پارتی چەپی سەوز (یەسەپە) ئامادەکاری بۆ بەڕێوەبردنی کۆنگرەی خۆی دەکات، هەر بەو هۆیەشەوە لە 8 و9ی ئەم مانگە کۆنفرانسی ژنانی لە ئەنکەرە ئەنجامدا و لە 10 و 11ی مانگی نۆش کۆنفرانسی ناوەندی بەڕێوە دەبات.
لەم کۆنفرانسانەدا سیاسەتی پارتی چەپی سەوز بە تەواوی ڕوون دەبێتەوە و دواتر کۆنگرەی یەسەپە بە پێی ئەم ستراتیژیە ڕێکدەخرێت.
ئەوەی لێرەدا گرنگە ئەوەیە لەمەودوا پارتی دیموکراتی گەلان (هەدەپە) چ جۆرە سیاسەتێک بۆ خۆی دادەنێت؟
هاوسەرۆکی هەدەپە، جاهیت کرکەزاک هەڵوێستی هەدەپە سەبارەت بە یەسەپە بۆ دەنگی ئەمەریکا ڕوونکردەوە.
کرکەزاک ڕایگەیاند کە خەباتی هەدەپە لەگەڵ هاوپەیمانەکانی پشتیوانی پارتی چەپی سەوز دەکات:
دەشڵێت "ناوی حزب یان دامەزراوەکان لە خەباتی ئێمەدا زۆر گرنگ نین". هەر حیزبێک بەپێی ئامانجێک خەباتی خۆی دەکات. بۆ سەرکەوتنی یەسەپە با پێکەوە لەگەڵ هەدەپە پشتیوانی پارتی چەپی سەوز بکەین.
دوای کۆنفرانسەکان یەسەپە وادە و ناوەڕۆکی کۆنگرە دیاری دەکات. کرکەزاک ئاماژە بەوە دەکات کە هیچ جیاوازییەک لە نێوان ئامانجەکانی هەدەپە و یەسەپەدا نییە:
کرکەزاک دەڵێت "ئامانجمان دروستکردنی ژیانێکی شکۆمەندانەیە بۆ خەڵکی کوردستان و تورکیا". هەموو سۆز و تێکۆشانمان لەسەر ئەمە دامەزراوە. لێرەدا ناوی حزب و ڕێکخراو گرنگ نییە، ئەوەی گرنگە خەباتی ئێمەیە بۆ یەک ئامانج.
هەدەپە، کاتێک لە ساڵی 2012 دامەزرا، داوای دیموکراسیکردنی تەواوی گەلی تورکیای دەکرد و ستراتیژی حزبەکەیان ئەوە بوو کە تورکیا بە وڵاتی هەمووان دەزانن. کرکەزاک سەرنج بۆ ئەم ئامانجە ڕادەکێشێت و ڕایدەگەیەنێت کە ئەم ئامانجە بنەڕەتیترین ئامانجە بۆ بەرژەوەندی خەڵکی کوردستان و گەلی تورکیا. کرکەزاک باس لەوەش دەکات کە ئەم ستراتیژیە لەناو پارتی چەپی سەوزدا بەردەوام دەبێت.
دەشڵێت: 11 ساڵە خەڵکی کوردستان و گەلی تورکیا لە ژێر چاودێری هەدەپە خەباتێکی هاوبەشیان ئەنجامداوە. ئەم خەباتەش بە شانازی دەزانم کە گەلی کوردستان و گەلی تورکیا کۆدەکاتەوە”.
لە 7ی مانگی شەشی 2021، سەرۆکی داواکاری گشتی دادگای باڵا بەکر شاهین داوای دۆسیەی داخستنی هەدەپەی لە دادگای دەستووری کرد. هەروەها لە 21ی شەشی 2023 دۆسیەی داخستنی لە دژی هەدەپە تۆمار کرد. ئەم دۆسیەیە تا ئێستاش بەردەوامە.
کرکەزاک سەرنج بۆ ئەم دۆسیەیە ڕادەکێشێت و هۆشداری ئەوە دەدات کە حزبەکەیان لەلایەن دەسەڵاتەوە بە توندی دەچەوسێنرێتەوە.
کرکەزاک گوتی."پارتەکەمان هەدەپە لە ژێر هێرشی تونددایە". لە 8 ساڵی ڕابردوودا ئەم هەڕەشانە زیادیان کردووە. .بۆیە لەمەودوا بیر و بیرۆکەی هەدەپە، جموجۆڵ و خەباتەکانی هەدەپە لە ژێر سێبەری پارتی سەوزدا جێبەجێ دەکەین.
