مارکۆ ڕوبیو، وەزیری دەرەوەی ئەمەریکا و محەمەد شیاع ئەلسودانی، سەرۆک وەزیرانی عێراق، ڕۆژی سێشەممە لە پەیوەندییەکی تەلەفۆنیدا جەختیان لەسەر گرنگی هاوبەشی ستراتیژی نێوان واشنتن و بەغدا و کەمکردنەوەی کاریگەریی کارە تێکدەرانەکانی کۆماری ئیسلامی ئێران لە عێراق کردووە.
لەڕاگەیەندراوێکدا کە لەلایەن تامی بروس، وتەبێژی وەزارەتی دەرەوەی ئەمەریکا لە ماڵپەری وەزارەتەکەدا بڵاوکراوەتەوە، ئاماژە بەوە کراوە مارکۆ ڕوبیو، وەزیری دەرەوەی ئەمەریکا و محەمەد شیاع ئەلسودانی، سەرۆک وەزیرانی عێراق هەروەها تاوتوێی بەردەوامی هەوڵەکانیان کردووە بۆ ڕێگریکردن لە تێکدانی سەقامگیریی ناوچەکە و رێگریکردن لە گەڕانەوەی داعش.
وتەبێژی وەزارەتی دەرەوەی ئەمەریکا لە ڕاگەیاندراوەکەدا وتیشی وەزیری دەرەوەی ئەمەریکا و سەرۆکوەزیرانی عێراق بە جەختکردنەوە لەسەر پێویستی سەربەخۆیی وزەی عێراق، هاوکات ڕێککەوتن لەسەر خێراکردنی کردنەوەی بۆریی عێراق-تورکیا و پابەندبوون بە مەرجە گرێبەستییەکانی کۆمپانیا ئەمریکییەکان کە لە عێراق کاردەکەن بەمەبەستی ڕاکێشانی وەبەرهێنانی زیاتر.
لە کۆتاییدا هەردوولا داوای بەردەوامی ڕاوێژکاری دوولایەنەیان کرد سەبارەت بە پرسە ناوچەییەکان و بەهێزکردنی هاوکارییە ئەمنییەکانی نێوان ئەمریکا و عێراق.
وەزیری دەرەوەی ئەمەریکا و سەرۆک وەزیرانی عێراق جەخت لەسەر کەمکردنەوەی کاریگەریی خراپی ئێران دەکەنەوە
