دانیشتوانی گوندی باوباپیری کامڵا هێرس لە هیندستان، ڕۆژی چوارشەممە ئاهەنگ بۆ ڕۆژی دەستبەکاربوونی هێرس وەک جێگری سەرۆکی ئەمەریکا دەگێڕن لە ڕێگای یارییە ئاگرینیـیەکان و دابەشکردنی شیرنی و خواردن بەسەر خەڵکدا.
تولاسێندراپۆرام Thulasendrapuram ، گوندێکە نزیکەی 320 کیلۆمەترلە باشووری شاری چنایەوە دوورە، ئەو شوێنەیە کە باپیری هێرس لە دایکیـیەوە زیاتر لە سەدەیەک لەمەوبەر لەوێ لە دایک ببوو.
ساڵنامەی تایبەت کە ڕووخساری بایدن و هێرس لەسەرە، لە لایەن کۆمپانیایەکەوە لە تەواوی گوندەکەدا دابەش کراوە.
خاوەن دوکانێک بە ناوی جی مانیکاندان دەڵێت"سیاسەتمەدارێکی ناوچەکە نوێژێکی تایبەتی بەو مەبەستە بەڕێوەبرد و لە بەیانیـیەوە خەڵکی گوندەکە شیرینی دابەش دەکەن و دەمەقاچان دەتەقێنن."
دیمەنەکانی ئەو گوندە پێچەوانەی دۆخەکەیە لە واشنتن کە بەهۆی نیگەرانی ئاسایشی و پەتای ڤایرۆسی کۆرۆناوە داخراوە و تەنیا ڕێگە بە دەزگاکانی ڕاگەیاندن دەدرێت لە دورەوە ڕووماڵی مەراسیمی سوێندخواردنی جۆو بایدن و کامڵا هێرس بکەن.
خانم هێرس پـێشتر گوتویەتی بیری دێت کاتێک تەمەنی پێنج ساڵ بووە سەردانی گوندی تولاسێندراپۆرامی کردووە و لەگەڵ باپیری لە قەراغ دەریای چنای پـێکەوە پـیاسەیان کردووە.
هێرس جگە لەوەی دایکی هیندی بووە و بۆ خوێندن ڕووی لە ئەمەریکا کردبوو، باوکیشی خەڵکی جامایکایە و ئەویش بۆ خوێندن ڕووی لە ئەمەریکا کردبوو.
لەلایەکی دیکە هونەرمەند ناوداری هیندی سودارسان پەتنایک پەیکەرێکی لە لم بۆ بایدن و هێرس دروستکردووه.
هێریس یەکەم ژنە و یەکەم ئەمەریکی ڕەشپێست و یەکەم ئەمەریکی- ئاسیایی دەبێت کە لەم پـۆستە باڵایەی وڵاتە یەکگرتووەکانی ئەمەریکادا بێت.
سەرچاوە / ڕۆیتەرز