گواستنەوەی ئەو هێزە زۆرە و ناردنی سەدان تانک و زرێپۆش لەلایەن تورکیاوە بۆ ناوچەکانی باکوری هەرێمی کوردستانی عێراق، وەک عێراقییەکان خۆیان دەڵێن "دەشێت ئانکەرە هەر تەنها مەبەستی لە لێدانی پارتی کرێکارانی کوردستان نەبێت، بەڵکو ئامانجی تریشی هەبێت، لەوانە کۆنترۆڵکردنی پارێزگای موسڵ."
ژەنەراڵێکی لەشکری عێراق لە لێدوانێکدا بۆ بەشی کوردی دەنگی ئەمەریکا دەڵێت "شەڕی پارتیزانی لە ناوچە شاخاوییەکاندا پێویستی بەو هێزە زەبەلاح و گەورە و تانک و زرێپۆش و ئەو بابەتانە نییە بۆ یەکلاکردنەوەی ئەو شەڕە؛ هەربۆیە ناردنی ئەو هەموو کەرەستە و کەلوپەلە لەشکرییە، وەها دەکات بڵێم لەوبڕوایەدانیم تورکیا تەنها بۆ یەکلاکردنەوەی ئەو شەڕە هاتبێت. تەنانەت کاتی خۆیشی حکومەتی عێراقیش نەیتوانیوە ئەو ناوچانە بە زەبری هێز بخاتەوە ژێر ڕکێفی خۆی. لەبەر ئەوە ئەگەر تورکیا بیەوێت ئەو ئەزمونە دووبارە بکاتەوە لە
شوێنێکدا کە وڵاتی خۆی نییە، پێناچێت سەرکەوتوو بێت و بۆی ناکرێت."
تورکیا بەردەوامە لە جمجۆڵە لەشکرییەکانی خۆی لە باکوری هەرێمی کوردستانی عێراقدا و هەروادێ و هێزی زیاتری لەشکریی بە تانک و زرێپۆشەوە دەگوێزێتەوە ناوچەکانی پارێزگای دهۆک.
کردە لەشکرییەکان، جا لە هەرچ شوێنێکدا بکرێن، ئامانجی ئاشکرا و نائاشکرایان هەن؛ بە مانایەکی تر ئامانجی دەستبەجێی لەشکریی و ئامانجی تری سیاسی درێژخایەن کە بە جودا لە ژورە داخراوەکاندا باس دەکرێن و بڕیاریان لێدەدرێن.
ئەم ژەنەراڵە کە داوای کرد ناوی نەهێنرێت لەبەر هەستیاریی پێگەکەی لەناو لەشکری عێراقدا، دەڵێت "هێنانی ئەو هەموو کەرەستە و کەلوپەلە لەشکرییە لەلایەن تورکیاوە، لە ڕوی لۆژیکی سەربازی و لە ڕوی ڕەهەندە سیاسی و ستراتیژییەکانیشەوە شتی تریشی لەپشتە. تورکیا بابەتی موسڵ و ویلایەتی موسڵی وەلاوە نەناوە و وەک دەزانین ساڵانە لە بودجەی وڵاتی خۆیدا، بودجەیشی بۆ دادەنێت."
دکتۆر تاریق ئەلزوبەیدی، پسپۆڕی زانستە سیاسییەکان لەوبڕوایەدایە، ئەگەر تورکیا بیریش لە دۆسێی موسڵ بکاتەوە، ئەوا بۆ ئێستا نییە و دەڵێت " ئەم جموجۆڵە لەشکریانەی تورکیا لە ساڵانی هەشتاکانی سەدەی ڕابردووەوە درێژەی هەیە و تورکیاش هەمیشە وەهای ڕاگەیاندووە، بێ لە پارتی کرێکارانی کوردستان، هیچ کێشەیەکی تری نییە؛ تورکیا شەڕێکی کراوەی هەیە لەگەڵ پارتی کرێکارانی کوردستاندا، بەڵام ئەگەر دەرفەتی بۆ بڕەخسایە و سیستەمی نێونەتەوەیی ڕێگەی بدایە بە تورکیا، ئەوا دەستیشی دەکرد بە جموجۆڵ بۆ دۆسێی موسڵ وەک هەوڵێک بۆ کۆنترۆڵکردنی چەند ناوچەیەکی ئەو پارێزگایە و هێنانەدی خەونی ولایەتی موسڵی تورکیا."
دکتۆر ئەلزوبەیدی، ئاماژەش بەوە دەکات کە تورکیا لەگەڵ هەموو کردە لەشکرییەکانیشیدا بۆ بەرەنگاربوونەوەی پەکەکە، کێشەیەکی تریشی هەیە و دەڵێت "تورکیا تەنها پشت بە هێزی سەربازی دەبەستێت و دیالۆگ لەگەڵ دانیشتوانە کوردەکەیدا ناکات، دیالۆگ لەگەڵ پارتی کرێکارانی کوردستاندا ناکات، تورکیا نە دیالۆگ دەکات و نە بەدواداچونیش دەکات لەسەر داواکارییەکانی نەتەوەکان و بەتایبەتیش نەتەوەی کورد؛ کە بە ڕای من ئەو کێشەیە چارەسەر نابێت ئەگەر چارەسەرییەکی سیاسیانەی بۆ نەکرێت بۆ پێدانی مافەکان بە نەتەوەی کورد لە تورکیادا، کە بە ملیۆنان کورد لە تورکیادا دەژین و ڕێژەیەکی گەورەی دانیشتوانی تورکیا پێکدەهێنێت."
