بە تۆمەتی ئەوەی لەکاتی تێپەڕینی ئۆتۆمبێلی سەرۆکی تورکیا سوکایەتی کردووە بە ڕەجەب تەیب ئەردۆغان، مێرمنداڵێکی تەمەن 16 ساڵان لە شاری ئیستانبوڵ ڕووبەڕووی یاسا کراوەتەوە.
بە گوێرەی ڕۆژنامەی بیرگوون، مێرمنداڵەکە خەڵکی ئیستانبوڵە و داواکاری گشتی بەوە تۆمەتباری کردووە مانگی پێنجی ئەمساڵ لە کاتی تێپەڕینی ئۆتۆمبێلی ئەردۆغان جنێوی داوە.
مێرمنداڵەکە گوتویەتی بەهۆی خێرایی تێپەڕینی ئۆتۆمبێلەکان ترساوە و بە ڕۆژنامەکەی وتووە، "نەمدەزانی بەرپرسێکی حکومەت، لەنێوانیان سەرۆک، لەناو ئۆتۆمبێلەکەدا هەیە. سوکایەتیم بە سەرۆککۆمار و هیچ بەرپرسێکی حکومی نەکردووە. من خوێندکارێکی ئامادەییم و هەرگیز هیچ تاوانێکم نەکردووە. کاردانەوەکەم بە هەڵە لێکدراوەتەوە بەهۆی ئەو ترسەی لە کاتی تێپەڕبوونی ئۆتۆمبێلەکان دووچاری بووم. من جنێوم نەدا، تەنها ترسام و بەهۆیەوە کاردانەوەم هەبوو."
ڕۆژنامەی بیرگوون دەڵێت دادگای ئیسانبوڵ مێرمنداڵەکەی ئازادکردووە، بەڵام بە چەند مەرجێک، لەوانە قەدەغەکردنی گەشتی دەرەکی و هەروەها پەیوەستکردنی بە سەردانی هەفتانەی بۆ بنکەی پۆلیس.
پەڕاوی تۆمەتبارکردنی مێرمنداڵەکە ئەم مانگە ئامادەکراوە و داواکاری گشتی داوای سزادانی دەکات بە تۆمەتی "سوکایەتی کردن بە سەرۆک."