سەرۆکی کۆمسیۆنی ئەوروپا ئۆرسولا ڤۆن دێرڵاین ڕایگەیاند یەکێتی ئەوروپا 1.5 ملیار یۆرۆ لە داهاتی سەرمایە سڕکراوەکانی ڕووسیا دەگوازێتەوە بۆ ئۆکرانیا.
لە دوای دەستپێکردنی داگیرکارییەکەی ڕووسیاوە لە ئۆکرانیا لە مانگی دووی ساڵی 2022 دا، وڵاتانی ڕۆژئاوا نزیکەی 300 ملیار دۆلارییان لە سەرمایەکانی ڕووسیا سڕکردووە.
مانگی ڕابردوودا وڵاتانی کۆمەڵەی حەوت و یەکێتی ئەوروپا ڕازیبوون بە بەکارهێنانی ئەو داهاتەی کە لە سەرمایەکانی ڕووسیاوە دەستکەوتوون بۆ پێدانی 50 ملیار دۆلار بە ئۆکرانیا وەکو قەرز، ئەمەش بۆ ئەوەی بتوانن یارمەتی ئۆکرانیا بدەن لە بەرگرییەکەیدا دژی داگیرکارییەکەی ڕووسیا. ڕووسیا بەڵێنیداوە ڕێکاری یاسایی بگرێتەبەر.
ڕۆژی هەینی ڤۆن دێرڵاین لە تۆڕی کۆمەڵایەتی ئێکس ڕایگەیاند " ئەمڕۆ 1.5 ملیار دۆلار لە داهاتی سەرمایە سڕکراوەکانی ڕووسیا دەگوازینەوە بۆ بەرگری و ئاوەدانکردنەوەی ئۆکرانیا. هیچ سیمبولێکی باشتر یاخود بەکارهێنانێکی باشتری پارەکەی کرێملن نیە لەوەی کە بەکاربێت بۆ ئەوەی ئۆکرانیا و ئەوروپا ژیانێکی پارێزراوترییان تێدا بێت."
سەرۆک وەزیری ئۆکرانیا دینیس شمیهال سوپاسی یەکێتی ئەوروپای کرد.
وتی " سوپاس ڤۆن دێرڵاین و یەکێتی ئەوروپا بۆ پشتیوانییە جێگیرەکەتان و ئەم یارمەتییە گرنگە بۆ بەرگری و ئاوەدانکردنەوەی ئۆکرانیا. پێکەوە ناخۆشییەکان دەگۆڕین بۆ هێز و بونیادنانی ئەوروپایەکی پارێزراوتر و بەهێزتر."
ڕۆیتەرز ڕۆژی چوارشەممە بڵاویکردەوە وڵاتانی ئەندام لە یەکێتی ئەوروپا تاوتوێی بژاردەکانییان کردووە بۆ درێژکردنەوەی ماوەی سزاکانی سەر سەرمایەکانی بانکی ناوەندی ڕووسیا لە پێناو دەستکەوتنی قەرزێکی کۆمەڵەی حەوتدا بۆ ئۆکرانیا، ئەمەش بەپێی نوسراوێکی یەکێتی ئەوروپا و بەیاننامەکان لە دیبلۆماتکارانەوە.
سەرچاوە/ ڕۆیتەرز
یەکێتی ئەوروپا 1.5 ملیار یۆرۆ لە سەرمایە سڕکراوەکانی ڕووسیا دەگوازێتەوە بۆ ئۆکرانیا
![](https://gdb.voanews.com/01000000-0aff-0242-e5dc-08dca776983f_w250_r1_s.jpg)