هێزە ئاسایشییەکانی تورکیا، لە شارەکانی شەمزینان، گەڤەر و چەلا جولەمێرگ، هەڵیانکوتایە سەر چەند ماڵێک و نزیکەی 30 کەسیان دەستگیرکرد.
لە نێو ئەو کەسانەی کە ڕۆژی سێشەممە دەستبەسەرکران لانیکەم 20 ژنی بەساڵاچوو هەن کە زۆربەیان ئەندامی ئەنجومەنی دایکانی ئاشتین و بە گومانی پەیوەندییان بە " ڕێکخراوێکی چەکداری". دەستگیر کراون.
هاوسەرۆکی کۆمەڵەی یاساناسانی ئازاد (OHD)ی شاری جولەمێرگ، جەڤاهیر ئاگرالی کە چاودێری دۆخی دەستگیرکراوەکان دەکات، دەڵێت دادگا کۆبوونەوەی پارێزەران و دەستگیرکراوەکانی بۆ ماوەی 24 کاتژمێر قەدەغە کردووە.
ئاگرالی بە دەنگی ئەمەریکای ڕاگەیاند "زۆربەی ئەو دایکانەی دەستگیرکراون زمانی تورکی نازانن و شارەزایشیان لە یاسای تورکیا نیە تا بتوانن بەرگری لە خۆیان بکەن". وە ئێستا نازانن بە چ تۆمەتێک دەستگیرکراون. سەرەڕای ئەوەش بەهۆی قەدەغەکردنی کۆبوونەوەی پارێزەران، ناتوانین سەردانیان بکەین. جگە لەوەش، یاداشتێکی 'نهێنی' لەسەر دۆسیەکە هەیە و پێمان ناوترێت ئەو دایکانە لەسەر چی تۆمەتبار دەکرێت".
پارێزەر ئاگرالی ڕایگەیاند هەندێک زانیاری نافەرمییان پێگەیشتووە کە گوایە ئەو ژنانە بەهۆی وەرگرتنی هاوکاری لە مانگی سووری کوردستانەوە دەستگیرکراون و بەو هۆیەشەوە تۆمەتبارکراون بە ئەندامێتی لە ڕێکخراوێکی چەکداری. .
دەشڵێت: "مانگی سووری کوردستان لە ئەڵمانیا دەمەزراوە و فەرمیە، لە ڕوانگەی یاساییەوە ناتوانن بڵێن ڕێکخراوی تیرۆریستیە.
ئەمە ڕێکخراوێکی هاوکارییە، وەک مانگی سووری تورکیا. بەپێی یاسای تورکیا هیچ هۆکارێک نییە بۆ سزادانیان. بەڵام لە تورکیا ئەو کەسانەی وەک ئەم دایکانە و زۆر کەسی تر کە دەستگیر دەکرێن بە پەیوەندی بە تیرۆر تۆمەتبار دەکرێن”.
تا ئامادەکردنی ئەم ڕاپۆرتە، هێزە ئاسایشییەکان هیچ زانیارییەکیان لەبارەی هۆکاری دەستگیرکردنی ئەو کەسانە بڵاونەکردووەتەوە.
