چەند چەکدارێکی نەناسراو تەقەیان لە 3 کارمەندی ژنی کەناڵی ئینعکاس تی‌ڤی شاری جەلال ئەبادی ئەفغانستان کردووە و هەرسێکیان کوشتوون.
زاڵمای لەتیفی بەڕێوەبەری کەناڵەکە بە ئاژانسی دەنگ‌وباسی فڕانس پـرێسی گوت، لەو کاتەی ئەم 3 کارمەندە لە ئۆفیسی کەناڵەکەیانەوە بەرەو ماڵەوە بە پـێ دەگەڕانەوە، کراونەتە ئامانج و کوژراون.
گوتیشی ئەم 3 کارمەندە کە لە بەشی دوبڵاژ کاریان دەکرد، دووانیان لە جادەی بنگڕیوالانو لە نزیک عەرەب پلازا کوژراون و ئەوی دیکەیان لە ناوچەی قەسبی کوژراوە.
کەناڵەکە لە ڕێگەی فەیسبوکەکەیەوە وێنەی 2 لە کارمەندە کوژراوەکانی بڵاوکردووەتەوە لەگەڵ ڕاگەیاندنی سەرۆکایەتی وڵاتەکەی.
سەرۆکایەتی ئەفغانستان هێرشەکەی بە کارێکی تێرۆرستی ناودێرکرد و تاڵیبانی بە بەرپـرسیار دانا.
بەڵام کەناڵەکە دەڵێت زەبیحوڵڵا موجاهید گوتەبێژی تاڵیبان لە ڕێگەی تویتەرەکەیەوە ڕەتیکردووەتەوە ئەوان دەستیان لەو هێرشەدا هەبووبێت.