وتووێژه‌کانی زلهێزان له گه‌ڵ حکومه‌تی ئێران له سه‌ر مه‌سه‌له‌ی ناوکی دووشه‌مه له ڤیه‌نا درێژه‌ی هه‌بوو.
له وتووێژێکی له گه‌ڵ ده‌نگی ئه‌مه‌ریکادا، دوکتور ئاوات عه‌لیار، شاره‌زای سیاسی و پێوه‌ندار به مه‌سه‌له‌ی ناوکی ده‌ڵێت، "ده‌سته‌کانی وتووێژ له سه‌ر بابه‌ته ئوسولی یه‌کان به ڕێککه‌وتن گه‌یشتوون، به‌ڵام هی لاوه‌کی یه‌کان ماون و له سه‌ر ورده‌کاره‌کانیش ڕێک ده‌که‌ون."
دوکتور عه‌لێار شی ده‌کاته‌وه که ئه‌گه‌ر گه‌مارۆکان له سه‌ر ئێران لابه‌رن یان سووک بکرێن ئه‌وه به سه‌دان ملیۆن دوڵار پووڵی نه‌وتی ئێران، که له بانکه‌کانی ئوڕووپایی دان و ده‌ستیان به سه‌ر داگیراوه، به‌ره به‌ره ئه‌و پووڵه بۆ ئێران ده‌گه‌ڕێته‌وه.
به‌ڕێز عه‌لیار ده‌ڵێت ئه‌و ڕێكه‌وتنه له باری ئابووری یه‌وه له به‌رژه‌وه‌ندی ئێران دایه چونکه نه‌وت له چاو ساڵی پار به نرخێكی که‌م ده‌فڕۆشی و که‌می بوودجه‌ی هه‌یه.
