وتەبێژی فەرمی سەرۆکایەتی هەرێمی کوردستان بە دەنگی ئەمەریکای ڕاگەیاند، هێرشە "ناڕەواکانی" ئێران بۆسەر هەرێمی کوردستان بووەتە هۆی دروستکردنی "کۆدەنگیەکی گەورەی ناوخۆیی."، لە ئاستی نێودەوڵەتی و عێراقیش هەڵوێستەکان بە "ئەرێنی" دادەنێت و دەڵێت سەرۆکایەتی هەرێم بە پێزانینەوە لە هەڵوێستە ناوخۆیی و دەرەکیەکان دەڕوانێت.
شەوی 15ی مانگی یەکی 2024 ئێران لە ڕێگەی چەند مووشەکێکی بالیستەوە هێرشی کردە سەر شاری هەولێر و بەو هۆیەوە 4 کەس گیانیان لەدەستدا و 6 کەسی دیکەش برینداربوون.
دڵشاد شەهاب، وتەبێژی فەرمی سەرۆکایەتی هەرێمی کوردستان، بە دەنگی ئەمەریکای ڕاگەیاند، "هێرشەکە کاریگەریەکی گەورەی لەسەر ناوخۆی هەرێمی کوردستان دروست کرد، بە تایبەت لەسەر ڕای گشتی لە هەرێم. واتە ئەم بابەتە وەک شتێکی ئاسایی و ململانێیەک سەیر ناکرێت، ئێستا هەرێمی کوردستان هەمووی هاوڕایە بە هەموو بیرو و ڕا جیاوازەکانەوە، بە وانەشەوە کە سیاسی نین، پێیان وایە هێرشەکان کارێکی ناڕەوان."
وتیشی، "سەرۆکایەتی هەرێم بە تەقدیرەوە لە هەموو هەڵوێستەکان دەڕوانێت. بۆچوونی ئێمە وایە دەبێت ببێتە هەنگاوێک بە ئاڕاستەی یەکڕیزی نێوان لایەنە سیاسیەکان و بەوەی لەیەک نزیکببینەوە."
لەدوای هێرشەکە، بەرپرسانی باڵای هەرێم و حزبە سیاسییەکان چەندین هەڵوێستی ناڕەزایەتییان بڵاوکردەوە.
لە نێو ناڕەزایەتییەکان، مەکتەبی سیاسی یەکێتی لە ڕاگەیێندراوێکیدا هێرشەکەی بە "ناڕەوا" لەقەڵەمدا و سەرکۆنەی کوشتنی خەڵکی مەدەنی کرد و وتی، "پێمانوایە ھەر کێشەیەکی سیاسی- ئەمنی ھەستیار لە نێوان وڵاتە دراوسێکاندا بەم شێوەیە تاکلایەنە و لە دەرەوەی تێگەیشتنی سیاسیی و ئەمنی ھاوبەش، چارەسەر نابن و تەنھا ئاڵۆزی و ژینگەی پەیوەندییە ئیقلیمییەکان تێکدەدەن کە سەرەنجام گەلانی عێراق نرخەکەی دەدەن."
لەسەر ئاستی عێراقیش، جگە لە دەرکردنی پەیامی ئیدانە، وەزارەتی دەرەوەی عێراق ڕایگەیاند کە لە ئەنجومەنی ئاسایشی نەتەوەیەکگرتووەکان سکاڵا لەسەر ئێران تۆماردەکات.
وتەبێژی سەرۆکایەتی هەرێمی کوردستان لەوبارەوە ڕایگەیاند، "هەڵویستی خودی عیراقیش جێگەی تەقدیرە.سەرۆک وەزیران هەڵوێستێکی ڕاشکاو و ڕوونی هەبووە، وەزارەتی دەرەوەی عێراق هەڵوێستی دەوڵەتی بە ڕوونی ڕاگەیاندووە، هەرچەندە ئەوە ئەرکە بەرامبەر بە پارێزگاریکردنی سەروەری عێراق، بەڵام هاوکات هەڵویستەکە خاڵێکی ئەرێنییە."
