پاش ئەوەی گرووپی هەیئەت تەحریر ئەلشام (HTS) و هاوپەیمانەکانی سەر بە تورکیا لە سوریا هێرشیان بۆ سەر شاری حەلەب دەستپێکرد و چەند گەڕەکێکی شارەکەیان کۆنترۆڵ کرد هێزەکانی سوریای دیموکراتیش نیگەرانی ڕاگەیاند.
ئۆفیسی ڕاگەیاندنی هێزەکان سوریای دیموکراتیک ڕایگەیاندووە ئەرکی سەرەکیان پاراستنی گەل و ناچەکانیانە.
فەرهاد شامی بەرپرسی ئۆفیسی ڕاگەیاندنی هێزەکانی سوریای دیموکراتیک لە تویتێکدا دەڵێت "پێشهاتەکانی باکووری ڕۆژئاوای سوریا هەستیارن و ڕاستەوخۆ گرنگی بۆ ئێمە هەیە. ئێمەش لە نزیکەوە بەدواداچوونیان بۆ دەکەین هەرچییەک ڕووبدات، ئێمە ئەولەویەتێکی نیشتمانی و ئەخلاقیمان هەیە، ئەویش پاراستنی گەلەکەمان و ناوچەکانمانە، بۆیە هەڵوێست و کاردانەوەمان بەپێی پێویستی بۆ پاراستنی گەلەکەمان دەبێت."
حەلەب لە ساڵی 2016 وە لە ژێر دەسەڵاتی حکومەتی سوریا و هاوپەیمانەکانیدایە، بەڵام لە ناو حەلەبدا دوو گەڕەک بە ناوەکانی شێخ مەقسود و ئەشرفەییە کە کوردنشینن لە ژێر دەستی هێزە کوردییەکاندان.
هەتا ئامادەکردنی ئەم هەواڵە گرووپە چەکدارەکانی سەر بە تورکیا لە سوریا نەگەیشتوونەتە ئەو گەڕەکانە.
