سەرۆکی پارتی سۆسیال دیموکراتی کوردستان ڕایدەگەیەنێت، تەنها کورد خۆی بە خاوەنی کەرکوک نازانێت، ئەگینا 22 دەوڵەتی عەرەبی و ئێران و تورکیاش خۆیان بە خاوەنی کەرکوک دەزانن و هەرکات ناوی کەرکوک دەهێنرێت هەموو ئەو وڵاتانە دێنە سەر خەت.
محەمەد حاجی مەحمود، سەرۆکی پارتی سۆسیال دیموکراتی کوردستان، بە دەنگی ئەمەریکای ڕاگەیاند،"کەرکوک خاکی کوردستانە و ژمارەی گۆڕی کوردەکان لەو پارێزگایە لە ژمارەی زیندووی پێکهاتەکانی تر زیاترە، بەڵام کورد یەکگرتوو نییە و خۆی بە خاوەنی کەرکوک نازانێت."
شەوی 10ی مانگی هەشتی 2024، فراکسیۆنی یەکێتی و کوتلەی بابلیۆن و سێ ئەندامی عەرەبی ئەنجومەنی پارێزگای کەرکوک، بە بێ پارتی و بەرەی تورکمانی و هاوپەیمانی عەرەبی لە ئوتێل رەشیدی شاری بەغدا کۆبوونەوەو پێکهێنانی حکومەتی خۆجێی کەرکوکیان ڕاگەیاند.
بەپێی ڕێککەوتنی لایەنە پێکهێنەرەکانی حکومەتی خۆجێی کەرکوک، ڕێبوار تەها پۆستی پارێزگاری کەرکوکی وەرگرت، پۆستی سەرۆکی ئەنجومەنی پارێزگا و جێگری پارێزگاریش بەر عەرەبی سونە کەوتن، هەروەها چەند پۆستێکی تری پارێزگاکە بۆ تورکمان جێهێڵران.
محەمەد حاجی مەحمود دەڵێت،"وردەکاری ڕێککەوتنەکەی کەرکوک نازانم، گەر پۆستی پارێزگار دوو ساڵ بە دوو ساڵ و بە نۆرە بێت کارێکی هەڵەیە، بەڵام دانانی پارێزگارێکی کورد بۆ کەرکوک لە دوای هەشت ساڵ کارێکی باشە، هەرچەندە دەبووایە یەکێتی و پارتی پێکەوە بوونایە لە کەرکوک."
بڕیارە لە ڕۆژی 20 ی مانگی دەی ساڵی 2024، هەڵبژاردنی پەرلەمانی کوردستان ئەنجام بدرێت، بەڵام لێدوانی بەشێک لە سەرکردەی لایەنە سیاسییەکان ئاماژەی ئەوەی تێدایە هێشتا لەمپەر لە بەردەم پرۆسەکەدا بوونی هەیە.
تا ئێستا سەرۆکایەتی هەرێمی کوردستان شەش جار وادەی هەڵبژاردنی پەرلەمانی کوردستانی دیاری کردووە، بەڵام ناکۆکی نێوان لایەنە سیاسییەکان ڕێگربوو لەبەردەم پرۆسەی هەڵبژاردن لەو وادانەی کە دیاریکران.
سەرۆکایەتی هەرێمی کوردستان یەکەم مەرسومی بۆ ئەنجامدانی هەڵبژاردن لە ساڵی 2022 دەرکردو ڕۆژی 24 ی مانگی 2 ی هەمان ساڵی بۆ ئەنجامدانی پرۆسەکە دیاریکرد، بەڵام نەتوانرا لەو وادەیەدا هەڵبژاردن ئەنجام بدرێت. بەپێی مەرسومی شەشەمی سەرۆکایەتی هەرێمی کوردستان ڕۆژی 20 ی مانگی دەی ئەمساڵ بۆ ئەنجامدانی هەڵبژاردن دیاریکراوە.
سەرۆکی پارتی سۆسیال دیموکراتی کوردستان دەڵێت،"ئاماژەکان دەریدەخەن لە مانگی 10 ی ئەمساڵ هەڵبژاردن بەڕێوەدەچێت، بە تایبەت تەمەنی کۆمیسیۆنی هەڵبژاردنی عێراق بۆ کاتێکی دیاریکراوو بۆ سەرپەرشتیکردنی هەڵبژاردنی پەرلەمانی کوردستان درێژکراوەتەوە."
