دۆسیەی ئەو دوو ڕۆژنامەنووسەی ڕووماڵی گیانلەدەستدانی ژینا ئەمینیان کردبوو، دادەخرێت

دۆسیەی دوو ڕۆژنامەنووس کە بەهۆی ڕووماڵکردنی هەواڵی کوژرانی ژینا ئەمینیەوە بۆ چەندین مانگ زیندانیکرابوون و سزای قورسیان بۆدەرکرابوو، بە گوتەی پارێزەرەکانیان "داخراوە".

دۆسیەی نیلوفەر حامێدی، ڕۆژنامەنووسی دەستبەسەرکراو، ڕۆژی سێشەممە 11ی مانگی دوو بە پشتبەستن بە بڕیاری کۆتایی دادگای پێداچوونەوەی پارێزگای تاران داخراوە.

بەپێی هەواڵی میدیا ناوخۆییەکان، نیلوفەر حامێدی، ڕۆژنامەنووسێک کە تۆمەتبارکرابوو بە "هاوکاری لەگەڵ حکومەتێکی دوژمنکارانەی بیانی" بە تۆمەتی ڕاپۆرتکردن لەسەر کوشتنی ژینا ئەمینی لە ژێر دەستی پۆلیسی ئاکاردا دوای هەوڵێکی زۆری پارێزەرەکانی، بە بێتاوان دەرچووە و دۆسیەکەی داخراوە.

پارێزەرانی ئەو ڕۆژنامەنووسە ڕایانگەیاند بە پشتبەستن بە بڕیاری کۆتایی دادگای تێهەڵچوونەوەی پارێزگای تاران، حامێدی لە تۆمەتی "هاوکاری لەگەڵ حکومەتێکی بیانی دوژمنکارانه"بە بێتاوان دەرچووە و بۆ تۆمەتی دیکەش لێبوردنی پێدراوە.

هەروەها شەهاب میرلۆحی، پارێزەری ئیلاهە محەمەدی باس لەوە دەکات کە ئەو رۆژنامەوانە لێخۆشبونی بۆ دەرچووە و دۆسیەکەی داخراوە.

حکومەتی ویلایەتە یەکگرتووەکانی ئەمەریکا چەندین جار پەیوەندی یان هاوکاری لەگەڵ ئەو ڕۆژنامەنووسانە ڕەتکردووەتەوە و دەرکردنی ئەو جۆرە سزانەی بە هەوڵێکی کۆماری ئیسلامی ئێران بۆ سەرکوتکردنی ئازادی ڕادەربڕین لە ئێران ناودێر کردووە.

نیلوفەر حامێدی ماوەی 17 مانگ لە دەستبەسەریدا بووە و دواجار لە مانگی یەکی ساڵی ڕابردوو بە کەفالەتی سەد ملیار ڕیاڵ بە شێوەیەکی کاتی لە زیندان ئازاد کراوە. بەڵام چارەنووسی دۆسیەکەی ناڕوون بوو تا ئیستا کە دادگای تێهەڵچوونەوەی پارێزگای تاران بڕیاری بێتاوانی لە یەکێک لە تۆمەتە سەرەکییەکاندا بۆ دەرکردووە و لێبوردنی بۆ تۆمەتەکانی دیکەش دەکردووە.

نیلوفەر حامێدی کە لە مانگی نۆی ساڵی 2022 دوای گیانلەدەستدانی ژینا ئەمینی دەستبەسەر کرابوو، لەلایەن لقی 15ی دادگای ئینقلابی تارانەوە 7 ساڵ سزای زیندانیکردن بە تۆمەتی "هاوکاری لەگەڵ حکومەتێکی دوژمنکارانە"، 5 ساڵ زیندان بە تۆمەتی "کۆبوونەوە و هاوکاری دژ بە ئاسایشی نەتەوەیی" و ساڵێک بە تۆمەتی "چالاکی تەبلیغی دژی ڕێژیم" سزای بۆ دەرکرابوو.

هەروەها ئیلاهە محەممەدی لە مانگی نۆی ساڵی 2022 دوای ڕووماڵکردنی پرسەی ژینا ئەمینی لە سەقز دەستبەسەر کرا و ماوەی 17 مانگ لە زیندا بوو. ناوبراو لەلایەن دادگای ئینقلابی ئیسلامی تاران بە تۆمەتی "هاوکاری لەگەڵ ئەمەریکا"، "کۆبوونەوە و هاوکاری بۆ ئەنجامدانی تاوانی دژ بە ئاسایشی نەتەوەیی" و "چالاکی تەبلیغی دژی نیزام" دادگایی کرا و بە کۆی گشتی 12 ساڵ زیندانیکردنی بۆدەرکرا.

بەپێی ڕاپۆرتی CPJ، دەسەڵاتدارانی ئێران لانیکەم 95 ڕۆژنامەنووسیان لە دوای ناڕەزایەتییە سەرتاسەرییەکانی دوای گیانلەدەستدانی ئەمینی دەستبەسەر کردووە.

لە ساڵی 2024 ئێران لەکۆی 180 وڵات لە پێوەرەکانی ئازادی ڕۆژنامەگەری جیهانیدا، لە ڕیزبەندی 176 وڵاتدایە کە ڕێزبەندی 180 خراپترین ژینگە بۆ ئازادی ڕۆژنامەگەری نیشان دەدات.