عامر نوری، وتەبێژی فەرماندەیی پۆلیسی کەرکوک، بە دەنگی ئەمەریکای ڕاگەیاند،"پێشتر چەند کەسێک لە ناحیەی حەویجە ئاڵای داعشیان هەڵکردبوو، بەڵام لەلایەن دەزگا ئەمنییەکانی عێراقەوە دەستگیرکراون و ڕێوشوێنی یاساییان بەرامبەر گیراوەتەبەر."
ئەو وتیشی،"ئەمڕۆ هەینی، پڕوپاگەندەی هەڵکردنی ئاڵای داعش لە گوندێکی باشوری کەرکوک بڵاوکرایەوە، بەڵام پۆلیس و هێزە ئەمنییەکان ڕێوشوێنی پێویستییان گرتەبەر و هیچ شتێک لەگۆڕێ نەبوو."
شەوی 13 ی مانگی 12 ی 2024، هێزە ئەمنییەکانی کەرکوک خۆکوژێکیان لە قەزای داقوقی باشوری پارێزگاکە کوشت، لەکاتێکدا هەوڵی خۆ تەقاندنەوەی دابوو لە ڕێگەی پشتێنی بۆمبڕێژکراوەوە.
لە ڕۆژی 23 ی مانگی ڕابردوو، دەزگای ئاسایشی نیشتمانی عێراق ڕایگەیاند،"ئەمیری هەرێمی کوردستانی داعش و شەش کەسی تر لە کەرکوک دەستگیرکران، لە کاتی دەستگیرکردنیاندا نووسراوی نهێنی و بڵاوکراوەی داعشیان پێبووە، هەروەها پلانی بە ئامانجکردنی کەسایەتییە ئەمنی و دامودەزگا حکومییەکانیان هەبووە."
عامر نوری، وتەبێژی پۆلیسی کەرکوک دەڵێت،"ناحیەی حەویجەی ڕۆژاوای کەرکوک لە ڕابردوودا پێگەی داعش بوو، بەڵام خەڵکی ئەو ناوچەیە بێزارن لە کوشتن و بڕین و وێرانەبوونی ناوچەکەیان، بۆیە ڕێگە نادەن داعش سەرهەڵبداتەوە."
دوای سەرهەڵدانی داعش لە ساڵی 2014، پارێزگاکانی نەینەوا و ئەنبار، بەشێک لە پارێزگاکانی دیالە و سەڵاحەدین و کەرکوک لەلایەن ئەو ڕێکخراوەوە کۆنترۆڵکران، لە ئێستادا چاوی هێزە ئەمنییەکان بۆ ڕێگرتن لە سەرهەڵدانەوەی داعش لەسەر ئەو ناوچانەیە.
هەرچەندە پارێزگا سونەنیشینەکانی عێراق بەهۆی جیاوازی تایەفی و ناکۆکی سیاسی تەبا نین لەگەڵ هێزە شیعە حوکمڕانییەکانی عێراق دا، بەڵام زیانی گەورەی مرۆیی و ماددیشیان لە بوونی داعش کرد، بۆیە پێناچێت جارێکی تر ڕێگە بە دووبارەبوونەوەی ئەزموونی داعش بدەن.
سەعید مەم و زینی، وتەبێژی لقی نەینەوای پارتی دیموکراتی کوردستان، بە دەنگی ئەمەریکای ڕاگەیاند،"موسڵ بێ مەترسی نییە، چونکە داعش شانەی نووستووی هەیە و مەترسییەکان بەردەوامن، بەڵام جموجۆڵی داعش زیاتر دەکەوێتە لای شەرگات و ئەو ناوچانە، بە تایبەت ئەگەر هێزە عێراقییەکان سنووری سوریا کۆنترۆڵ نەکەن مەترسی زیاتر دروست دەبێت."
ئەو وتیشی،"خەڵک بە گشتی لە موسڵ ترسیان لە سەرهەڵدانەوەی داعش هەیە، چونکە ئێستا دۆخی ئەمنی موسڵ سەقامگیرە و خەڵک ترسی لە ئاڵۆزبوونەوەی دۆخەکە هەیە."
بیابانەکانی پارێزگی ئەنبار و ناوچە دەشتاوییەکانی پارێزگای نەینەوا، هەروەها گوندە دوورە دەستەکانی پارێزگاکانی دیالە و سەڵاحەدین، ئەو ناوچانەن هێشتا چەکدارەکانی داعش تێیاندا جموجۆڵ و چالاکییان هەیە.
ناوچەی غەڕە و پەڵکانەی نێوان پارێزگای کەرکوک و سەڵاحەدین و ناوچەی گەرمیان یەکێکە لە پێگە سەرەکییەکانی داعش، کە داعش لەو ناوچەیەوە چەکدارەکانی بە پارێزگاکاندا دابەش دەکات.
سەرچاوەیەکی ئەمنی بەرپرس لە ناوچەی غەڕە و پەڵکانە کە نەیویست ناوی بڵاوبکرێتەوە، بە دەنگی ئەمەریکای ڕاگەیاند،"چەند شەوێک دوای کەوتنی ڕژێمی ئەسەد لە سوریا، داعش لە غەڕە و پەڵکانە نمایشێکی سەربازییان بە 12 ماتۆڕسکیلەوە ئەنجامدا، بەڵام دواتر دەنگیان نەماو جوڵەیان نییە."
هەرچەندە دەستەی تەحریر شام کە جڵەوی دەسەڵاتی لە سوریا گرتووەتەدەست بوونی پەیوەندی لەگەڵ داعش و ڕێکخراوە توندڕەوەکان ڕەتدەکاتەوە، بەڵام بە ڕای چاودێران سەرکەوتنی ئەو هێزە لە ڕووی مەعنەوییەوە کاریگەری لەسەر ورەی داعش دروست دەکات.
سەردار عەبدوڵا، چاودێری سیاسی و ئەندامی پێشووی ئەنجومەنی نوێنەرانی عێراق، بە دەنگی ئەمەریکای ڕاگەیاند،"داعش یەکێکە لە بۆمبە تەوقیتکراوەکان، دوور نییە دەستێک هەبێت بۆ ئازادکردنی داعشە دەستگیرکراوەکانی سوریا، ئەمە مایەی مەترسییە بۆ ئاسایشی سوریا و عێراق و ناوچەکە، ئەگەر داعش زیندوو ببێتەوە دۆخەکە دەگەڕێتەوە خاڵی سفر."
ئەو وتیشی،"بەرژەوەندی نێودەوڵەتی و وڵاتانی عەرەبی و ئیقلیمیش ناخوازێت بەهۆی سەرهەڵدانەوەی داعش جارێکی تر ئاڵۆزی دروست ببێتەوە."
لە پەیوەندییەکی تەلەفۆنیدا لەگەڵ وەزیری دەوڵەتی بەریتانیا بۆ کاروباری ڕۆژهەڵاتی ناوەڕاست و باکوری ئەفریقا، فوئاد حسێن وەزیری دەرەوەی عێراق، هۆشداری دا لە خۆ ڕێکخستنەوەی داعش و دەستبەسەرداگرتنی بڕێکی زۆری چەک و تەقەمەنی لەلایەن ئەو ڕێکخراوەوە بەهۆی ڕووخانی رژێمی ئەسەد.
فوئاد حسێن ڕایگەیاندووە،"هەڵاتنی ئەندامانی داعش لە زیندانەکان و تێکچوونی بارودۆخ لە کەمپی هول مەترسیدارە و ڕەنگدانەوەی لەسەر دۆخی ئەمنی سوریا و عێراق دەبێت."
