدا بە بۆنەی ساڵیادی جینۆسیایدی ئێزدییەکان وتارێکی پێشکەش کرد و تیایدا گوتویەتی، "ئەمەریکا وابەستەیە بەرامبەر ئێزدییەکان و کۆمەڵگەی سیڤیل. دەبێت کاربەدەستان دەستبەجێ کۆتایی بە بنبەستی سیاسی بهێنن و لەگەڵ ئێزدییەکان و ڕێبەرانی ئێزدی کاربکەن بۆ دامەزراندنی قائمقامێک بۆ شنگال."
لەوەتای شنگال و ناوچەکانی دیکەی ئێزدی نیشین لە پارێزگای موسڵ لە داعش ڕزگارکراون، هەتا ئێستا دۆخی ئەو شارۆچکەیە زۆرینە ئێزدی نەگەڕاوەتەوە دۆخی ئاسایی خۆی و بەشێکی زۆری خەڵکەکەی لە کەمپەکان و شار و شارۆچکەکانی هەرێمی کوردستان و بەشەکانی دیکەی عێراق دەژین.
نۆ ساڵ لەمەوبەر و لە ڕۆژێکی وەکو ئەمڕۆدا، 3 ی مانگی هەشت، چەکدارانی داعش لە ناکاو هێرشیان کردە سەر شارۆچکەی شنگال و هێزەکانی پێشمەرگە کشانەوە و چەکدارەکانی داعشیش توانیان لە ماوەیەکی کورتدا شارۆچکە داگیربکەن و بە دوایدا بێ ڕەحمانە کەوتنە کوشتنی خەڵکی سیڤیلی بێ تاوان و پاشان بردنی کچ و ژن و منداڵیان.
لەم یادە تاڵەی ئێزدییەکان، نادیە موراد، چالاکوان و قوربانی دەستی داعش و براوەی خەڵاتی نوبڵ بۆ ئاشتی، ئەمڕۆ پێنجشەممە لە تویتەرەکەی نووسیویەتی" ئەمڕۆ فرمێسک بۆ هەموو ئەو کەسانە دەڕێژین کە لەدەستمان دان و بۆ ئەو ڕۆژەی کە بینیمان. بەردەوام دەبم لە تێکۆشانم لە پێناو ڕزگاربووان و داکۆکی لە دادپەروەری دەکەم و کاردەکەم بۆ ساڕێژکردنی زامی زێدەکەمان."
ڕاپۆرتی ڕێکخراوە خۆجێی و نێودەوڵەتییەکان مەزەندەدەکەن زیاتر لە 5 هەزار ئێزدی بە دەستی داعش کوژرابن و زیاتر لە 7 هەزار ژن و کچی ئێزدی وەک کۆیلەی سێکسی برابن، ئەمە جگە لەوەی ناوچەیەکی زۆریان وێران کران و چەندان شوێنی پیرۆزیان تاڵانکران و تەقینرانەوە.