جموجۆڵی چەکدارانی داعش لە ناوچە سونە نیشینەکانی عێراق و ناوچە کێشە لەسەرەکان جارێکی تر سەرهەڵدەداتەوەو هێزە عێراقییەکان خراونەتە ئامادەباشییەوە، بۆ پەرچەدانەوەی هێرش و جموجۆڵی چەکدارانی سەر بەو ڕێکخراوە.
شارەزایانی بواری سەربازی پێیانوایە، سەرهەڵدانەوەی جموجۆڵی چەکدارانی داعش گرێدراوە بۆ دۆخی سیاسی عێراق و ناکۆکی نێوان لایەنە سیاسییەکان، بەو پێیەی داعش ناکۆکییەکان دەقۆزێتەوەو وەکو دەرفەت بۆ نانەوەی ئاڵۆزی بەکاریان دەهێنێت.
لیوا محەمەد هەژار، کە فەرماندەیەکی باڵای هێزی پێشمەرگەیە، بە دەنگی ئەمەریکای ڕاگەیاند،"جم و جۆڵی چەکدارانی داعش بەراورد بە مانگەکانی ڕابردوو زیادیکردووە، ئەمەش گرێدراوە بۆ دۆخی سیاسی عێراق و ناکۆکی نێوان لایەنە سونەکان لەسەر پۆستی سەرۆکی ئەنجومەنی نوێنەرانی عێراق."
ئەمڕۆ یەکشەممە، 21 ی حەوتی 2024، ڕاوێژکاری ئاسایشی نیشتمانی عێراق لە میانی کۆبوونەوەی لەگەڵ باڵیۆزی چیک لە بەغدا، هۆشداری داوەو کەمپی هۆلی سوریای بە مەترسی لەسەر ئاسایش و سەقامگیری ناوچەکە داناوە.
قاسم ئەعرەجی ڕاوێژکاری ئاسایشی نیشتمانی عێراق، بە باڵیۆزی چیک ی لە بەغدا ڕاگەیاندووە،"کەمپی هۆل، کە خێزان و ئەندامانی داعشی تێدایە، نزیکەی 70 هەزار هاوڵاتی سوری و هەڵگرانی ڕەگەزنامەی وڵاتانی تری تێدایەو 30 هەزار کەسیان هەڵگری ڕەگەزنامەی عێراقین."
هێزە ئاسایشی و سەربازییەکانی عێراق بۆ ئاگاداربوون لە جم و جۆڵەکانی داعش پشت بە زانیاری هەواڵگیری دەبەست، بۆیە زۆرجار چەکدارانی داعش لەکاتی جم و جۆڵ و هاتووچۆکردن دا دەکەونە بەر هێرشی فڕۆکە عێراقییەکان.
سەرچاوەیەکی ئاسایشی عێراق لە پارێزگای دیالە کە نەیویست ناوی ئاشکرا بکرێت، بە دەنگی ئەمەریکای ڕاگەیاند،"داعش جم و جۆڵی زۆرەو دەیانەوێت لەهەندێک ناوچە دەست بوەشێنن، بەڵام ئەوان ناتوانن هیچ شوێنێک کۆنترۆڵ بکەن و هێزە عێراقییەکان ڕووبەڕوویان دەبنەوە."
ڕۆژی 22 ی مانگی شەشی 2024، فڕۆکەکانی هاوپەیمانان مەفرەزەیەک چەکداری داعشیان لە ناوچەی غەڕەو پەڵکانەی نزیک قەزای خورماتوو کردە ئامانج و زیاتر لە چوار چەکداریان کوشت، یەکێک لە کوژراوەکان بەرپرسێکی باڵای ڕێکخراوەکە بوو.
بەپێی وتەی بەرپرسانی سەربازی، ئەو مەفرەزە چەکدارەی داعش کە کرایە ئامانج ئەرکی گواستنەوەی چەکدارانی ڕێکخراوەکەی لە ئەستۆدا بووە، بەتایبەت ئەو چەکدارانەی لە نێوان پارێزگاکانی دیالەو کەرکوک و سەڵاحەدین هاتووچۆ دەکەن.
ڕۆژی 14 ی ئەم مانگە، دوو چەکداری داعش لە ناحیەی قەرەهەنجیری ڕۆژهەڵاتی کەرکوک ڕووبەڕووی هێزێکی ئاسایشی هەرێمی کوردستان بوونەوە، لە ئەنجامدا هەردوو چەکدارەکە کوژران و سێ کارمەندی ئاسایشیش گیانیان لەدەستدا و برینداربوون.
لیوا محەمەد هەژار دەڵێت،"چەکدارەکانی داعش خەرقکراون و هەر گروپەو سەر بە لایەکەو ئیش بۆ ئەجێندایەکی دیاریکراو دەکات، بۆیە بە ڕێنمایی جوڵە دەست پێدەکەن و هێرشەکانیان ڕادەگرن. بەتایبەت لە ئێستادا ڕێنماییان پێدراوە هێرش دەست پێبکەنەوە."
هێزە عێراقییەکان بە بەردەوامی لە ناوچەکانی دەوروبەری کەرکوک ڕووبەڕووی چەکدارانی داعش دەبنەوە، بەتایبەت کاتێک ئەو چەکدارانە دەست بە جوڵە دەکەن و زانیاری لەبارەی جوڵەکانیانەوە دەگاتە هێزە عێراقییەکان.
ڕۆژی 19 ی حەوتی 2024، کاتێک هێزێکی داعش لە ناوچەی حەمرین ی پارێزگای دیالە بە نیازی ئەنجامدانی هێرشبوو، لەلایەن فڕۆکە عێراقییەکانەوە کرانە ئامانج و چەند چەکدارێکیان لێکوژرا.
سەرچاوەیەکی ئەمنییەکەی عێراق لە پارێزگای دیالە وتی"داعش جوڵەی لە ناوچە دوورە دەستەکانی حەمرین هەیە، کە ناوچەی سەخت و دژوارن و هێزە عێراقییەکان بە ئاسانی دەستی پێیان ناگات."
سەرچاوەکە دەڵێت،"داعش سەربازگەیەکی لە سنوری زنجیرە چیای حەمرین هەیەو ناوی سەربازگەی عائیشەیە، پێشتر سەربازگەکەی بۆ مەشق و ڕاهێنان بەکاردەهێنا، بەڵام ئێستا ناو بەناو هێزی بۆ دەبات و هەندێکجار چۆڵیشی دەکات."
بەپێی وتەی سەرچاوەکە، ڕێنمایی لەلایەن سەرکردەکانی داعش بۆ چەکدارەکانیان ڕەوانە کراوە بۆ دەستپێکردنەوەی جم و جۆڵ و هێرش، جم و جۆڵەکانی ڕۆژانی ڕابردووش بۆ نمایشکردنەو پەیوەندی بەو ڕێنماییەوە هەیە.