مەزڵوم عەبدی، فەرماندەی گشتی هێزەکانی سوریای دیموکرات، هەوڵی کوشتنی دانۆڵد ترەمپ، سەرۆکی پێشووی ئەمەریکای شەرمەزار کرد و هیوای چاکبوونەوەی بۆ خواست.
عەبدی لە پەیامێکدا لە تۆڕی کۆمەڵایەتیی ئێکس نوسیویەتی: هەوڵی کوشتنی 45ـهەمین سەرۆکی ئەمەریکا بەڕێز دانۆڵد ترەمپ شەرمەزار دەکەین.
هەروەها ئەنجومەنی سوریای دیموکرات (مەسەدە) لە بەیاننامەیەکدا هەوڵی کوشتنی ترەمپی شەرمەزار کرد و ڕایگەیاند، "ئەو جۆرە کارانە مرۆڤدۆستانە و ئەخلاقی نین."
هەروەها لە بەیاننامەکەدا MSD هیوای چاکبوونەوەی بۆ ترامپ خواست و هاوسۆزی خۆی بۆ ئەمەریکا و گەلەکەی دەربڕی و گوتی "هەموو جۆرە توندوتیژییەک ڕەتدەکەینەوە، نابێت توندوتیژی لە هیچ کۆمەڵگایەکدا جێگەی ببێتەوە."
بەشێک لە چالاکوان و شرۆڤەکارانی کورد و سوریایی لە سۆشیال میدیا بۆچوونی خۆیان لەسەر ڕووداوەکە بڵاوکردەوە.
بێرا سەبری شرۆڤەکاری سیاسی نووسیویەتی هەوڵە شکستخواردووەکەی تیرۆرکردنی ترامپ، وا دەکات ترامپ لە بانگەشەی هەڵبژاردنی سەرۆکایەتیدا بەهێز بکات و وەک پاڵەوانی گەل نیشانی دەدات”.
دانۆڵد ترەمپ، سەرۆکی پێشووی ئەمەریکا و کاندیدی پارتی کۆماری بۆ سەرۆکایەتی ئەمەریکا، ڕۆژی شەممە لەکاتی بانگەشەی هەڵبژاردنەکان لە ویلایەتی پێنسیلڤانیا، تەقەی لێکرا و گوێی برینداربوو.