دوای کۆبوونەوەکەی نێوان سەرۆکی فەڕەنسا ئیمانوێل ماکرۆن و سەرۆکی ڕووسیا ڤلادیمێر پوتن لە مۆسکۆ، بەرپرسێکی فەڕەنسا وتی پوتن بەڵێنیداوە بۆ ئێستا هیچ مانۆڕێکی سەربازیی نوێ لە نزیک ئۆکرانیا ئەنجام نەدات، ئەوەش وەکو مژدەیەک بۆ ئەگەری کەمکردنەوەی گرژییەکان.
بەرپرسە فەڕەنسییەکە کە نەیویست ناوی ئاشکرا بکات وتی پوتن ڕازیبووە لەسەر ئەوەی ئەو هێزانەی ڕووسیا کە بەشداری لە مەشقە هاوبەشەکاندا دەکەن لە نزیک سنوورەکانی ئۆکرانیا لە بێلاڕووس، دوای تەواوبوونی مەشقەکان بکشێندرێنەوە بۆ ڕووسیا.
دوای کۆبوونەوە شەش کاتژمێرییەکەی لەگەڵ ماکرۆندا، پوتن لە لێدوانەکانیدا بۆ ڕاگەیاندنەکان هیچ ئاماژەیەکی بەو بابەتانە نەدا.
دوای زیادبوونی هێزەکانی ڕووسیا لەسەر سنوورەکانی ئۆکرانیا، ماکرۆن یەکەم سەرۆکی وڵاتێکی ڕۆژئاوایە کە لەگەڵ پوتندا کۆدەبێتەوە. وڵاتانی ڕۆژئاوا لەوە دەترسن ڕووسیا پلانی داگیرکردنی ئۆکرانیای هەبێت، بەڵام مۆسکۆ ئەوە ڕەت دەکاتەوە.
بەرپرسە فەڕەنسییەکە وتی لەمیانەی کۆبوونەوەکەدا ماکرۆن لەسەر " گفتوگۆیەکی کراوە لەسەر پرسیارە ستراتیژییەکان " ڕازیبووە، بەڵام هیچ وردەکارییەک نەبوون لەسەر ئەوەی بابەتی گفتوگۆکان بەدیاریکراوی چی دەبێت.
پوتن داوای گۆڕینی پێکهاتەی ئاسایشی کردووە لە ئەوروپادا، داوای لە ناتۆ کردووە هەرگیز ڕێگە نەدات ئۆکرانیا ببێتە ئەندام تیایدا، هەروەها موشەکەکان ڕەوانەی نزیک سنوورەکانی ڕووسیا نەکرێن و هێزەکانی هاوپەیمانێتی ناتۆ لە ڕۆژهەڵاتی ئەوروپا بکشێنەوە.
سەرچاوە/ ڕۆیتەرز
فەڕەنسا دەڵێت پوتن ڕازیبووە بۆ ئێستا هیچ مانۆڕێکی سەربازیی نوێ لە نزیک ئۆکرانیا ئەنجام نەدات
