فەرماندەیی ناوەندی لەشکری ئەمەریکا ناسراو بە سێنتکۆم CENTCOM لە ناوەڕاستی ئەم مانگی حەوتە ڕاگەیاندنێکی بڵاوکردەوە و تیایدا نووسیویەتی، "داعش لە ئەمساڵدا وا بەرەو ئەوە دەڕوات بەرپرسیارێتی خۆی لە هێرشەکان دوو هێندەی ساڵی ڕابردوو لێبکات، ئەمەش بۆخۆی ئاماژەیە داعش دەیەوێت خۆی پێکبهێنێتەوە لە پاش چەندین ساڵ لە دابەزینی تواناکانی." هاوکات لە عێراق و سوریاش باس لە زیادبوونی جموجۆڵەکانی داعش دەکرێت، وە هەروەها لە ئەوروپاش نیگەرانییەکان لە بارەی هەڕەشەکانی داعشەوە زیاتربوون، بە تایبەتی لە پاش دەستگیرکردنی چەندین کەس بە تۆمەتی ئەندامێتی داعش و هەوڵی ئەنجامدانی کاری تێرۆرستی.
دەپرسین:
چی وەهای کردووە داعش بتوانێت جموجۆڵ و هێرشەکانی زیاتر بکات؟
ئایە جارێکی دیکە داعش گەیشتووەتە ئەو ئاستەی ببێتە هەڕەشەیەکی مەترسیدار وەک دە ساڵ لەمەوبەر؟
چەند ئەم پەرەسەندنەی توانای داعش کاریگەری لەسەر هەرێمی کوردستان و ناوچەکانی ژێر دەسەڵاتی هێزەکانی سوریای دیموکرات هەیە؟
زیادبوونی نیگەرانی ئەوروپاییەکان لە هەڕەشەی تێرۆرستی هەتا چەند کاریگەری دەبێت لەسەر ژیان و گوزەرانی پەنابەر و کۆچبەرانی ئەوروپا؟
لە بەرنامەی بابەتی ڕۆژ تاووتوێی ئەم پرسە دەکرێت بە میوانداری:
جەبار یاوەر، ئەمینداری پێشووی وەزارەتی پێشمەرگەی حکومەتی هەرێمی کوردستان.
شێروان دووبەردانی، ئەندامی پەرلەمانی عێراق.
نازم هەرکی، بەرپرسی لقی پارتی دیموکراتی کوردستان لە شەنگال.
جەبار یاوەر:
داعش ئێستا ڕێکخراوێکی تیرۆریستی جیهانی جێی مەترسییە، هەم لە ڕووی فکری وە هەم لە ڕووی سەربازییەوە، بەڵام تواناکانی زۆر کەمبووەتەوە بە بەراورد بە ساڵی 2014 زۆر زۆر لاوازبووە، بەراوردی توانای هێزەکانی عێراقی و پێشمەرگەش بە ساڵی 2024 زۆر زۆر جیاوازە و ئەوەندەی تر داعش لە بەرامبەر توانای ئێستای ئەو هێزانە لاوازە، ئەو پڕوپاگەندە و هەڵایانەی ئێستا دروستکراون سەبارەت بە مەترسی داعش لەسەر موسڵ، من وەک شارەزایەکی سەربازی قسە دەکەم، حەقی بابەتی سیاسیم نیە، لە ئێستادا داعش هیچ مەترسی نیە نەبۆ دەستبەسەرداگرتنی موسڵ نە هیچ جێگایەکی تر، وە ئەو بەیاننامەیەی ئیدارەی موسڵ و ناوەندە سەربازییەکان دەریانکردووە هەمان ئەو قسەیە دەکەن، جگە لەوە هیچ بەیاننامەیەکی فەرمیمان نەبینیووە لەلایەن هێزەکانی هاوپەیمانان یا حکومەتی فیدراڵی عێراق سەبارەت بە مەترسی داعش، ئەو دەنگۆ و بانگەشانەی لەو ڕووەوە بڵاودەکرێتەوە کە گوایە داعش مەترسییە لەسەر موسڵ پەیوەندی هەیە بە دوو هۆکار، یەکەم کۆبوونەوەی شاندی عێراقی بە سەرۆکایەتی وەزیری بەرگری عێراق لە ئەمەریکا کە داوای کۆتایی هاتنی ئەرکەکانی هێزەکانی هاوپەیمانانیان لە ئەمەریکا کردووە لە ماوەی سێ مانگی داهاتوو، دووەم، ناکۆکی لایەنەسیاسییەکان لە عێراق بەتایبەت لەنێوان لایەنە سونییەکان بە ئاشکرا ئەو ناکۆکییە دیارە لەسەر پۆستی سەرۆکی پەرلەمانی عێراق، من پێم وایە داعش وەک گورگەکەی هەیاس بەکاردەهێنرێت وەک فشار نڵێم داعش جێی مەترسی نیە، نەخێر داعش ڕێکخراوێکی تیرۆریستییە و جێی مەترسییە، بەڵام بەڕاستی هەرگیز داعش ئەو توانایەی ٢٠١٤ی نیە کە بتوانێت جارێکی تر دەست بەسەر موسڵدا یا پارێزگایەکی تردا بگرێتەوە.
