فیراس ئەبیەز، وەزیری تەندروستی لوبنان لە کۆنگرەیەکی ڕۆژنامەوانی ڕایگەیاند ئەو ئامێری پەیجەرانەی ڕۆژی سێشەممە لە سەرانسەری وڵاتدا تەقینەوە بوونە مایەی گیان لەدەستدانی 8 کەس کە یەکێکیان ژنە و نزیکەی 2750 کەسیش برینداربوون، لەوانە 200 کەسیان برینەکانیان قورسە.
سەرچاوەیەکی نزیک لە حزبوڵڵا بە فڕانس پرێسی وتووە دەیان ئەندامی حزبوڵڵا لە باشوری لوبنان و ناوچەی باشوری بەیرووتی پایتەخت بە تەقینەوەی ئەو ئامێرانە پێوەبوون.
هەروەها باڵیۆزی ئێران بۆ لوبنان، موجتەبا ئەمانی ئەویش برینداربووە و بەپێی تەلەفیزیۆنی ئێران، ناوبراو برینەکانی سووکە.
ئەمبوڵانسەکان لە چەندین ناوچە ژمارەی زۆری بریندارانیان بۆ نەخۆشخانەکان بردووە و لە هەندێک نەخۆشخانە لەبەر نەبوونی جێگا بریندارەکان لە سەر زەوییەکە کەوتوون.
حزبوڵڵا دەڵێت ئیسرائیل لە پشت ئەم تەقینەوانەوەیە. دەشڵێت تۆڵەی خۆی دەکاتەوە.
هەتا ئامادەکردنی ئەم هەواڵە ئیسرائیل بە فەرمی هیچ لێدوانێکی لەم بارەیەوە نەداوە.
سەرچاوە/ فڕانس پرێس