سەرەڕای ڕاستەوخۆ بەرپرسیارێتی هەڵگرتنی هێرشەکان لەلایەن سوپای پاسدارانی ئێرانەوە، وەزارەتی دەرەوەی ئەو وڵاتەش دەڵێت هێرشەکانیان بۆسەر ئامانجێکی "سیخوڕی" دژ بە ئێران و بنکەیەکی "زایۆنی" بووە و کردەوە لە چوارچێوەی پاراستنی ئاسایشی وڵاتەکەیان بووە.
بەڵام بەرپرسانی هەرێم بە تووندی ئەو تۆمەتانە ڕەتدەکەنەوە.
دڵشاد شەهاب ڕایگەیاند، "هێرشەکە پێچەوانەی هەموو ڕێكکەوتنە نێودەوڵەتیەکانە، وە پێچەوانەی ڕێکەوتنی ئەمنی نێوان هەردوو وڵاتە، تەجاوزێکی گەورەیە لەسەر هەموو ڕێکەوتنەکان و عورفی دراوسێیەتی."
وتیشی، "ئەو شوێنانەی بە ئامانج گیراون بۆ هەموو دنیا دەرکەوت مەدەنین و ماڵی خەڵکی سڤیلە، لە خودی ئەجامدەران زیاتر هیچ کەسێک بە کۆمێنتێکیش پشتگیری
پاساوەکانی ئێران ناکات. منداڵیکی پەپولە ئاسا لە بنکەی موساد چی دەکات؟ هەموو نوێنەرایەتیەکان باوەڕیان بە پاساوەکان نییە."
لە نێوان کوژراوەکانی هێرشەکەی دووشەممەی ڕابردوودا کۆرپەلەیەک هەبوو بە ناوی ژینا پێشڕەو دزەیی کە تەمەنی لە ساڵێک کەمتر بوو.
جگە لەو کۆرپەلەیە، سێ کەسی تری کوژراون کە بریتین لە باوکی کۆرپەلەکە و سەرمایەداری هەولێر پێشڕەو دزەیی، دایەنی کۆرپەلەکە کە خانمێکی کارگوزاری خەڵکی فیلیپینە، وە هەروەها سەرمایەدارێکی تر کە لە ماڵی پێشڕەو دزەیی میوانبوو.
ئێران لە ڕابردوودا بەردەوام تۆپبارانی سەر سنوری هەرێمی کوردستان کردووە بە بیانووی هەبوونی هێزی چەکداری کوردی دژ بە ڕژێمی کۆماری ئیسلامی و لە چەند مانگی ڕابردووەوە گروپە شیعەکانی نزیک لەو وڵاتە بەردەوام لە ڕێگەی درۆنەوە هێرش دەکەنە سەر هێزەکانی هاوپەیمانان لە هەولێر.
بەڵام ئەمە دووەمجارە حکومەتی ئێران لە ڕێگەی مووشەکەوە هێرشدەکاتە سەر هەولێر بە بیانووی هەبوونی دەزگای سیخوڕی ئیسرائیل. لە مانگی 3ی ساڵی 2022 سوپای پاسداران نزیکی 12 مووشەکی بالیستی لە هەولێر دا و لە ئەنجامدا کەسێک برینداربوو.
سەبارەت بەم هێرشانە دڵشاد شەهات دەڵێت، "زۆر بەداخەوە بۆ دەوڵەتێکی دراوسێی خاوەن مێژوویەکی درێژ لە پەیوەندی دبلۆماسی، هەبوونی نوێنەرایەتی لە هەرێم و دانیشتنی بەردەوام، بە بێ پاساویکی گونجاو هێرشبکاتە سەر هەرێم. جێگەی نیگەرانیەکی گەورەیە."
وتەبێژی فەرمی سەرۆکایەتی هەرێمی کوردستان دەڵێت هێرشەکان لە بەرژەوەندی هاوبەشی هەردوولا نین و جەختدەکاتەوە لەوەی پاساوەکانی بەرپرسان لە تاران جێگەی باوەڕ نین، "تەنانەت ئێرانیەکان خۆشیان لە هەرێم ئەو ڕاستییە دەزانن."
سەرۆکایەتی هەرێم بۆ VOA : هێرشەکانی هەولێر کۆدەنگیەکی گەورەی لە ناوخۆی هەرێم دروستکردووە