شێروان دووبەردانی:
ڕاستە داعش لە ڕووی چەک و توانا و تەنانەت پشتیوانی کردن لێی وەک پێشووتر نەماوە، بەڵام ئێمە ئەو ترسەمان هەیە وەک عێراق چ لەناوخۆی عێراق، یاخود وڵاتانی دەوروبەر و تەنانەت هاوپەیمانانیش داعش وەک کارتی فشار بەرامبەر عێراق بەکاربهێنرێتەوە، ئێمە ڕۆژانە لە شاری موسڵین و لەناو خەڵکداین و سەردانی خەڵک و بەرپرسانیش دەکەین، ترسی دووبارە ئاوارە بوونەوەی خەڵک و فرۆشتنەوەی موسڵ بەئاشکرا بە خەڵک و بەرپرسانەوە دیارە، کاریکردووتە سەر بازاڕ و بازرگانی و ژیانی خەڵک، خەڵک ئێستا غەشیم نەماوە، بۆ لەم کاتەدا کە دۆخی ناوچەکە بەوجۆرەیە، شەڕی ئیسڕائیل هەیە، بەڵام لە حەسەکەوە ئەو چەکدارە داعشانە ئازاد دەکرێن؟!
خەڵکی موسڵ لەوە دەترسن ئەم دۆخە هەرێمیەی لە ناوچەکەدا هەیە، ئەو شەڕەی ئیسڕائیل و ئەمەریکا و باشوری لوبنان، عێراق تێییدا بە وەکالەت ببێتە قوربانی، بەڵێ ترسی زۆری خەلک لەسەر ئەوەیە، بەڵێ من دووبارەی دەکەمەوە.
کاتی خۆی کە داعش موسڵی گرت، سێ فرقەی سوپای عێراق، ١٧ فەوجی پشتیوانی هێزەکانی عێراق بەجۆرەها چەکی قورسەوە لە ماوەی چەند سەعاتێکدا شکستی بەرامبەر ٣٠٠ چەکداری داعش هێنا، بۆیە ئێمە دەڵێین ئەوکات موسڵ فرۆشرا، ئێستاش ئەو ترسەمان هەیە وەک عێراق، کە عێراق بەوەکالەت بکرێتە قوربانی ئەو شەڕەی لەغەززە و یەمەن و باشوری لوبنان هەیە، لەکاتێکدا ئەوە شەڕی عێراق نیە.
ئێمە ترسمان هەیە عێراق بکرێتە قوربانی ڕێککەوتنێک یا خیانەتێک بۆ ئەو شەڕەی لە ناوچەکە هەیە، بینیمان لە ڕیفراندۆم خیانەت لە کورد کرا، ئێستاش عێراق بە دەستی خۆی نیە ئەگەر بکرێنە قوربانی ئەو شەڕەی لە فەلەستین و ناوچەکەدا هەیە، وە هێزەکانی عێراقیش بەوجۆرە بەهێز نیە، بڕوابکەن ئێمە ئەگەر وەک لیژنە سەردانیان بکەین دەیبینین لە ٢٥%ی هێزەکانی عێراق بنەمایان نیە، بینیمان لە بەغداد چەند کەسێک هێرشییان کردە سەر براندە ئەمەریکییەکان دەمانبینی کە چەند ئۆتۆمبێلێکی پۆلیس هیچ کاردانەوەی نەبوو وێنەی دەگرتن تەنها، بۆیە ئەو هێزانە هیچ ئینتمایەکی نیشتمانیان نەماوە.
نازم هەرکی:
لە دوای ئازادکردنی ئەو تیرۆریستانە لە سوریا، ترس و دڵەڕاوکێ بەپارێزگای نەینەواوە دیارە چونکە هاوسنورە لەگەڵ سوریا، خەڵکی نەینەوا ترسی هەیە داعش بەهێزەوە بگەڕێتەوە، بەتایبەت لە شەنگال تا بە عاج کە هاوسنورە لەگەڵ سوریا شانەی نوستووی زۆری داعشی لێیە، بۆیە ئازادکردنی ئەو تیرۆریستانە لە سوریا ورە بەو شانە نوستووانە دەدات، لەلایەکیش دڵە ڕاوکێی بۆ خەڵکی نەینەوا دروستکردووە لەترسی گەڕانەوەی داعش، شڵەژانێکی ئیداریشی لە سنورەکە دروستکردووە، بە بۆچونی من ئازادکردنی ئەو تیرۆریستانە لە سوریا هەروا بەسادەیی نەبووە، بەڵکو دەستێک و مەبەستێکی سیاسی لەپشتبووە.
ئێستا موسڵ لە ڕووی ئەمنی و ئیدارییەوە کەوتووەتە حاڵەتی ئامادەباشییەوە، سەبارەت بەدەنگۆی هێرشکردن و هاتنەوەی داعش.