هەروەها وتیشی،"کۆمەڵێک دادوەر بۆ کۆمیسیۆنی هەڵبژاردن زیادکراون و کۆمیسیۆن لە هەولێرەوە سەرپەرشتی هەڵبژاردن دەکات، هەروەها دەنگەکان بە ئەلیکترۆنی و ژماردنی دەستیشیان بۆ دەکرێت، نزیکەی 450 هەزار دەنگدەریش کارتی دەنگدانیان وەرگرتووەتەوە، ئەمانە ئاماژەن بۆ ئەنجامدانی هەڵبژاردن."
لەکاتێکدا کەمتر لە دوو مانگی ماوە بۆ ئەنجامدانی هەڵبژاردنی پەرلەمانی کوردستان، بەڵام ناکۆکی قوڵ لە نێوان یەکێتی و پارتیدا لەسەر چۆنیەتی بەڕێوەبردنی هەرێمی کوردستان و بەشداریکردنی یەکێتی لە حکومەتی خۆجێی نەینەواو کەرکوک بە بێ پارتی دروستبووە.
محەمەدی حاجی مەحمود پێیوایە، دوای بەڕێوەچوونی هەڵبژاردنی پەرلەمانی کوردستان و تێگەیشتنی لایەنەکان لە قەبارەی خۆیان دۆخەکە هێور دەبێتەوە، بەڵام پێش هەڵبژاردن گوتاری ڕاگەیاندنی لایەنەکان ئاگرین دەبێت بەرامبەر بە یەکتری.
سەرۆکی پارتی سۆسیال دیموکراتی کوردستان دەڵێت،"پێموانییە هەڵبژاردن نەخشەی سیاسی هەرێم بگۆڕێت، چونکە لە ساڵی 1992 ەوە تا ئێستا هەڵبژاردن ئەنجام دەدرێت، بەڵام پۆستە گرنگەکانی وەکو سەرۆکی هەرێم و سەرۆکی حکومەت و سەرۆکی پەرلەمان و جێگرەکانیان هەر لای یەکێتی و پارتین."
محەمەد حاجی مەحمود وتی،"ڕەنگە هەڵبژاردن نەخشەی ناو پەرلەمان بگۆڕێت، وەکو چۆن پێشتر گۆڕان 25 کورسی بەدەستهێناو لایەنەکانی تریش هەریەکەو بەجۆرێک دەنگی هەبوو، بەڵام باوەڕ ناکەم زۆر گۆڕانکاری ڕوو بدات، ڕەنگە لیستە تازەکان دەنگ بهێنن، بەڵام ناتوانرێ نەخشەی کوردستان بگۆڕدرێت."
ناکۆکی نێوان یەکێتی و پارتی گەیشتووەتە ئاستێک ماوەیەکی زۆرە سەرۆکی هەردوو حزبەکە پێکەوە کۆنەبوونەتەوەو بەرپرسانی هەردوو دژی یەکتری قسە دەکەن، هەوڵەکانی چەند مانگی ڕابردووش بۆ لەیەکتری نزیککردنەوەیان شکستیان هێنا.
سەرۆکی پارتی سۆسیال دیموکراتی کوردستان، لەبارەی هەوڵەکانی بۆ نێوەنگیری کردنی یەکێتی و پارتی دەڵێت،"بە پەیام و نامەو قسەکردن هەوڵی کۆبوونەوەمان دا لە نێوان یەکێتی و پارتی، دواجاریش کاک مەسعودم بینی لەگەڵ چارەسەرکردنی کێشەکان بوو لە ڕێگەی گفتووگۆوە، هیچ لایەکیشیان دژی گفتووگۆ نین، بەڵام هێشتا مەسەلەکە ماوە."
ئەو وتیشی،"یەکێتی و پارتی تا ئێستا شەریکن لە حکومەت، شەریکن لە پێشمەرگەو وەزارەتەکان، شەریکن لەو پارەیەی لە ئەمەریکا وەردەگیرێت، شەریکن لە گومرگ و پەیوەندییەکان. باوەڕ ناکەم کێشەکان بگەنە ئەو ئاستەی شتی خراپ ڕووبدات، چونکە بەرژەوەندییەکان ئەوەندە گەورەن هیچ لایەک بیر لە کێشە ناکاتەوە، ململانێ لە پێش هەڵبژاردن ڕوو دەدات، بەڵام دوای هەڵبژاردن ناچارن پێکەوە گفتووگۆ بکەن."