ئیسرائیلییەکان ئێجگار واقیان وڕماوە پاش ئەوەی بۆیان دەرکەوتووە لە نێوەندی ئەو شەڕەی دژ بە ئێران دوژمنە سەرسەختەکەی و حەماس و حزبوڵای سەر بە ئێران دەیکات، تاران بە درێژایی مێژووی وڵاتەکە لە هەموو کاتێک زیاتر هاووڵاتی ئیسرائیلی بەکارهێناوە بۆ سیخوڕایەتیکردن.
هەتا ئێستا دوو کەس دەستگیرکراون و سەربازی یەدەکن لە لەشکردا و پۆلیسی ئیسرائیل دەڵێت یەکێکیان زانیاری نهێنی داوە بە ئێرانییەکان سەبارەت بە سیستەمی بەرگریی دژە موشەک.
لە هێرشە موشەکییە باڵستیکییەکانی مانگی 4 و 10ی ڕابردوودا، ئێران ژمارەیەک بنکەی سەربازیی کردبووە ئامانج؛ شیکەرەوە ئاسایشییە ئیسرائیلییەکان دەڵێن ئەو هێرشانە تا ئەندازەیەک بە پشتبەستن بووە بەو زانیاریانەی سیخوڕەکان داویانەتە ئێران.
ئیاڵ پینکۆ لە زانکۆی بار ئیلان دەڵێت " دەزانین هاوکاتی یەکەم هێرشی ئێران، تۆپخانەی جۆلان و هەروەهاش ڕافائێل لە باکور، ئەو بنکانە بوون کە ئێرانییەکان کردبوویانە ئامانج بە یارمەتی ئەوانەی دەچوونە ئەو بنکانە تا لە دەرەوە وێنەیان بگرن بە بەکارهێنانی سیستەمی وردی جی پی ئێس."
ئەو دوو سەربازە یەدەکەی دەستگیرکراون، خرانە پاڵ ئەو نزیکەی 30 کەسەی تری دەستگیرکرابوون لەوەتای شەڕ دەستیپێکردوە و گوناهباریش کراون بە سیخوڕایەتیکردن بۆ ئێران.
ژمارەیەکی زۆری گومانبار هەن بە سیخوڕایەتی کردن، هەربۆیەشە دەزگای زیندانەکانی ئیسرائیل بەشێکی نوێی کردۆتەوە لە زیندانی ڕایمۆنیم بۆ ئەو گومانبارانە و لە ڕەوشێکی خراپی وەک ڕەوشی ئەو میلیشیایانەی حەماسدان کە بە هێرشی تێرۆریستی گوناهبار کراون.
ڕاپۆرتەکانی تەلەفزیۆنی ئیسرائیل دەڵێن ئێران بە دانانی پارەیەکی زۆر خەڵک بۆخۆی ڕادەکێشێت و ئاپی پەیامەکانی تێلگرامیش بەکاردەهێنێت.
بڕە پارەکانیش لە 20 دۆلارەوە دەستپێدەکات بۆ نوسینی دژە حکومەت لەسەر دیوارەکان تا دەگاتە 4000 دۆلار بۆ ڕفاندنی کاربەدەستانی ئیسرائیلیی.
تا ئێستا وەک شیکەرەوە دەڵێن، گومانبارە سیخوڕەکان بەر لەوەی دەستێکی گەورە بوەشێنن، دەستگیرکراون.
نزیکەی هەر هەموو ئەوانەی ساڵی پار بە گومانی سیخوڕایەتی دەستگیرکراون ئەو کۆچبەرە ڕوسیاییانەن کە لە ئیسرائیلن
دەوڵەتی جوو، میوانداریی زیاتر لە یەک ملیۆن کۆچبەری ڕوسیایی کردووە و ئەو کۆچبەرانەش کێشەی بژێوییان هەیە و گازەندەشیان هەبووە کە دامەزراوە ئیسرائیلییەکان پشتیوانی داراییان نەکردوون. هەندێکیش لەوانەی دەستگیرکراون، ئاماژەیان بەوە کردووە هۆکاری دارایی ئەو کارەیان پێکردوون.
چەک فریلیچ، لە نێوەندی توێژینەوەی ئاسایشی نیشتمانی، دەڵێت هەندێک لە کۆچبەرە ڕوسیاییەکان لە ئیسرائیل، بەتایبەتی بەهۆی کێشەی ئابورییەوە کە وەک بەرەنجامێکی شەڕە، زیانی قورسیان لێکەوتووە، یانیش بەهۆی درێژکردنەوەی خزمەتی سەربازییەوە."
هەڵمەتە سەرکەوتووانەکەی ئێران بۆ کردنی خەڵک بە سیخوڕ لە ئیسرائیلدا، هاوکاتی هەروادێ و زیاتر بوونی چاوەڕوانییەکانە بۆ هێرشی تەلئەڤیڤ لە مانگەکانی داهاتوودا بۆ سەر دامەزراوە ناوکییەکانی ئێران، وەک شیکەرەوە ئیسرائیلییەکان باسی دەکەن.