ئەو جموجۆڵە لەشکرییانەی تورکیا لە نێوەندی بێدەنگیی حکومەتی عێراق و حکومەتی هەرێمی کوردستانیشدا بوو، بەڵام لە هەنگاوێکی بێپێشینەدا، ئەنجومەنی وەزاریی ئاسایشی نیشتمانی عێراق، دوای کۆبوونەوەکەی ڕۆژی چوارشەممە لە ڕاگەیەندراوێکدا ئەو جموجۆڵە لەشکرییانەی تورکیای ڕەتکردنەوە و وەک لە ڕاگەیاندراوەکەدا هاتووە "جەخت دەکەینەوە لە ڕەتکردنەوەی هاتنە ناوەوەی لەشکریی تورکیا بۆ ناو خاکی عێراق و پێویستە تورکیا پرەنسیپی دراوسێیەتی باش بە هێند وەربگرێت و هەروەهاش سەروسەودای دیپلۆماتی لەگەڵ عێراقدا بکات و لە بابەتە ئاسایشییەکاندا هەماهەنگی لەگەڵدا بکات."
ئەنجومەنی وەزاریی ئاسایشی نیشتمانی عێراق، لەو وەزارەتانە و لەو دامەزراوانە پێکهاتووە کە پەیوەندییان بە کاروباری ئاسایشییەوە هەیە و موحەمەد شیاع ئەلسودانی، سەرەک وەزیری عێراق کە سەرکردەی هێزە چەکدارەکانی عێراقە، سەرۆکایەتی ئەم ئەنجومەنە دەکات.
دکتۆر تاریق ئەلزوبەیدی، بێدەنگی حکومەتی عێراق لەو جموجۆڵە لەشکریانەی تورکیا دەگەڕێنێتەوە بۆ چاوەڕوان کردنی کاربەدەستانی حکومەت بەتایبەتیش پاش ئەو زنجیرە وتووێژ و دانوستاندنانە بەردەوامانەی بەغدا و ئانکەرە دەیانکرد کە دواترینیان سەردانەکەی ڕەجەب تەیب ئەردۆغان بوو بۆ بەغدا و دۆسێی پەکەکە، یەکێک بوو لە بابەتە سەرەکییەکان لەو سەردانەدا و دەڵێت "ئانکەرە دڵنیایی دابوو بە عێراق کە سەروەریی عێراق پێشێل ناکات و لەشکرکێشیش ناکات، ئەمەش وەهای کرد حکومەتی عێراق چاوەڕوان بێت و هیچ سەرکۆنەیەک نەکات لەسەر بنچینەی ئەوەی تورکەکان پەیمانیان دابوو کە هێزەکانیان بگەڕێننەوە بۆ سەر سنور و هیچ هێرش و کردەیەکی لەشکریش نەکەن بەبێ ڕەزامەندی حکومەتی عێراق؛ چونکە تورکیا وابەستەی ئەو پەیمانانەی خۆیان نەبوون، هەربۆیە ئەنجومەنی وەزاریی ئاسایشی نیشتمانی عێراق سەرکۆنەی ئەو جموجۆڵە لەشکریانەی کرد و ئەمەش بەڵگەیە کە جموجۆڵە لەشکرییەکانی تورکیا بە هەماهەنگی نەبووە لەگەڵ حکومەتی عێراقدا."
ژەنەراڵەکەی لەشکری عێراق دەڵێت "دەبوایە حکومەتی عێراق هەنگاوی خۆپارێزیی بنایە نەک دەرکردنی ڕاگەیەندراوێک لە ئەنجومەنی وەزاریی ئاسایشی نیشتمانی عێراق و دەبووایە لە دەمێکەوە قسەی خۆی بکردایە و هەنگاوی دروستی خۆی بنایە بەرامبەر ئەو هێزانەی بە نایاسایی لە ناوچەکانی شارۆچکەی باشیک دایانکوتاوە. لە ئێستادا زیاتر لە 50 سەربازگەی تورکیا لەو ناوچانەدا دانراون، لە کاتێکدا بەپێی ڕێککەوتنە ئاسایشییەکانی نێوان عێراق و تورکیا، لە مەودایەکی دیاریکراودا کە 30 کیلۆمەترە، بەکاربهێنرێت بۆ ڕاوەدوونانی ئەوانەی بە تێرۆریست ناودێر کراون لەلایەن ئەو وڵاتانەوە، لە کاتێکدا میللەتەکانی ناو ئەو وڵاتانە بە ئۆپزسیۆن و گەریلا ناودێریان دەکەن. لە ڕێککەوتنەکانیشدا باس لەوە نەکراوە تورکیا بنکەی لەشکریی دابنێت."
ژەنەراڵ دەڵێت "هەمیشە ئەو وڵاتانە وەهایان کردووە لە هەرێمی کوردستاندا سنورەکانی نێوان هەردوو لایەنی دەسەڵاتدار، پارتی دیموکراتی کوردستان و یەکێتی نیشتمانی کوردستان، تۆخ بکرێنەوە بە پشتیوانی وڵاتانی چواردەور، هەتا بتوانن هەموو جموجۆڵە سەربازییەکانی خۆیان بکەن بەبێ ئەوەی پێویستیان بە پرس و ڕا هەبێت لەگەڵ حکومەتی عێراقدا، بێگومان ئەمەش وەهای کردووە بابەتی سەروەریی عێراق هێندەی تر لاواز بێت."