ئێران ڕێگری لە نیشتنەوەی فڕۆکە لوبنانیەکان دەکات کە بڕیار بوو دەیان هاووڵاتی لوبنانی کە لە ئێران گیریان خواردبوو بگەڕێننەوە. ئەم گرژییە دوای ئەوە ڕوویدا کە لوبنان ڕێگەی نەدا فڕۆکەیەکی نەفەرهەڵگری ماهان لە فڕۆکەخانەی بەیرووت بنیشێتەوە. کردەوەیەک کە تاران بە دەرئەنجامی هەڕەشەکانی ئیسڕائیل بۆ هێرشکردنە سەر لوبنانی ناو دەبات.
لوبنان لەم هەفتەیەدا گەشتێکی ئاسمانی ئێرانی ڕاگرت دوای ئەوەی سوپای ئیسڕائیل ڕایگەیاند ئێران فڕۆکەی مەدەنی بەکاردەهێنێت بۆ گەیاندنی پارە بۆ حزبوڵا بە شێوەیەکی قاچاخ لە ڕێگەی فڕۆکەخانەی بەیرووتەوە.
ئێران وتی ڕێگە نادات فڕۆکە لوبنانییەکان لە ئێران بنیشنەوە هەتاوەکو ئەو کاتەی فڕۆکەکانی خۆی دەتوانن لە بەیرووت بنیشنەوە.
ئەم ڕووبەڕووبوونەوەیە بووەتە هۆی ئەوەی دەیان هاووڵاتی لوبنانی سێ ڕۆژە لە ئێران گیربخۆن، ئەوەش دوای ئەوەی ئامادەی مەراسیمێکی ئایینی بوون و بڕیاربوو بە فڕۆکەی هێڵی ئاسمانی ماهانی ئێرانەوە بگەڕێنەوە بۆ بەیرووت.
وتەبێژی وەزارەتی دەرەوەی ئێران ئیسماعیل بەقایی ڕۆژی هەینی وتی ئیسڕائیل هەڕەشەی لە فڕۆکەیەکی سەرنشین کردووە کە هاووڵاتییانی لوبنانی تێدا بووە و لە تارانەوە بەڕێکەوتبوو. ئەوەش " بووەتە هۆی تێکدانی گەشتە ئاسمانییەکانی وڵاتەکە بۆ فڕۆکەخانەی بەیروت." سەرکۆنەی " مەترسییەکانی ئیسڕائیلی " کرد و وتی پێشێلکردنی یاسای نێودەوڵەتییە.
لە پۆستێکدا لە ئێکس وتەبێژی سەربازیی ئیسڕائیل ئاڤیخای ئەدرەعی وتی هێزەکانی قودسی ئێران و حزبوڵا گەشتە ئاسمانییە مەدەنییەکانییان بەکارهێناوە بۆ گواستنەوەی پارە بۆ بەیروت بە قاچاخ. وتی سوپای ئیسڕائیل " ڕێگە نادات حزبوڵا خۆی پڕچەک بکاتەوە و سەرجەم ئامڕازەکانی بەردەستی بەکاردەهێنێت " بۆ جێبەجێکردنی ئەو ئاگربەستەی کە لوبنان ناچار دەکات گواستنەوەی چەک بۆ حزبوڵا ڕابگرێت.
دوای ڕێگریکردن لە فڕۆکە ئێرانییەکە، لوبنان ڕۆژی هەینی دوو فڕۆکەی لە هێڵە ئاسمانییەکەی خۆیەوە ڕەوانە کرد بۆ گواستنەوەی ئەو لوبنانییانەی کە لە ئێران گیرییان خواردووە، بەڵام ئێران ڕەتی کردەوە ڕێگە بە فڕۆکە لوبنانییەکان بدات لەسەر خاکەکەی بنیشنەوە.
باڵیۆزی ئێران لە بەیروت موجتەبا ئامانی بە کەناڵی تەلەفیزیۆنی ئێرانی وت ئێران تەنها لە کاتێکدا ڕێگە دەدات فڕۆکە لوبنانییەکان لە ئێران بنیشنەوە کاتێک لوبنان ڕێگە بە فڕۆکە ئێرانییەکان بدات گەشت بکەن بۆ بەیرووت.
وتی " بێگومان داواکەی حکومەتی لوبنان پەسەند دەکرێت، بەڵام بە مەرجی ئەوەی کە ڕێگری لە گەشتە ئاسمانییە ئێرانییەکان نەگرن."
وەزیری دەرەوەی لوبنان جۆو ڕاگی بە کەناڵی ئەلجەدیدی لوبنانی وت کە وەزارەتەکەی لەگەڵ هاوتا ئێرانییەکەیدا کاردەکات بۆ چارەسەرکردنی کێشەکە.
پەرلەمانتاری حزبوڵا ئیبراهیم ئەلموسەوی ڕۆژی پێنجشەممە داوای لە حکومەتی لوبنان کرد " ڕێوشوێنی پێویست بگرێتەبەر بۆ گرەنتیدان لەسەر سەروەریی لوبنان بەسەر سەرجەم دامەزراوە گشتییەکانییەوە، لە هەمووی گرنگتر بەسەر فڕۆکەخانەکەیەوە."
وەکو ناڕەزایی دەربڕینێک، دەیان لایەنگری حزبوڵا شەقامەکانی دەوروبەری فڕۆکەخانەی بەیرووتیان گرت.
لە مانگی نۆدا وەزارەتی گواستنەوەی لوبنان فەرمانی بە فڕۆکەیەکی ئێرانی کرد نەیەتە ئاسمانی وڵاتەکەوە دوای ئەوەی ئیسڕائیل هۆشداریدایە فڕۆکەخانەی بەیروت لەسەر ئەوەی ئەگەر ئەو فڕۆکەیە بنیشێتەوە ئەوا " هێز " بەکاردەهێنێت.
سەرچاوە/ ڕۆیتەرز