عەلی خامنەیی، ڕێبەری کۆماری ئیسلامی ئێران ڕۆژی هەینی، 7ی مانگی دوو بانگەشەی ئەوەی کرد کە "دانوستان لەگەڵ ئەمەریکا کێشەکانی وڵات چارەسەر ناکات"، ئەمەش دوای ئەوەی دانۆڵد ترامپ سەرۆکی ئەمەریکا ئامادەبوونی خۆی بۆ ڕێککەوتن لەگەڵ حکومەتی ئێران دەربڕی.
ڕێبەری باڵای ئێران ئایەتوڵا عەلی خامنەئی ڕۆژی هەینی وتی گفتوگۆکردن لەگەڵ ئەمەریکا " زیرەکی و ژیری یاخود شانازی نیە و ڕەخنەی لە بەڕێوبەرایەتییەکەی ڕابردووی ترامپ گرت لەسەر ئەوەی پابەند نەبووە بە بەڵێنەکانییەوە.
لەم هەفتەیەدا سەرۆک ترامپ وتی حەز دەکات دەستبکات بە کارکردن لەسەر " ڕێککەوتنێکی پشتڕاستکراوەی ئاشتی ئەتۆمی " لەگەڵ ئێراندا، لە هەمان کاتیشدا کەمپینی ئەوپەڕی فشار لەسەر ئێران دەستپێکردەوە. سەرۆک ترامپ بە ڕۆژنامەنووسانی وت کە پەیامەکەی بۆ ئێران ئەمە بووە " حەز دەکەم بتوانم ڕێککەوتنێکتان لەگەڵدا بکەم. ڕێککەوتنێک کە بتوانن بەردەوام بن لە ژیانتان."
سەرۆک ترامپ لە ماوەی خولی یەکەمی سەرۆکایەتییەکەیدا لە ساڵی 2018 دا لە ڕێککەوتنی ئەتۆمی ساڵی 2015 ی نێوان ئێران و زلهێزەکانی جیهان کشایەوە و سەرجەم سزاکانی بەسەر تاراندا سەپاندەوە، سزاکانیش بوونەتە هۆی پەکخستنی ئابووری ئێران.
لە وەڵامدا ئێران سنوورەکانی ڕێککەوتنە ئەتۆمییەکەی پێشێل کرد.
خامنەئی لە لێدوانێکیدا بۆ سەربازانی هێزی ئاسمانی ئێران بە بۆنەی ساڵیادی شۆڕشی 1979 ی وڵاتەکەوە وتی " گفتوگۆکردن لەگەڵ ئەمەریکا نە زیرەکییە و نە ژیرییە و شکۆمەندانەش نیە. هیچ کام لە کێشەکانمان چارەسەر ناکات. هۆکارەکە چیە؟ ئەزموونە!"
وتی ئێران دوای دوو ساڵ گەیشت بە ڕێککەوتنێک لەگەڵ ئەمەریکا و وڵاتانی دیکەدا، بەڵام ئەمەریکاییەکان سەرەڕای ئەو هەموو سازشەی ئێران پابەندی نەبوون. " ئەو کەسەی لەسەر دەسەڵاتە دڕاندی." ئەوەش وەکو ئاماژەیەک بۆ ترامپ.
ڕۆژی چوارشەممە بەرپرسێکی باڵای ئێران بە ڕۆیتەرزی وت کە ئێران ئامادەیە دەرفەتێک بدات بە ئەمەریکا بۆ چارەسەرکردنی ناکۆکییەکان.
خامنەئی وتی ئێران وەکو خۆی وەڵام دەداتەوە ئەگەر ئەمەریکاییەکان هێرش بکەنە سەر ئێران. " ئەگەر هەڕەشە لە ئاسایشمان بکەن، ئێمەش هەڕەشە لە ئاسایشی ئەوان دەکەین، هەمان شت دەکەین."
سەرچاوە/ ڕۆیتەرز