لە پاش جوڵەی کەشتیە سەربازیەکەی ئەمەریکا و ناردی هێز بۆ گەرووی کەنداو لە پێناو جڵەوگیری ئێران لە ناوچەکەو پاراستنی کەشتیە بازرگانیە نەوتیەکان، دەنگوباسی زۆر لەسەر جموجۆڵی سەربازی ئەمەریکا لە عێراق و سوریاش لە هاتە گۆڕێ. ئەمەش لە کاتێکدایە لە ماوەی رابردوودا شاندێکی وەزارەتی بەرگری عێراق لە واشنتن بوو بە مەبەسی دیاری کردنی ئایندەی پەیوەندیە سەربازی و هەواڵگیریەکانی نێوان عێراق و ئەمەریکا و هاوپەیمانەکانی.
لە رابردوو زۆرێک لە شارەزایان کۆکبوون لەسە ئەوەی کە بەردەوام عێراق گۆڕەپانێکی سیاسی ململانێی نێوان ئێران و ئەمەریکا ش بووە. ئەم پەرەسەندنانە چۆن لە عێراقدا رەنگ دەداتەوە.
دەیڤید پۆلاک شارەزای سیاسەتی دەرەوەو کاروباری عێراق پێی وایە، ئەمەریکا سیاسەتی دوور مەودای لە عێراق و ناوچەکە تا رادەیەک بزرە، وەلێ سیاسەتی تاکتیکی پیادە دەکات.
پۆلاک دەشڵێت "ئەمەریکا لە عێراق و ناوچەکە لەبەر دەم تاکتیکێکدایە، من ناڵێم لەم کاتەدا پلانی ستراتیژی هەیە، بەڵام هەوڵی داوە رێکەوتنی نافەرمیش بێت لەگەڵ ئێراندا ئەنجامی بدات. دەربارەی چەکی ئەتۆمی، هەروەها هێرش نەکردنە سەر هێزەکانی ئێمەو هاوپەیمانان لە عێراق. لەو بڕوایەدام کە رێککەوتنمان بۆ کەمتر لە ساڵێک لەگەڵ ئێرانیەکاندا هەیە، رێککەوتنەکەش شوێن پێی خۆی گرتووە".
بەڵام نە ئەمەریکا و نە ئێرانیش بە فەرمی ڕایاننەگەیاندووە ڕێککەوتنێکی لەو جۆرەیان هەبێت. ئەم شیکەرەوە سیاسیە پێی وایە لە چاو ساڵانی رابردوودا کە بەردەوام داخوازییەکانی سەبارەت بە کشانەوەی هێزەکانی ئەمەریکا لە پەرلەمانی عێراقدا دەخرانە ڕوو، ئێستا دەسەڵاتدارانی عێراق خواستیانە ئەگەر هێزێکی کەمیش بێت لەوێ بمێننەوە. بە رای ئەو ئەمەش ستراتیژییەتێکی دیکەیە.
پۆلاک دەڵێت "لەو بڕوایەدام سیاسەتی ئەمەریکا هەندێک دەسکەوتی بەدەست هێناوە، بەڵام گرفتەکە لەوەدایە درێژدەم نیین، تاوەکو ئەمەریکا فراوانتر لە رووی ئابوریەوە لە عێراقدا کار بکات. ئێستا عێراق داخوازیەکی سەرەکیان هەیە کە هێزەکانمان لەوێ بمێننەوە، هەروەها داوادەکەن لە رووی هەوڵگیری و مەشق و راهێنان کۆمەکیان بکەین و پەیوەندیەکانمان بەردەوام بێت، هەروەها لە رووی ئابوریەوە رۆڵی زیاتر بگێڕین، لە بوارە ئابوریەکەدا هەندێک بەرەوپێشچوون هەیە، بەڵام هێواشە".
ئێستا ئەمەریکاو ئێران لە عێراقدا تاڕادەیەک لە دۆخێکدان بە سوڕێکی مت بووندا تێپەڕیوە، وەک ئەم شارەزایە ئاماژەی بۆ دەکات، دۆخە نوێکە رێککەوتنی نافەرمی خوڵقاندویەتی. پێشی وایە ئەگەر کێشەو گیرو گرفتەکانی نێوان ئەمەریکاو ئێران لە شوێنێک ئارامی بەخۆوە ببینێت، لە شوێنی تر گرژی هەن. بێگومان تا رادەیەکیش کاریگەریان بەسەر یەکترییەوە دەبێت، لەو بارەیەوە دەیڤد پۆڵاک دەڵێت "لە کاتێکدا هەندێک خاڵی ئەرێنی لە پەیوەندی نێوان ئەمەریکاو ئێراندا دەبینین، زۆر جوڵەی مەترسیداریش لە لایەن ئێرانەوە لە ئارادایە. بە تایبەتی کە دێتە سەر رێگری و لێدانی بارهەڵگرە نەوتیەکان لە گەرووی کەنداودا، لەم چەند هەفتەیەی رابردوودا ئەمەریکا کۆمەڵێک رێکاری توندی گرتووەتە بەر بە ناردنی کەشتی سەربازی و موشەکی سەربازی و فڕۆکەی بێ فڕۆکەوان. قسەکردن لەگەڵ کۆمپانیاکانی گواستنەوەی نەوت بە دانانی هێزی ئەمەریکا لەسەر کەشتیە بازرگانیەکانیان. ئەمەش یەکەمجارە کە لە مێژووی ئەمەریکادا ئەوە روو بدات. کە ئەمەش گۆرانێکی ستراتیجییە لە سیاسەتی ئەمەریکا دەرهەق بە ئێران".
لە دوای پاشەکشێی ئەمەریکا لە عێراق ئایا جاريکی تر دەتوانێت هێز رەوانەی عێراق بکاتەوە. ئەو بۆچوونە لە زۆرێک لە میدیاکان باسیان لێوە کردووە. بەڵام ئەم شیکەرەوەیە پێی وایە نە ئەمەریکا خواستی لەو چەشنەی هەیە، نە عێراقیش ئەوە دەخوازێت. بەڵکو لە هاتنی شاندی وەزارەتی بەرگری عێراق بۆ پنتاگۆن، وتوێژەکان بەو ئاراستەیە بووە کە ئەمەریکا لە پشتگیری هەواڵ گیری و سەربازی عێراق بەردەوام بێت، بە رێککوتنیان لەسەر هەندێک شەرت ومەرج".