دانیشتنەکانی دۆسیەی کۆبانێ کە بەهۆی چالاکییە ناڕەزایەتییەکانی 6 و 8ی مانگی دەی 2014 لە دژی هێرشەکانی داعش بۆ سەر کۆبانێ ئەنجامدرا بەردەوامە.
108 کەس لە پرۆسەی دادگاییکردندان کە 18 کەسیان زیندانین، لەو دۆسیەیەدا کە هاوسەرۆکانی پارتی دیموکراتی گەلان (هەدەپە) فیگەن یوکسەکداغ و سەلاحەدین دەمیرتاش و ئەندامانی دەستەی بەڕێوەبەری ناوەندی (م.ی.ک) دادگایی دەکرێن.
سەڵاحەدین دەمیرتاش لە بەرگریکردن لەم دۆسیەیە چەند پەیامێکی سەرنجڕاکێش بۆ ڕای گشتی ڕادەگەیەنێت کە بۆ کورد گرنگن و لە سۆشیال میدیادا ڕەنگدانەوەی زۆری هەیە.
دەمیرتاش لە بەشێکی بەرگریکردنەکەیدا بە دادگا دەڵێت ئەم دەوڵەتە وڵاتەکەیان کە کوردستانە داگیری کردووە.
دەمیرتاش لە پەیامەکەیدا دەڵێت "ئەم دەوڵەتە وڵاتی ئێمە کە کوردستانە داگیری کردووە". گەلەکەمان دەیەوێت لە وڵاتەکەی خۆیدا بخوات و بژی. تورکەکان 100 ساڵ لەمەوبەر هاتوونەتە ئێرە. هەروەها دەیانەوێت لێرە بخۆن و بژین، وەک ئەڵمانییەکان، جولەکەکان و ئەفریکاییەکان. هەموومان دەمانەوێت تێربین و بەردەوام بین لە دروستکردنی نەوەکانمان... بەهۆی بەرەنگاربوونەوەی ئەو کولتوورە داگیرکەرەی کە ڕێکەوتنە ئەخلاقییەکان پێشێل دەکات، دادگایی دەکرێین”.
دەمیرتاش ئاماژە بەوە دەکات کە ڕێککەوتنی سایکس بیکۆ ڕۆڵێکی گەورەی لە دۆخی کێشەی کورددا هەبووە.
دەڵێت "خاکی کوردستان کە لە ساڵی 1516دا بەسەر دوو بەشدا دابەشکرابوو، لە ڕێککەوتننامەی سایکس بیکۆی ساڵی 1916دا بەسەر چوار بەشدا دابەشکرا". دابەشبوونی کوردستان بەهۆی ئیمپریالیستەکانەوە بوو و دواتر هەڵەکانی ئێمە کێشەکەیان گەورەتر کرد. دەوڵەتی تورک بە کورد دەڵێت: "سیاسەت قەدەغەیە، ڕێکخراوەکانی کۆمەڵگەی مەدەنی قەدەغەن. وە کاتێک دەچیتە شاخ، بە تیرۆریستیت دەزانن".
دەمیرتاش هەروەها باس لەوە دەکات کە کێشەی کورد تەنیا بە قبوڵکردنی ناسنامەکەی چارەسەر دەبێت.
دەشڵێت: "دادگایی دەکرێین، چونکە گەورەکانی کوردمان لە مێژوودا لەبیرە". یەکێک لە تۆمەتەکان لەسەر من ئەوەیە کە باسی قازی محەمەدم کردووە. ئەگەر کورد لە جەمسەری باکوریش هەبێت، ئەوان دژایەتی ئەو مافانە دەکەن. ئەگەر کوردێک لە سەهۆڵ خانوویەک دروست بکات و بڵێت 'ئەمە ماڵی منە'، دەوڵەتی کۆماری تورکیا هۆشداری پێدەدات".
سیاسەتمەدار ئیبراهیم خەلیل باران، بەرگرییەکانی سەلاحەدین دەمیرتاش هاوسەرۆکی پێشووی هەدەپە لە دۆسیەی کۆبانێ هەڵدەسەنگێنێت و بە هەڵوێستێکی گرنگ لە دۆسیەی گەلی کورددا دەیبینێت.
باران پێی وایە دەمیرتاش بەو وتانەی هەنگاوێکی کوردستانی بەرەوپێش دەبات و لەلایەن خەڵک و لایەنە کوردییەکانی دیکەوە پێشوازییەکی گەرمی لێدەکرێت.
دەمیرتاش دەزانێت بڕیارەکەی دادگا بابەتێکی یاسایی نیە، بەڵکو سیاسییە، هەر بۆیە تێبینییەکانی دژ بە مێژوو داناوە بەم پەیامانەی لەبەر ئەوەی کوردن دادگایی دەکرێت، هەروەها تۆمەتبار دەکرێت چونکە وڵاتەکەی کوردستانە. ئێمەش دەزانین، ئەوانیش دەزانن کە دەوڵەتی تورکیا کوردستان داگیر دەکات”.
باران بانگەشەی ئەوە دەکات کە ئەمە یەکەمجارە سەرکردەیەکی خۆشەویستی کورد لە دادگاکانی تورکیا و بێ هیوا لە سیاسەتی تورکیا ڕاستەوخۆ بڵێت تورکەکان وڵاتەکەیان داگیرکردووە.
"دەمیرتاش بەم قسانە پەیامێک بۆ هەموو لایەک دەنێرێت" و بە کورد ئەڵێت کورد پێویستە وریا بن چونکە ئەو تاوانانەی لە دژی ئەوان دەکرێت بەهۆی کوردایەتی ئێوەیە، وە بە تورکەکان دەڵێت کە چیتر هیچ هیوایەکم بە ئێوە نییە”.
