دوو ڕێکخراوی مافی مرۆڤ لە ڕاپۆرتی ساڵانەی نوێی خۆیاندا ڕایانگەیاندووە حکومەتی ئێران لە ماوەی ساڵی ڕابردوودا، 975 کەسی لە سێدارە داوە.
تا ئێستاش ئێران لە دوای چین زۆرترین ژمارەی لەسێدارەدانی هەیە.
ڕێکخراوی 'مافی مرۆڤی ئێران' کە بنکەکەی لە نۆروێژە و ڕێکخراوی 'پێکەوە دژی سزای لە سێدارەدان'ی فەڕەنسی لەم ڕاپۆرتەدا کە ڕۆژی پێنجشەممە،20ی مانگی دوو بڵاویانکردووەتەوە باس لە "زیادبوونی ترسناک"ی ژمارەی لەسێدرەدانەکان لە ئێران دەکات.
لە ڕاپۆرتەکەدا ئاماژە بەوە کراوە لەوەتای ڕێکخراوی مافی مرۆڤی ئێران لە ئۆسلۆ دەستی کردووە بە تۆمارکردنی ژمارەی لەسێدارەدانەکان لە ساڵی 2008ەوە، ئەمە بەرزترین ژمارەی لەسێدارەدانەکانە.
دوو ڕێکخراوی مافی مرۆڤ لە ڕاپۆرتی هاوبەشی خۆیاندا کۆماری ئیسلامییان بەوە تۆمەتبار کردووە کە بە درێژایی ساڵانی حوکمڕانی لە سێدارەدان وەک "ئامرازی سەرەکی سەرکوتی سیاسی" کەڵک وەردەگرێت.
زیادبوونی ژمارەی لەسێدارەدانەکان لە ساڵی 2024دا بە بەراورد بە 834 لەسێدارەدان لە ساڵی 2023دا بە ڕێژەی لەسەدا 17 زیادی کردووە.
هەروەها لە کۆی ئەو 975 کەسەی ساڵی ڕابردوو لە سێدارە دراون، چوار کەسیان لەبەرچاوی خەڵک لە سێدارە دراون و 31 کەسیشیان ژن بوون. بەپێی ڕاپۆرتەکەی ئەو دوو ڕێکخراوی مافی مرۆڤ، ئەمە زۆرترین ژمارەی لەسێدارەدانەکانی ژنانە لە ماوەی 17 ساڵی ڕابردوودا.
بەرزبوونەوەی ژمارەی زۆری لەسێدارەدانی ژنان لە ساڵی ڕابردوودا لە کاتێکدایە کە سێ چالاکوانی ژنی دیکە لە ئێستادا لە زیندانەکانی ئێران ڕووبەڕووی سزای لەسێدارەدان بوونەتەوە کە بریتین لە پەخشان عەزیزی، وەریشە مورادی و شەریفە محەمەدی.
بەپێی یاسای ئێران کە لەسەر بنەمای یاسای شەریعەتی ئیسلامی دامەزراوە، سزای لەسێدارەدان بۆ تاوانەکانی وەک کوشتن، دەستدرێژی، تاوانەکانی پەیوەست بە ماددە هۆشبەرەکان و تۆمەتە ناڕوونەکانی وەک "موفسەد فی ئەلئەرز" و "بەغی" جێبەجێ دەکرێت. ئەو تۆمەتانەی کە چالاکوانانی مافی مرۆڤ پێیان وایە دژی نەیارانی سیاسی بەکاردەهێنرێن.